1 Ka ccaaw, na innpaw elang

aamah na khanpyaku ze thuasah,

milae hanlan byakinpyakute

na kuihphe na bia ze thuasah,

2 nang tuh na byaho keiccuze

kaang na kae zah,

na khalang kya-e bya nynh ae kyng vae.

3 Tukeiccuze ka ccaaw,

nang tuh na innpaw kuih kya

phe na thua vae keiccuze

namaw te namaw khumku khylan

na cyi lanpaw tuh:

arangte cceih lah, zakawsangsakute

na innpaw kyakhe ngiakuh.

4 Na mit kha isah nan lah,

na mit masite na ithua nan sah;

5 sawkawpaw kuih kyate

sazuh a lue hawte thuasah,

kaangsyatu kuih kyate

pavaw a zua hawte thuasah

namaw te namaw kha khumku tua.

6 Pou thawnawpaw,

lungkhi kalan cceih lah,

a umtuzia kha dokute

hawnaw lawku tua.

7 Lupi thuasah, bawi thuasah,

uktu thuasah hoi lei mawte

8 hawnin khe a looh kha paccynkuh zah,

loohrue ccyh khe a looh kha

a ccakhungku.

9 Pou thawnawpaw,

hohseciamou na ih ung cih?

Na inaw kyate hohtuhmou na thokuh cih?

10 Sosoh kae ikuh hin,

sosoh kae ngawphuku hin,

ka kuih tuh sosoh lepiakute

kae haeung hin na ci lyakhe,✝

11 ryachinaw nynh miruh hawte thuasah,

hobounaw nynh zunghe

ccyngkuhpaw hawte thuasah

na tungvaw ae thuanua cih.

12 Ccungkia leipaw te

ccungccaw hoyleipaw tuh

hynhihynhupaw byahote a khiavuikuh,

13 mit phalah masipyanaw,

ccu te syntawnaw pyanaw te

kuihdung te khipyanaw kha a rae,

14 ccouseikunaw thinlung khate

hoyleinaw kha rae zah,

pekumaekunaw kha atu te atu a puisah;

15 tukeiccuze vawsawnaw tuh

a tungvaw khe vaekheitmawte

yn ccah cih zah,

dansah kho lei vae te a roh cih.

16 Bawipaw nynh a huapaw

uccaw ccangtaruh um zah,

anungsikuh a cipaw ccangsari a um:

17 lysakunaw mit, ahynthyapaw lae,

seinaw hoi leipaw

ccungccaw a theihpaw kuih,

18 hoyleinaw khua a khanpaw thinlung,

hoyleinaw kalan arangte a ccuepaw ccu,

19 ahme leipaw byahote

ahynpaw ccaekia, te

uteno laku pekumaekunaw

a puisahpaw nynh thua.

20 Ka ccapaw, na paaw kawbya kha zui lah,

na nung ccangpyanaw kha vua nan.

21 Tuh-e hae tuh na thinlung kya

zungzae ccykekuh lah,

na nging kya oikuh.

22 Na ccia vae ze, tuh-e hae nynh

ae cciakhae cih hae;

na i vae ze, phang ae rin cih hae zah,

he na thaekuh te, bya ae hokhae cih hae.

23 Pawccecize kawbya tuh

maeekhua thua zah, ccangpyanaw tuh

awnaw nynh thua, a seinaw

phypya biate thuiheinaw tuh

hiinnaw laanpi nynh thua.

24 tuh-e thuiheinaw nynh

nopi hoyleipaw kyate thuasah,

a ccouseikuhpaw zu kya-e

nawpalipaw bya kyate thuasah

ae thungkhaw cih.

25 Tuh-e nopinung puithyanaw kha

na thinlung kya duaa nan lah,

a mitdae nynh nang kha

ae kyng nan sah;

26 pawccecize ohhuanung mee tuh

sanlou phe kheit kyalya nynh thua,

thuasalama vawpaw mang a hoi pite

pise a rypaw nynh tuh

pisepaw hiinnaw aphutepaw kha a kyng ry.

27 maee nynh boeining kha u leite

by kya maee kha

pompaeku kho athua tou?

28 Tuhkhyhze maee nynh ccu kha u leite,

maee-e vawlan a cceih khopaw a um tou?

29 A innpaw zu kha a ikhaepaw tuh

tuhawte nynh athua;

tuh-e nopinung a typaw tuh

detahnaw mue leite um lan khyh.

30 A vuelaw keiccuze a vueso khylan

aruhpaw miruh kha

ccungccaw hae nynh

a dothatheih mamin hae.

31 Tuhzemah miruh tuh a kyng hae ze,

miruh kha leit sari a rungsah cih hae;

a inn e uccaw balyn kha a rung cih.

32 Thuasalama milae zu kya

a seipaw tuh tuanaw

a hoi leipaw nynh thua;

tuhte a cyihpaw tuh amaw te amaw kha a roku.

33 Vaemaw te minthunaw kha a mue cih zah,

a maethyanaw tuh zo lan khyh.

34 Pawccecize a zu tungvaw

zyn leinaw kha nynh a vawpaw

thin kha riasah zah, a vawpaw nynh

he a liaru te, synkuh vae khyh.

35 A vawpaw nynh rungkupaw kha

lawkuh lan khyh zah,

lasung patae pya lan zemah

phe a mah cih.