1 Na looh kha tui vawlan vuatua,

nin patae aro te na muethui cih.

2 Na hoirumnaw kha

san sari khyhze san tarya lang

phiate nung, pawccecize

laephi vawlan pawcihawpaw

ronaw mou yn cyihkuh cih

cipaw na nyh khyh.

3 Maeking tuh khuaatui te he abeih te,

laephi vawlan khuaa arah;

thingku tuh alia lang a pu zemah,

palung lang a pu zemah

a punaw hmin kyakhe a huekuh.

4 Khivae a ngawpaw tuh

ccacii tukuh boi lan khyh;

maeking a ngaehoipaw tuh

loohruekuh boi lan khyh.

5 Hy nynh ccaawpoipaw nopi vue kya a umpaw ru hae kalan pawtemou a thua cipaw na ny khyh hawte, atyn-are a raetupaw Pachia ryalaw kha na nyh khyh.

6 Awkhua ccyh kya ccacii tu lah, zete ccyh kya mah haeungtaw nan; pawccecize teihynhmou yn hoy cih, e hynh tou, khuh-e khuh tou, tuhkhyhze parouh mawte tou yn hoy cih cipaw na nyh khyh.

7 Awnaw tuh ahoy, khuanin muih tuh lungrythuakhaeku lan a um.

8 Mih hiinshe asae hae paw tuh mih lung atua cih; tuhzemah mohnaw ccyh patae yn um cih cipaw nyh hae sah. Yn cyihkuh cih paw balyn tuh accakaepaw nynh thua.

9 Pou mino, na no lyakhe lungtuate umtua, na no ccyh lyakhe na thinlung tuh lungpawte um sah. Na thinlung nynh a rypaw te na mit nynh a rypaw kha cyitua, thuasalama hynh-e hae balyn keiccuze Pachia nynh bya ae pia cih cipaw nyku tua.

10 Na thinlung kyate lungriathaenaw kha vuatua, na pyn kyate ccinaw kha vuatua; pawccecize na zawthaw ccyh tuh sosohte athang cih.