PHUNGHOTU 1

Hiinnaw hynh Accakaepaw

1 Jerusalem a umpaw siapharan, David ccapaw phunghotu bya:

2 Accakaepaw, accakaepaw!

Atyn-are hynh accakaepaw nynh thua cite

Phunghotu nynh a ho.

3 Ccungccaw nynh khuaninso kaw kya

thawte rya a lawpaw balyn hynh

paw thanenaw mou a mue?

4 She kheit thang zah,

she kheit yn thua, thuasalama

laephi tuh zungzae atyn.

5 Khuanin tuh yn thua zah a ccah,

te yn thuanaw hmin langkhe palou a ki.

6 Khisan tuh alia langkhe zawbung zah,

palung langkhe bua azawthung;

zaw bungthung zah bua a ki.

7 Vaw miakaw tuh

rili lungkhu lang a lua hae,

thuasalama rili tuh

abeih cite umlae khyh;

vaw hae tuh oun luanaw hae

tuinaw langkhe kithui hae zah,

tuin kyate bua a lua hae.

8 Atyn-are hynh lungriathae

lanpaw cci nynh thua;

hotae lanpaw thua khyh;

mit nynh muih zah dokhin khyh,

nakaring nynh thae zah

azaw ci um khyh.

9 A la um vae paw kha

yn um ung cih paw thua zah,

cyi kou vae paw kha

cyi lan ungpaw nynh thua;

khuanin kaw kya athawpaw

paw sanmah um khyh.

10 "Dotua, e hynh athawpaw nynh thua,"

cite ho lanpaw uccaw a um tou?

Tuh-e tuh aening mawze langmawlya

phe a la um vae paw nynh thua.

11 Langmawlya e ccungccaw hae kha

ning athua vae hae, oun um cih paw

ccungccaw hae kha mah tuh-e hae koute

oun um hae paw nynh

nyh vae lan khyh hae.

Hawnaw Ccung Thane Leinaw

12 Phunghotu kae nynh Jerusalem kya Israel siapharan lang he ka tang tuh, 13 vaawlui zakaw kya cyi a la thuapaw balyn kha hawnaw te ccung lan zah akaw-aleih ny lan cite ka tuaku; Pachia nynh ccungccaw hanlan yn la pyapaw ryakunaw hynh lungtuakhaeku lanpaw thua khyh. 14 Khuanin kaw kya cyipaw cyisahnaw balyn kha ka muih; abalyn mawte accakaepaw thua zah, khisan nulang deekupaw nynh thua cipaw ka ny.

15 Akoupaw kha lawbabin lan

rae kho thua khyh,

a um leipaw kha ria kho thua khyh.

16 Kamaw te kamaw kha, "Kae tuh kae ka mawze Jerusalem a la ukpaw balyn laeze myaryamaw ka hawhua; ka thinlung nynh hawnaw te nynaw kha ccaerarih lan a ny," ka ciku.✝1.16: 1Si 4.29-31 17 Te ka thinlung tuh hawnaw kha thuasah, lungkyh leinaw te ngaeenaw kha thuasah nythya nawlan ka mang. E hynh mah khisan nulang deekupaw nynh athua cipaw ka ny.

18 Pawccecize hawnaw alung ze

lungriathaenaw houh alung,

nynaw alungpaw ccungccaw tuh

ngaethyanaw alung.