1 Dingnaw laanpi

a zuipaw ryachipaw tuh

ccouseikunaw bya a hopaw

mingaeepaw laeze ahoyhua.

2 Nynaw um leite rynaw tuh hoy khyh,

Rangsakute a cceihpaw tuh

a laanpi a vaethya.

3 Ccungccaw tuh a ngaeenaw nynh

ronaw kalan a cciakhae,

tuhzemah a thinlung kyakhe

Bawipaw tungvaw a thinria.

4 Hoirumnaw nynh

ruiban patae a thuakhae,

thuasalama a ryachipaw tuh

ruiban hoi khyh.

5 Ahme leipaw ccaekia tuh

detahnaw mue leite um lan khyh,

hynbya a hopaw tuh lue lan khyh.

6 Ccungccaw patae nynh

a lung-uapaw ccungccaw kya

maehoynaw kha a ccungku hae,

humhung mah lasung

a pyatupaw hanlan tuh

ruiban nynh thua.

7 A ryachipaw kha

a uno hae nynh heize

a hua hae ze, a ruiban hae nynh thytuh

hohcihmou houh a sibia vae cih hae!

A kohui hae zemah tuh-e hae tuh,

tuin kya um vae khyh hae.

8 Hawnaw a muepaw tuh

amaw te amaw a sungsakuhpaw nynh thua,

nythyanaw a ccykekuhpaw tuh

hoynaw a mue.

9 Ahme leipaw ccaekia tuh

detahnaw ing leite um lan khyh,

a hynpaw tuh a roh cih.

10 Mingaee tuh hiinhoyte

um lan ngaekuh khyh,

see nynh a bawipaw ukpaw tuh

houh ngaekuh vae khyh.

11 Mihaw hae tuh mih lungsae zah,

milae seinaw kha ccuinpya leinaw tuh

mih phu-enaw nynh thua.

12 Siapharan thinrianaw tuh

chindeih nynh a siapaw te nynh aloku,

thuasalama a thawccinaw tuh

lonua vawlan e dangtui te nynh aloku.

13 Angaeepaw ccaaw tuh

a paaw hanlan ronaw nynh thua,

Peku a mangpaw zu tuh

boubou accawpaw

khuaaratui te nynh aloku.

14 Inn te hoirumnaw tuh

nungpaaw rho nynh thua,

thuasalama ahawpaw zu tuh

Bawipaw kyate muepaw nynh thua.

15 Thawnawnaw nynh

ithuhnaw kha a thuakhae,

a thawnawpaw tuh a vuelaw cih.

16 Kawbya a zuipaw tuh a hiin cih;

a zuipaw laanpi kha

pawlangria leipaw tuh a chih cih.

17 A ryachipaw tungvaw

thawccinaw a hoipaw tuh

Bawipaw kha uccaw

a koiisakuhpaw thua zah,

Bawipaw nynh phe ccing lan a sang cih.

18 Ngaehoinaw a um lyakhe

na ccaaw hae kha thuihei hae;

a ro nawlan hae

ngaethyaumsah nan hae.

19 A thinthah zah

a puathopaw ccungccaw tuh

detahnaw a ing cih; amaw kha

vae kheit na khum ze,

tuhte bua na khum cih.

20 Malang ccyh kya

hawnaw na mue nawlan,

tuanaw pyakupaw kha ngae lah,

thuiheinaw kha lawkuh.

21 Ccungccaw thinlung tuh

khuakhankunaw patae a hoi kho,

thuasalama Bawipaw khuakhannaw rou nynh atyn cih.

22 Ccungccaw kya ry lanpaw tuh

lungzinaw nynh thua,

a ryachipaw lang tang tuh

a hynpaw lang tang laeze ahoyhua.

23 Bawipaw rawrinaw tuh

hiinnaw ccaccing nynh thua;

tuh-e rawrinaw a hoipaw tuh

khyndadyh lan a um cih zah

vawsawnaw tung lan khyh.

24 A thawnawpaw tuh a kuih kha

pake lungkhu lang pute,

a khalang lungkhu lang

bawku lan sanmah hua khyh.

25 Ccungccaw a saryapaw kha zia lah,

tuanaw a zyapaw nynh

hawnaw a mue cih;

mihawpaw kha na thuihei zetuh

nythyanaw a mue cih.

26 A paaw kha zia zah

a nung kha a deepaw ccaaw tuh

maethyanaw te thethyanaw

a thuakhaepaw nynh thua.

27 Ka ccaaw, hawnaw vua khylan

thuiheikunaw bya kha ngae nan.

28 Ccaekia hoyleipaw nynh

byading kha pawlangria khyh,

ccungccaw hoyleipaw khalang nynh

hoyleinaw kha po a laang.

29 Ccungccaw a sarya hae paw

hanlan detahnaw,

mingaee hae ke hanlan

ziakunaw tuh paccyn ty athua vae.