1 Ka ccaaw, ka bya kha lawkute

ka kawbya hae kha

na lungkhu kya na ccykekuh zah,

2 hawnaw kalan na nakaring tuakute

nythyanaw kalan na thinlung kha

na pya ze thuasah,

3 akhupaw bya kha na ko ccaccing zah,

nythyanaw hanlan na roi na saw ze thuasah,

4 hawnaw kha ngun hawte na ccung zah,

thuruhpaw sisua hawte na ccung ze thuasah

5 Bawipaw rawrinaw kha na nyh cih zah

Pachia nynaw kha na muih cih.

6 Pawccecize Bawipaw nynh tuh

hawnaw kha a pya hae,

nynaw te thaethyanaw tuh

a khalang kyate nynh yn thua.

7 Miding hae hanlan

hawnaw hoypaw kha a ccakhungpya hae;

ccaenaw um lei lante

a cceih hae paw hanlan aning tuh

khawriaphua nynh thua.

8 Byading laanpi kha phang rin zah

alungzipaw a ccungccaw hae laanpi kha

a khynsahpya hae.

9 Tetuh dingnaw, byading,

laesahku leinaw te

laanpi hoypaw miakaw kha na nyh cih;

10 pawccecize hawnaw tuh

na thinlung kalan a tee cih zah,

nynaw tuh na thinlung hanlan

lungtuanaw athua cih.

11 Hawnaw nynh ae rin cih zah

nythyanaw nynh ae thungkhaw cih.

12 Hoyleinaw laanpi,

bya hoyleipaw a ho hae paw,

13 mohnaw laanpi zui khylan

laan dingpaw a vua hae paw,

14 hoyleinaw raenaw kya

mih lungpaw zah

ahoy leipaw ccouseikunaw kya

mih lungrythuapaw,

15 mih laanpi tuh kou zah

mih cyisahnaw kya

a thyaruh hae paw balyn kyate

nang kha ae khum cih.

16 Nopi hoyleinung,

nawpali lan byahothyapaw ohhuanung,

17 a zawthaw lya-e

a mungkuh hae paw kha vua zah

a Pachia byakinnaw a ningpaw

nopi kyate ae khum cih;

18 pawccecize a laanpi* tuh

chinaw kalan khe cceih zah,

a zuipaw laanpi tuh

michi khua langkhe nynh a ccia;

19 tuh-e nopinung kalan

a cceih hae paw tuh papin ki vae khyh hae,

hiinnaw laanpi kya mah

thua vae khyh hae.

20 Tukeiccuze ccungccaw hoypaw hae

laanpi kya cceih lah,

miding hae laanpi kha zuitua.

21 Pawccecize miding hae tuh

hynh-e ram kya khua a sah cih hae zah,

seinaw hoi leipaw ccungccaw hae tuh

e ram kya a um cih hae;

22 thuasalama ccungccaw hoylei hae paw tuh

ram kyate maemih athua cih hae zah,

mih lungzi lei hae paw tuh

ram kyate ccaring vua athua cih hae.