1 Jakeh ccapaw Agur bya:

Ccungccapaw nynh hynhte a ho:

Pou Pachia, ka ria myarya thae,

Pou Pachia, ka ria myarya thae.

Pawtemou ka tae cih?

2 Thanccingte, myaryamaw

ka ngaee zah ccungccaw ka lo khyh;

ccungccaw kya-e

nythyanaw ka hoi khyh.

3 Hawnaw kha ka ccangkuh khyh,

Athyaapaw kya-e nynaw kha

ka hoi khyh.

4 Hummou vaawlang kae zah

yn rungbung?

Hummou a kuih te khivae a huh?

Hummou boeining te tui a tung?

Hummou laephi

athangnaw balyn kha a tynsah?

Tuh-e ccungccapaw min tuh hummou?

A ccaaw min so hummou?

Na nyh ccaccing khaw!

5 Pachia bya miakaw tuh akyh;

amaw kya a rekuh hae paw hanlan

aning tuh khawriaphua nynh thua.

6 A bya kyakhe biachih nan,

tuhkhyhze tuh ae pe cih zah

mihynpaw na thuanaw kha

a langsakuh cih.

7 Uccaw ccangning ngiaku kae ry;

tuh-e hae tuh ka chi maw

pya leite yn um nan:

8 Hynbya ho te lingpaw bya hynh

ka kyate asawnaw lang yn nuepah;

ryachinaw kha yn pya nan lah,

hoirumnaw kha mah yn pya nan;

ka hanlan ahopaw looh khate yn dang,

9 tuhkhyhze tuh phe beih lan ka hoi lanze,

nang kha kae vuasei cih zah,

"Bawipaw tuh hummou thua?"

cite ka hosei cih,

ka ryachi lanze ka ruhsei cih zah

ka Pachia min kha

the ka thyasahsei cih.

10 A bawipaw kyakhe

a seepaw thethya la ho nan,

tuhkhyhze tuh tuh-e seepaw nynh

thya ae law cih zah

seinaw mee na teingsei cih.

11 Mih paaw hae kha thyalaw hae zah

mih nung hae kha

hythua a pya lei hae paw a um hae.

12 Mimaw mitmuihnaw kya

a thyaa hae zemah

mih nungsikunaw

athyaa lei hae paw a um hae.

13 Lysakunaw mitdae te a angthung

hae paw mah a um hae,

14 Ryachi hae kha laephi kyate

po due khylan te ahobou hae paw kha

ccungccaw hae kyate

po due khylan, thaloi te

alokuhpaw haw hoi zah

ccezung te alokuhpaw haw

a hoipaw ccungccaw a um hae.

15 Saeveih nynh a taw nopi

sa ning a hoi; tuh-e hae nynh,

"Oun pya, Oun pya," cite a sia hae.

Mih rynaw accing leipaw

phuin thum a um hae;

"Azaw vae," cite a ho boi leipaw

phuin pali a um hae,

16 tuh-e hae tuh: michi khua Sheol, te

atinpaw nopi vuebua,

tui a byn leipaw laephi,

"Azaw vae," cite a ho

boi leipaw maee nynh thua hae.

17 A paaw kha sarya zah

a nung bya kha ngae leite

pawlang a ria leipaw tuh

accya kya umpaw va-aw hae nynh

a mit kha a khoi cih hae zah

lantaw hae nynh a ae cih hae.

18 Myaryamaw ka ngaeangthuapaw

uccaw phuin thum a um;

ka thaethya leipaw uccaw phuin pali tuh:

19 vaawlui kya a zoupaw mosipi laanpi,

lung vawlan a vawpaw hupaw laanpi,

rili vawlan a cceihpaw sanphalung laanpi,

te liaccanung ryte

a cceihkheih hae paw pisepaw

laanpi nynh thua hae.

20 A ohhuakuhpaw zu laanpi tuh

hynhte nynh thua:

ae zah a mung a hukuh koute,

"Hoyleinaw ka rae khyh," a ci.

21 Laephi a thyngsakuhpaw

uccaw phuin thum a um;

laephi nynh a teing kho

leipaw uccaw phuin pali tuh:

22 siapharan lang a tangpaw see,

aepaw phe a bynpaw mingaee,

23 a vawpaw sungsahnaw

a mue leipaw nopinung te

a bawinung rho a ccoupaw

ryalahtunung kha nynh thua hae.

24 Laephi vawlan adihpaw uccaw

phuin pali a um,

thuasalama tuh-e hae tuh

myaryamaw a haw hae,

25 tuh-e hae tuh: thawzung

a hoi khyh hae zemah,

hawnin ccyh kya mih looh

a ccakhungkuh hae paw lungkhi hae,

26 mih thawsae khyh zemah lung kya

bu a raekuh hae paw saveih hae,

27 siapharan a hoi khyh hae zemah

mih balyn te ataruinte

a nuekuh hae paw tungkhipaw hae,

28 kuih te kyng kho athua zemah,

siapharan inn kya

muih athuapaw laedia nynh thua hae.

29 Mih laanccia apuithyapaw

uccaw phuin thum a um;

mih cciazia dopaw-umpaw

phuin pali tuh:

30 ramsaw kyaze athung huaccepaw

thua zah pawpaw mah a kitaw

leipaw chindeih,

31 tangkarae lan a cceihpaw

awkhungpaw, miaatepaw te

a ccungccaw hae malang

a cceihpaw siapharan nynh thua hae.

32 Namaw te namaw kha

pookute ngaeepaw rya kha

na law ze thuasah,

ahoy leipaw kha na tua ze thuasah

na kuih khate na khalang kha

phang huhkuh.

33 Pawccecize samateitui kha

palei hualeih lanze thawpah amuekuh,

naduh kha me lanze chii apou,

tuhawte thinrianaw kha

palei tua lanze pekunaw apui.