1 Ka ccaaw, ka hawnaw hynh

hoyte pekitua;

Ka nythyanaw kalan khe

na nakaring kha tuaku tua,

2 tuhteze tuh tuathyanaw kha

na hoi kho cih zah,

na byaho nynh nynaw na hoipaw kha

a langsakuh cih.

3 Pawccecize nopi hoyleipaw munglae tuh

khoitui hawte ccaw zah,

a byaho tuh chitui laeze anawpali hua,

4 thuasalama athangnaw kya tuh

ekhahpaw hawte khah zah,

kyng ning mawte ahepaw thaloi hawte ahe.

5 A ccu tuh chinaw kalan cceihbung zah,

a ccu a kawpaw tuh michi khua lang

cceihpaw laanpi kha nynh a zui.

6 Hiinnaw laanpi langkhe zui khyh;

a laanpi tuh vaevui zah,

aning nynh tuh-e tuh nyh khyh.

7 Te atu, ka ccaaw, ka bya hynh ngae lah,

ka khalang kya-e bya hae kha vua nan.

8 Tuhcihawpaw nopi kha

asawnaw te sibia lah,

a inn thuakaw pe lang naekuh nan;

9 tuhkhyhze tuh sawtuanaw

na ccoupaw kha ming hae kalan

na pya cih hae zah,

na hiinnaw kha thawccinaw

a hoi lei hae paw kalan na pya cih hae,

10 te ramccang hae tuh

nae hoirumnaw khate a byn cih hae zah,

na ryalawnaw mee tuh

ramccangpaw inn lang a cceih cih;

11 te na hiinnaw athangnaw kya tuh

daryndaryn na hawkhaekuh cih,

na ngesaw te na pyn tuh he athang te,

12 "Pawcce ccangpyanaw kha ka la hua zah,

ka thinlung nynh thuiheinaw kha a la theihrya!

13 Ka sazae hae bya kha

ka la ngae khyh zah,

yn ccangpahtu hae bya ka la ngae khyh.

14 Atu tuh apumkuh hae paw

zapi hae ngaelung kya

ronaw phuinccing kya nynh

ka um vae," na ci cih.

15 Na tuidy kya-e tui,

na tuisung kyate aphyhpaw tui kha neih.

16 Na tuidy tuh atolang

phiariphiarae phiasakute,

vaw taraw hae tuh laanpi hae kya

luasah lan accan zawtou?

17 Tuh-e hae tuh na makhae hanlan thua sah lah,

ming hae ryte bungku lanpaw thua nan sah.

18 Na tuidy tuh hythuapya thuasah lah,

na no lya-e na zu kyakhe hoysahte umtua,

19 aning tuh ry lan umpaw sazuh,

apuithyapaw sazuh pinung hawte nynh thua.

A matei nynh accyh takyh kya

na lungry ae ccingsah sah;

a sungsahnaw khate zungzae la ruikhaekuh.

20 Ka ccapaw, pawcce ccangpaw nopi khate

na ruikhaekuh cih zah,

a ccouseikuhpaw by kha na pom cih?

21 Pawccecize ccungccaw laanpi hae tuh

Bawipaw muihnaw kya um zah,

Bawipaw nynh a laanpi balyn kha

akaw-aleih a do.

22 Ccungccaw hoyleipaw tuh

a hoyleinaw kha nynh amaw kha

kaang a kaesah cih zah,

a seinaw liarui hae khate

amaw kha he athua cih.

23 Aning tuh ccangpyanaw

a um khyh keiccuze a chih cih zah,

eih a ngaee keiccuze azo cih.