1 Hawnin ccyh e vuiraw hawte thuasah,

loohrue ccyh e khuaaratui hawte thuasah,

sawtuanaw tuh mingaee hanlan

ngaekuh khyh.

2 Rihthya tuh khiavuikuh zah,

ccipae tuh a zou bungthung hawte,

akonglang um leipaw

thyalawnaw tuh pawlang tang khyh.

3 Marang hanlan ccungngue,

lann hanlan rangtei thua zah,

mingaee ke hanlan tuh

ccungngue nynh thua.

4 Mingaee kha a ngaeenaw thyhte

byakhung nan, tuhkhyhze tuh

nang mah a ngaeepaw lang

na tangsei cih.

5 Mingaee kha a ngaeenaw thyhte

bya la khung, tuhkhyhze tuh

ka haw cite a tuakuh sei cih.

6 Mingaee kha bya a tawpaw tuh

amaw ccu kha thoh pae lan

a baekuhpaw thua zah,

vawsawnaw a tung cih.

7 Mingaee khalang kya-e

phungtangbya tuh

asaekuh huatawpaw

ccukhoupaw ccu te nynh aloku.

8 Mingaee kha sawtuanaw pyapaw tuh

zae kyakhe lungpyng kha

kyngdepaw te nynh aloku.

9 Mingaee khalang kya-e

phungtangbya tuh

aruipaw ccungccapaw kuih

athuingpaw hinpaw te nynh thua.

10 A pe po cceihpaw mingaee khyhze

a ruipaw kha ryalaw lan

a hohkuhpaw ccungccaw tuh

ccungccaw miakaw vawsaw a tungsahpaw

thekawthyapaw te nynh aloku.

11 A ngaeenaw kha buabua

a langsakuhpaw mingaee tuh,

a lua a kinuapaw ui te nynh aloku.

12 Amaw mitmuihnaw kya

ka haw a cikuhpaw laeze

mingaeepaw hanlan

ngaehoinaw a umhua.

13 Thawnawpaw nynh,

"Inn atolang chindeih a um!

laanpi kya chindeih a um!" a ci.

14 Thuakaw nynh thuakawtung kya

palei a miaku hawte

thawnawpaw tuh a ikhung vawlan

palei a paleihkuh bungthung.

15 Thawnawpaw tuh a kuih kha

pake lungkhu lang pu zah,

a khalang lungkhu lang

bawku lan sanmah hua khyh.

16 Hawnawte bya a khung

kho hae paw lu sari laeze,

thawnawpaw tuh

amaw tuanaw kya a hawhua.

17 Milae pekunaw kya

a thungkuh buapaw tuh

amaw ccia lan cceihpaw

ui nakua kha

a kyngpaw te nynh aloku.

18,19 A innpaw kha ling zah,

"Kae ccyasahpaw khaw tou!"

cite a hopaw tuh maee-e, the te

chinawpaw zunghe khate

a kawpaw a angaeepaw

hawte nynh thua,

20 Maeething a um khyh ze,

maee a chi hawte,

thanthya hokunaw a um khyh ze

pekunaw adae.

21 Maeehue nynh maee-e esah zah,

maeething nynh maee a ruasah hawte,

peku a mangpaw nynh

pekunaw kha a thuakhae.

22 Thanthya a hotupaw bya tuh

looh athuapaw te nynh aloku;

tuh-e bya tuh pyn lungkhu lang po a tee.

23 Nawpali lan byahothya zah

a thinlung hoyleipaw tuh

asi thuhkuhpaw laephi ang

te nynh aloku.

24 Ccungccaw huanaw

a hoipaw nynh tuh a bya kha

kou a hosakuh thya,

thuasalama a lungkhu kya

ccungccaw lingnaw kha nynh

phang a poi;

25 aning nynh thawcci o-ang lante

bya a ho ze la zyn nan,

pawccecize a thinlung kya

anungsikuhpaw uccaw ccangsari a um;

26 A thinlung kya umpaw

huakunaw kha hynnaw te

phang a thuruh zemah,

a hoyleinaw tuh ccungccaw zapi kya

alangkuh mamin cih.

27 Hunghua a karouhpaw tuh

tuh-e hunghua lungkhu lang a ccah cih,

lung a toupaw tuh tuh-e lung nynh

amaw kha a tou thin cih.

28 A hynthyapaw lae nynh tuh

amaw nynh vawsaw

a pya hae paw kha a hua hae,

pookunaw bya a hothyapaw

khalang nynh ronaw kha a thuakhae.