1 Minhoynaw tuh aphutepaw

zimuin laeze ahoyhua,

chi nin tuh pui nin laeze ahoyhua.✝

2 Michi a umnaw inn lang ccia tuh

poituanaw inn lang ccia laeze

ahoyhua;

pawccecize chinaw tuh

ccungccaw miakaw

athangnaw thua zah, tuh-e tuh

ahiinpaw ccungccaw nynh

a thinlung kya a nyku lanpaw nynh thua.

3 Ngaethyanaw tuh

nuinpaw laeze ahoyhua,

pawccecize maesue ngaethyanaw liate

thinlung kha a lung a tuasah.

4 A haw hae paw thinlung tuh

michi a umnaw inn kya a um;

thuasalama a ngaee hae paw thinlung tuh

hoysahnaw inn kyakhe nynh a um.

5 A ngaeepaw nynh

hlaw a sahpaw kha ngae laeze

a hawpaw nynh a penawpaw bya kha

ngae tuh ahoyhua.

6 Pawccecize a ngaeepaw nynh

a nuinpaw tuh

ang akaw e maee a u cciamangpaw

hinpaw ku aroi te nynh aloku;

e hynh zemah accakaepaw nynh thua.

7 Thanccingte, tuaasahkunaw nynh

a hawpaw kha a ngaeesah.

pyaruh nynh thinlung kha a ro.

8 Uccaw athangnaw tuh

athonaw laeze ahoyhua;

lungsaenaw thinlung tuh

lysakunaw thinlung laeze ahoyhua.

9 Na thinria zoi nan sah,

pawccecize thinrianaw tuh

a ngaeepaw thinlung kya nynh a um.✝

10 "Pawccepei langmawlya kha

atu laeze a la hoyhua?" cite ho nan.

Pawccecize tuh-e na khiapaw tuh

hawnaw kyate yn thuapaw thua khyh.

11 Hawnaw tuh rho hawte hoy zah,

khuanin a muih hae paw hanlan

athanepaw nynh thua.

12 Pawccecize hawnaw nynh

a pyapaw khynnaw tuh phua nynh

a pyapaw khynnaw te nynh aloku;

nynaw a hoipaw tuh hawnaw hoi zah,

hawnaw nynh hiinnaw kha a pya,

tuh-e tuh nynaw athanenawpaw nynh thua.

13 Pachia ryalaw kha hoyte tuatua;

aning nynh phe a kousah vae paw kha

hum nynh mou lawbabin lan a rae kho?

14 Acyikuthya ccyh lya lungtuate um lah, vawsaw ccyh kya hoyte tuatua; ccungccaw nynh a chih koute yn um cih paw kha pawpaw mah a ny khyh ccaw cite, Pachia nynh lungtuanaw kha umsah zah, vawsawnaw kha mah a umsah.

15 Accakaepaw ka hiinnaw kya atyn-are kha ka muih vae; miding nynh a dingnaw kyakhe chih zah, ccungccaw hoyleipaw tuh ahoy leipaw a raenaw kyakhe a hiinshe asae. 16 Eih ding kaesy nan lah, eih haw kaesy nan; pawccemou namaw te namaw ryakhae na roku lanpaw tuh? 17 Eih hoy khyh kaesy nan lah, a ngaeepaw mah la thua nan; pawccemou na ccyh azaw maw ryakhae na chi lanpaw tuh? 18 Uccaw ccangkheit kha phang kyngte ccangpaw ccangkheit kha zuasah leipaw tuh ahoypaw nynh thua; pawccecize Pachia raw a rihpaw nynh tuh tuh-e ccangning mawkhate a tae cih.

19 Khuapi kya um hae paw uktu lu haw laeze hawnaw nynh ahawpaw lu kheit kha thawzung a hoisah hua.

20 Thanccingte, seinaw papin hoi leite hoynaw kyalya raete adingpaw ccungccaw laephi vawlan lu kheit sanmah um khyh.

21 Ccungccaw hae nynh a ho hae paw miakaw kha na peki nan sah, tuhkhyhze tuh na ryalahtu nynh thya ae lawpaw kha na thaesei cih; 22 Namaw nynh mah mingccangpaw hae tungvaw avae patae thya na law hae paw kha na thinlung nynh a ny.

23 E balyn hynh hawnaw te ka syntawtua vae; "A hawpaw lang ka tang cih," cite ka la tuaku, thuasalama hawnaw tuh kae te asawkuh. 24 Hawnaw hynh thaethya aru, myarya khu zah, hum nynh mou a muih kho? 25 Hawnaw te uccaw hae konglang kha ny khylan, thaethya khylan te ccung khylan zuakute ka tua, te hoyleinaw te ngaeenaw kha thaethya khylan ka zuaku. 26 Chinaw laeze akhah huapaw, kaang athuapaw nopi kha ka muih, a thinlung tuh kaang te miabu thua zah, a kuih tuh heenawpaw bawtary nynh thua; Pachia lungry a tungpaw tuh tuh-e nopi kyate a lue, thuasalama misei tuh tuh-e nopi nynh a kyng. 27 Dotua, ka muihpaw tuh hynh-e hynh nynh thua cite Phunghotu nynh a ci, ka ccung zah ka muih loh leipaw kha muih khylan, ccangkheit koute ccangkheit ka tuatua, 28 buabua ka ccung zahmah ka muih khyh. Ccungccaw thong kheit laku kya ahawpaw pise lu kheit ka muih, thuasalama tuh-e hae laku kya ahawpaw nopi lu kheit san ka muih khyh. 29 E ccangkheit kyalya hynh ka muih: Pachia nynh ccungccaw hynh miding lante a la rae, thuasalama ccungccaw nynh paccynkunaw patae kha a hoi.