1 Hawnaw nynh ko khyh zah

nythyanaw nynh mah

a roisaw khyh tou?✝

2 Laanpi pe ahangnaw kya te

laanpi atungkunaw kyakhe a thadyn;

3 khua teenaw koikua pe,

thuakaw pi kyakhe sia zah,

4 "Pou ccungccaw hae,

nanning kha kae ko oh,

ccungccaw balyn kalan ka sia.

5 Tuanaw a zya hae paw,

hawnaw kha ccangkuh oh;

mingaee hae, tuanaw hoypaw kha

ccangkuh oh.

6 Ngaetua oh, asung-epaw uccaw hae kha

kae hopah cih oh,

ka mung kyate ahmepaw bya a toikuh cih;

7 ka khalang nynh byaccing kha a ho cih;

hoyleinaw tuh ka mung hanlan

anungsikuhpaw nynh thua.

8 Ka khalang kya-e bya hae tuh

kyh zah, hynhupaw bya te

kathuhkaleihpaw bya um khyh.

9 A nyhthyapaw hanlan tuh

byadingpaw thua zah,

nynaw a hoipaw hanlan

akyhpaw bya nynh thua.

10 Ka thuiheinaw kha ngunphua laeze

lawkuh hua oh lah,

nynaw kha sui hoypaw laeze

lawkuh hua oh;

11 pawccecize hawnaw tuh

aphutepaw lung laeze hoyhua zah,

na rynaw balyn tuh hawnaw te

khinkhia kho thua khyh.

12 Hawnaw athuapaw kae tuh

tuathyanaw te kae umkheih zah,

nynaw te thaethyanaw kha ka hoi.

13 Bawipaw rawrinaw tuh

hoyleinaw kha huapaw nynh thua.

Lysakunaw, tansakunaw,

ozia hoyleinaw te

lingpaw bya kha ka hua.

14 Tuanaw hoypaw te

hawnaw hoypaw kha ka hoi;

nythyanaw te thawzung kha mah ka hoi.

15 Kamaw liate siapharan hae nynh

uk hae zah, uktu hae nynh

akyhpaw phunglang kha a rae hae;

16 Uktu hae nynh kamaw liate uk hae zah,

a sung-e hae paw, kyhrarih lante

a uk hae paw balyn nynh mah

kamaw liate nynh a uk hae.

17 Yn sungsah hae paw kha

ka sungsah hae zah,

zuakute yn ccung hae paw tuh

yn muih hae.

18 Hoirumnaw te sawtuanaw tuh

ka kya a um, atynpaw sisua te

laansui-uanaw mah a um hae.

19 Ka kyate na muepaw tuh

sui laeze ahoyhua,

sui ccipaw lae heize ahoyhua.

ka thuakhaepaw tuh

ngunphua hoypaw laeze ahoyhua.

20 Dingnaw laanpi kyakhe ka cceih zah,

byading laanpi thyhte ka cceih,

21 kamaw yn sungsah hae paw kha

hoirumnaw ka pya hae zah,

mih sisua bawng kha ka biasahpya hae.

22 Bawipaw nynh langmawlya

a rae hae paw kyaze

masaty a ryalaw atakaw khe

kae kha yn rae.✝

23 Laephi thotakaw maw, langmawlya

masaty khe kae kha yn rae vae.

24 Akhupaw rili a um maw,

tui te phe beihpaw tuidy hae

a um mawkhe kae tuh ka pui vae.

25 Mua pi hae te mua taraw hae

a rae maw, kae tuh ka pui vae,

26 laephi te loram hae a rae maw,

laephi kya-e masaty laenoi

a rae mawkhe, kae kha yn rae vae.

27 Vaawlui a tynsah lyakhe kae tuh

tuin kya ka um zah, rilipi vawlan

a synria mawkhe ka um vae,

28 luki lang umpaw vaawlui kha

tynkaring lan a rae lya,

rilipi hae kha he a tynsah lya,

29 tui nynh a kaw a ei khyh nawlan,

rili kha a umnaw a khyapya lyate

laephi athotakawnaw kha

a syntaw lyakhe,

30 kae tuh amaw pe khe

ryalaw athyapaw hawte ka um;

kae tuh nin takyh a lungrypaw

ka thua zah, amaw malang khe

ka lung zungzae tua,

31 a laephipi kya ka lungtua zah,

ccungccaw hae kya

ka lungrythua.

32 Te atu, ka ccaaw hae,

ka bya hynh ngae oh:

ka laanpi a zui hae paw tuh

lungtuapaw nynh athua hae.

33 Thuiheinaw kha ngae oh lah

hawtua oh,

e bya hynh pawlangria leite

um nan oh.

34 Ka bya kha ngae zah,

nin takyh ka koikua kya umte,

ka thuakaw pe khe

phang a ngawpaw tuh

lungtuapaw nynh athua.

35 Pawccecize kae yn muihpaw

humhung zemah

hiinnaw kha muih zah,

Bawipaw kyate maehoynaw kha a mue;

36 thuasalama kae yn muih leipaw tuh

amaw te amaw kha a vawsawsaku;

kae yn huapaw balyn tuh

chinaw kha a sungsah hae," a ci.