1 Atyn-are hanlan kumvaelori a um, vaawlui zakaw e uccaw miakaw hanlan accyh a um:

2 pui ccyh um zah chi ccyh a um;

ccou ccyh um zah ccoupaw kha

khaee ccyh a um;

3 chia ccyh um zah dansah ccyh a um;

phou ccyh um zah sak ccyh a um;

4 raw ccyh um zah nuin ccyh a um;

ngaethya ccyh um zah law ccyh a um;

5 lung hae kha ccaring vua ccyh um zah

pynkheihlan suelua ccyh a um;

pomku ccyh um zah

pomku khyh ccyh a um;

6 ccung ccyh um zah zosah ccyh a um;

ccy ccyh um zah vua ccyh a um;

7 seii ccyh um zah, hui ccyh a um;

zya dae ccyh um zah byaho ccyh a um;

8 sungsaku ccyh um zah huaku ccyh a um;

rhawtukku ccyh um zah adae ccyh a um;

9 Ryalahtu hae nynh thawte reihkute rya a law hae paw kyate pawmou a mue hae? 10 Pachia nynh ccungccaw miakaw oun pyapaw ryakunaw kha ka ny vae. 11 Pachia nynh atyn-are kha amaw ccyh te angaekuh lante a rae vae; tuhpiaze nulang ccyh te malang ccyh a um cipaw kha ccungccaw thinlung kya a nysah; tuhzemah Pachia nynh atakaw te athangnaw cia pawtemou a rae cipaw kha ccungccaw nynh nyh kho khyh. 12 Ccungccaw nynh a hiin lungkhu kya, lungtua lungpawte a um lanpaw laeze amaw hanlan ahoy huapaw pawpaw mah um vae khyh; 13 tuhpiaze ccungccaw miakaw nynh a ae lanpaw, a nia lanpaw te reihkute rya a lawpaw miakaw kya a lungtuakhaeku lanpaw hynh Pachia lasung nynh thua. 14 Pachia nynh a cyipaw miakaw tuh zungzae atyn cipaw ka ny; biachih khopaw pawpaw mah um khyh zah lawbang khopaw pawpaw mah um khyh; ccungccaw hae nynh amaw malang rawrinaw a hoi ccaw hae cite, Pachia nynh tuhcite a cyi. 15 Atu a umpaw hynh a la um vae paw nynh thua; malang yn um cih paw mah a la um vae paw nynh thua; Pachia nynh a la um vae paw kha bua a umsah thui.

16 Tuhpiaze khuanin kaw kyahin byading a umnaw kya hoyleinaw a um, dingnaw a umnaw kya hoyleinaw mah a um cipaw ka ny. 17 Pachia nynh miding te mihoy leipaw kha bya a pia cih hae, pawccecize uccaw miakaw hanlan te ryalaw miakaw hanlan accyh a khya vae, cite ka thinlung kya ka tuaku. 18 Ccungccaw hynh sarangpaw hawte nynh athua cipaw langsaku khylan Pachia nynh ccungccaw kha a syntawtua, cite ka thinlung kya ka tuaku. 19 Pawccecize sarangpaw te ccungccaw hynh athangnaw tuh phe lokuh; sarangpaw a chi hawte ccungccaw mah a chihbua. Parouh te alokuhpaw hy a hoi hae, ccungccaw hynh sarangpaw laeze thanehuanaw hoi khyh; pawccecize abalyn mawte accakaepaw nynh thua. 20 Abalyn mawte hmin san kheit kalan nynh a ccia hae; abalyn mawte laenoi kyate oun thua hae zah, laenoi kalan bua a ki hae. 21 Ccungccaw muisaw tuh palung lang kaethung zah, sarangpaw muisaw tuh alia lang laephi kalan a cceihbung cipaw hummou a nyh? 22 Tukeiccuze ccungccaw hanlan tuh a ryalaw kya a lungtua lanpaw laeze ahoy huapaw pawpaw mah um vae khyh cipaw ka ny. Tuh-e tuh amaw hanpaw nynh thua; amaw nukhute pawmou a um cih cipaw ny khylan hum nynh mou a hopah kho cih?