1 Siapharan Lemuel kalan

a nung nynh a ccangpyapaw

bya hae tuh hynhte nynh thua:

2 Nang tuh ka sungsahpaw ka ccapaw,

ka sawsangnaw liate ka muepaw

ka ccapaw nynh na thua,

paw bya mou kae hopah cih?

3 Na thawzung kha nopi hae kalan pya nan,

siapharan a rohtu hae paw kalan khe

na thawzung te na hoirumnaw kha

la pya nan hae.

4 Pou Lemuel, e hynh

siapharan hae elang thua khyh,

siapharan nynh misutui kha

nia lanpaw thua khyh,

uktu bawi hae nynh ruithyapaw kha

ry lanpaw thua khyh;

5 Minmin nynh a nia hae ze

phunglang kha phe ning hae zah,

vawsawnaw a tung hae paw nynh

a mue lan hae paw kha

nypahthya vae khyh hae.

6 Vyavya chihpaw ccungccaw kha

ruithyapaw pya oh lah,

a lungriathaepaw ccungccaw kha

misutui pya oh;

7 minmin nynh neih hae sah lah,

mih vawsawnaw kha ning hae sah,

te mih lungriathaenaw kha

liathui nan vae hae sah.

8 Mimaw hanlan a hokuh

kho lei hae paw elang hopah bua hae,

inn lei loo lei aerua hoi lei

hae paw balyn nynh mue lan

a ccan hae paw kha la hokhae hae.

9 Minmin hanlan hopah bua hae lah,

ahmete byapia hae,

ryachi hae te ahobou hae paw nynh

a mue lan hae paw kha hokhae hae.

10 Zu hoypaw kha hummou

a mue kho cih?

Aning tuh aphutepaw

lung laeze aphutehua.

11 A vawpaw nynh tuh-e a zu tuh a zyn,

te a vawpaw tuh a ryachi boi lan khyh.

12 Tuh-e zu nynh a hiin lungkhu balyn

a vawpaw tungvaw hoynaw rae zah,

vawsawnaw pya khyh.

13 Aning nynh tuuming te

laphan kha ccung zah,

lungthote a kuih te rya a law.

14 Aning tuh kungkunawpaw

sanphalung te nynh aloku,

looh kha asawnaw langte yn thuakhae.

15 Khua adae mawte tho zah

a innbyn hae elang

aepaw kha a paccynpya hae,

te ryalawpahtu nopi hae kha

ryalaw a nee hae.

16 Hoyte tuase zah loo kha a re;

a kuih te a muepaw phua khate

misu khokhu kha a rae.

17 Aning tuh ryalaw a zuakuhpaw,

a thungpaw, te ryalaw

a phihpaw nynh thua.

18 A ryalawnaw tuh athane cipaw nyh zah,

khuazi ccyh kya a maeekhua tuh

chih boi khyh.

19 Aning nynh a kuih te laaw kha sukuh zah

boei a kua.

20 Ryachi hae hanlan a lung-ua zah,

ahobou hae paw hanlan

a kuih kha a dyng.

21 Vuiraw a ccaw lya mah

a innbyn hae elang rih khyh,

pawccecize a innbyn hae tuh

khualungpaw boeining a hoi hae.

22 Amaw ccaccei nynh boei kha a kua;

a boeining tuh nebaleihpaw laaw te

kuakuhpaw te sehahyhpaw

boeining nynh thua.

23 A vawpaw tuh ram lungkhu e

piccan hae laku haungbua zah,

khua koikua hae kyaze

nypaw ccungccaw nynh thua.

24 Aning nynh nebaleihpaw laaw te

kuapaw boeining kha kua zah leih a zua;

taeccia kha rae zah kungku hae kalan

leih a zuapya hae.

25 Thawzung te sawtuanaw tuh

a boeining thua zah,

yn thua cih paw ccyh kya a lungtua cih.

26 Aning nynh hawnaw bya kha ho zah,

a lae nynh thawccinaw kong kha

a ccangpya.

27 A innbyn hae umtu ziazae kha

hoyte do zah, thawnawnawpaw

looh kha ae khyh.

28 A ccaaw hae nynh

hythua nung cite ko hae zah;

a vawpaw nynh mah thehoysah zah,

29 "Nopi patae nynh

kou hoy lan a cyi vae hae,

thuasalama nang tuh

minmin balyn laeze myaryamaw

na hoyhua," a ci.

30 Ccungccaw lunglawnaw nynh

ccungccaw kha a lingthya,

puithyanaw tuh accakaepaw nynh thua,

thuasalama Bawipaw raw a rihpaw

nopi tuh thehoysah athua cih.

31 A kuih te a cyipaw balyn hanlan

amaw kha thehoysah oh,

a ryalawnaw nynh amaw kha

khua koikua hae kyakhe

thehoysah sah.