1 Siapharan thinlung tuh

Bawipaw kuih kya umpaw

vadungtui hawte thua zah,

Bawipaw nynh a rynaw

miakaw langkhe a mae.

2 Ccungccaw nynh tuh

a cyipaw balyn kha akyh cite a muih,

thuasalama Bawipaw nynh tuh

thinlung kha akhin a sae.

3 Silawnaw rae laeze

dingnaw te byading rae kha

Bawipaw nynh a ccou ryhua.

4 Lysakunaw mitdae te

tansakunaw thinlung,

ccungccaw hoyleipaw kya-e

maeekhua tuh seinaw nynh thua.

5 Azuakuhpaw ccungccaw

paccynkunaw nynh

hoirumnaw kha a thuakhae cih,

thuasalama rangkhirangkhaete

a cyihpaw miakaw tuh

ryachinaw a tung ccaccing cih.

6 Hynhute muepaw sisua tuh

akhuhthungpaw tuihu hawte thua zah

chinaw kaang nynh thua.

7 Ccungccaw hoylei hae paw tuh

mih puathonaw nynh

mimaw kha a roh cih hae,

pawccecize ahmepaw kha

cyih ry khyh hae.

8 A seipaw ccungccaw laanpi tuh akou,

thuasalama athyaapaw

ccungccaw cyisahnaw tuh akyh.

9 A ccohkuh thyapaw zu ryte

inn lungkhu kya umlae tuh

innccukaly apaki lang

umpaw tuh ahoyhua.

10 Ccungccaw hoyleipaw

thinlung nynh tuh

hoyleinaw kha a ry;

a innpaw hae tungvaw

thawccinaw hoi khyh.

11 Ccungccaw a saryapaw nynh

detahnaw he a ing te,

tuanaw a zyapaw tuh

hawnaw houh a mue;

a hawpaw kha thuihei lanze,

hawnaw houh a mue.

12 A dingpaw nynh ccungccaw

hoyleipaw inn kya

a cyihkuhpaw kha hoyte a ny;

ccungccaw hoyleipaw kha

ronaw kalan a sawbung.

13 Ryachipaw nynh a siaruapaw kha

na nakaring na hutawku zetuh,

namaw he na sia te,

hum nynh sanmah

ae thaepah lan khyh.

14 Aruh lante pyapaw lasung nynh

thinrianaw kha daesah zah,

boei kaw te zya ccyngpaw

pyaruh nynh

myarya thinrianaw kha a daesah.

15 Ahmete byapia athua zetuh,

miding hae elang

lungtuanaw nynh thua,

thuasalama hoyleinaw

a rae hae paw hanlan

lungronaw nynh thua.

16 Nythyanaw laanpi kyate

a vaevuipaw tuh

a chih hae paw phu kya

a um cih hae.

17 Hoysahnaw a rypaw tuh

a ryachi cih; misutui te

chitui a rypaw tuh hoirum lan khyh.

18 Ccungccaw hoyleipaw tuh

midingpaw hanlan

shawkhawnawpaw thua zah,

a lungzi leipaw tuh

midingpaw hanlan

shawkhawnawpaw nynh thua.

19 A ccohkuhpaw te

peku a rypaw zu ryte

umkheih lae tuh

laesia ram kya um ze a hoyhua.

20 Mihawpaw inn kya tuh

aphutepaw sisua te chitui a um,

thuasalama mingaeepaw nynh tuh

tuh-e sisua tuh phe a thangsah han.

21 Dingnaw te thawccinaw kha

a ccungpaw tuh

hiinnaw te sawtuanaw kha a mue cih.

22 Ahawpaw ccungccaw nynh tuh

rhawkaw hae khuapi kha

ccianua thung zah

khuaccaaw hae nynh

a doliakuh hae paw sihkakinpaw

rhawhohung kha phe a ro kho.

23 A mung te a lae a sungkuhpaw tuh

vawsawnaw kha

a sihaekuhpaw nynh thua.

24 A lysakuhpaw, a tansakuhpaw te

ccungccaw pawlangria leipaw tuh

a min kha, "Saryatupaw," a ci hae.

25 A thawnawpaw tuh

rya a law ry khyh keiccuze

myarya a ryduaanaw nynh

amaw kha a chisah kho.

26 Ccungccaw hoyleipaw tuh

ninlang a rynaw ale,

thuasalama miding nynh tuh

sithya leite a pya hae.

27 Ccungccaw hoyleipaw nynh

silawnaw a raepaw tuh

anungsikuhpaw nynh thua;

ahoy leipaw paccynnaw te

yn ccyng zetuh

hohcihmou houh anungsiku?

28 Akyh leipaw ccaekia tuh a roh cih,

thuasalama hoyte

a ngaepahtupaw nynh tuh

hmerarih lan ccaekia a khan cih.

29 Ccungccaw hoyleipaw nynh tuh

a rawthungpaw mitmae khate a umsaku,

thuasalama miding nynh tuh

a laanpi kha a paccynku.

30 Bawipaw malang tuh

hawnaw, nynaw te

tuanaw pyakunaw hynh

alakawpaw nynh thua.

31 Rhawtuknaw nin hanlan

marang kha paccyn athua vae,

thuasalama taenaw tuh

Bawipaw kya-e nynh thua.