1 Milae te a mungkuh leipaw tuh

amaw rynaw kyalya te

a um rypaw nynh thua,

ahoypaw hawnaw miakaw kha

a nawccah khyh.

2 Mingaee nynh tuh

amaw tuanaw kyalya kha

langsakuh zah, nythyanaw kyakhe

a lungrythua khyh.

3 Hoyleinaw he yn thua vae ze,

dothatheihnaw mah athuabua;

maethyanaw te thethyanaw tuh

a thuakheih hae.

4 Ccungccaw khalang kya-e

bya tuh akhupaw tui hawte thua zah,

hawnaw tuidy tuh

aluapaw vaw hawte nynh thua.

5 Aseipaw ccungccaw kha

maedopaw te byapianaw kyaze

seinaw a hoi leipaw kha

shungsahpaw tuh hme khyh.

6 Mingaeepaw munglae nynh

pekunaw a thuakhae,

a munglae nynh

ccungbua kha a ngiaku.

7 Mingaeepaw khalang tuh

amaw ronaw thua zah,

a mung tuh amaw elang

kaang nynh thua.

8 Ccungccaw lawtypaw byaho tuh

aepaw athuapaw te lokuh zah,

pyn lungkhu lang po a tee.

9 Ryalawnaw kya

a thawnawpaw tuh amaw uccaw kha

alakaw lan a rosahpaw ccungccaw te

uno nynh athua hae.

10 Bawipaw min tuh

tynkarangpaw rhawviainn nynh thua;

miding hae nynh tuh-e inn lungkhu lang

ccue hae zah a khyn hae.

11 Mihoipaw nynh tuh a hoirumnaw kha

atynpaw khuapi thua zah,

ahangpaw khua hohung te nynh

aloku cite a tua.

12 Thinlung hangsahkunaw tuh

ronaw laeze laan a mawty,

zakawsangsakunaw tuh

sawtuanaw laeze laan a mawty.

13 Bya hoyte a thae mawze,

bya a khungpaw ccungccaw tuh

a ngaeepaw te maethya

a lawkuhpaw nynh thua.

14 Ccungccaw thinlung nynh

ccinaw a e-ia kho;

thuasalama lungronaw kha

hummou a teing kho cih?

15 Ahawpaw thinlung nynh tuh

nynaw kha ccakhungkuh zah,

mihawpaw nakaring nynh mah

nynaw kha a ccung.

16 Lasung nynh a pyatupaw elang

laanpi kha a hungpya;

alesaepaw ccungccaw kalan

a thuakhae.

17 Byapiazung kya bya a hotypaw tuh

ahmepaw lo salamah,

a innpaw paw nynh yn thua zah

amaw kha bya a khialiathya.

18 Ccungthydungnaw nynh

eikunaw kha daesah zah,

huhan hoi hae paw bya kha

a paepya hae.

19 U te neitaw bawmkupaw tuh

atynpaw khuapi hawte nynh thua,

thuasalama u te neitaw

pekupaw tuh rhawhohung

sakoihccaw te nynh aloku.

20 Ccungccaw tuh khalang kyate

apoupaw athae khate vue asokuh;

munglae kyate apoupaw kha nynh

vuesonaw kha a thuakhae.

21 Lae nynh chinaw te

hiinnaw kha a uk hae,

lae a sungsahpaw tuh

lae athae kha a ae cih.

22 Zu a muekuhpaw tuh

uccaw hoypaw

a muekuhpaw thua zah,

Bawipaw kyate

maehoynaw kha a mue.

23 Ryachipaw nynh

soihbiakunaw kha a mang,

thuasalama mihoipaw nynh tuh

rehahan lante a khung.

24 Ruiban abang tuh

ruiban huataw thua hae salamah,

ruiban hoypaw tuh

u te neitaw sasaw laeze a bekuh hua.