1 Ahawpaw nopi nynh

a inn kha a sak,

thuasalama angaeepaw nopi nynh tuh

amaw kuih toulou khate

a inn kha a phou.

2 Dingnaw kya a cceih hae paw tuh

Bawipaw raw a rih hae,

thuasalama a thyaruh hae paw nynh tuh

amaw kha pawlangria khyh hae.

3 Mingaeepaw nynh a hopaw bya tuh

amaw ke hanlan

ccungngue nynh thua,

thuasalama mihaw hae munglae nynh tuh

mimaw kha a thungkhaw hae.

4 Tangnuapaw um leinaw kya-e

vaetua aenawpaw kua tuh

thyaararih lan accawnghan,

thuasalama vaetua thawzung liate

looh patae avoi.

5 Alungzipaw ccaekia tuh

hynbya ho khyh,

thuasalama ahme leipaw

ccaekia nynh tuh hynbya a ho.

6 Sarya a mangpaw nynh tuh

hawnaw kha a ccung zemah alakaw,

thuasalama a nyhthyapaw nynh tuh

hawnaw kha zoikadeihte a mue.

7 Mingaeepaw nynh

a umnaw kha cciatawtua,

pawccecize tuin kyakhe

hawnaw bya na muih lan khyh.

8 Mihawpaw hawnaw tuh

a ccianaw laanpi kha a nyku,

thuasalama mingaeepaw

a ngaeenaw nynh tuh a cciakhaesei.

9 Mingaee hae nynh

seinaw kha pawtua-ungsah khyh hae,

thuasalama miding tuh

Pachia kya-e maehoynaw kyakhe a lungtua.

10 Thinlung nynh

amaw vawsawnaw kha a nyku,

a lungtuanaw kha mah

milae hae kya neethungbua khyh.

11 Ccungccaw hoyleipaw inn tuh

ro athua cih,

thuasalama midingpaw bu tuh

atyn cih.

12 Ccungccaw nynh akyhpaw

laanpi cite a tuapaw kha,

athangnaw tuh chinaw lang

a cceihpaw laanpi nynh thua.✝

13 Ccungccaw tuh a nuin lyakhe heize

a thinlung kya a ngaethah kho,

lungtuanaw athangnaw tuh

ngaethyanaw nynh thua.

14 A ccouseikuhpaw ccungccaw tuh

a hiinzia khate a vueso cih zah,

ccungccaw hoypaw tuh

a cyisahnaw khate a vueso cih.

15 Tuanaw a zyapaw nynh tuh

atyn-are kha a zyn,

thuasalama a hawpaw nynh tuh

a ccianaw laanpi kha hoyte a doku.

16 Mihawpaw tuh

raeringkute um zah

hoyleinaw kha a sibia,

thuasalama mingaeepaw nynh tuh

synkuh khyh zah a sawphahkuh.

17 A thindynpaw ccungccaw nynh tuh

ngaeepaw rya kha a law,

Ahoy leipaw

paccynkunaw a hoipaw tuh

ccungccaw hae nynh a hua hae.

18 Tuanaw a zyapaw tuh

ngaeenaw rho kha a ccou,

thuasalama a hawpaw tuh

hawnaw kha bawilukhung lang

a khungku.

19 Ccungccaw hoyleipaw tuh

ccungccaw hoypaw malang khe

a bakhung,

ccungccaw hoyleipaw tuh

miding hae koikua kyakhe

a bakhung.

20 A ryachipaw tuh

a innpaw hae nynh heize

a hua hae,

thuasalama mihoipaw tuh

ruiban patae a hoi.

21 A innpaw kha a theihryapaw tuh

misei nynh thua,

thuasalama ryachi hae kha

thaw a ccih hae paw tuh

lungtua hae paw nynh thua.

22 Ahoy leipaw paccynkunaw

a hoi hae paw tuh

sei khyh hae tou?

Ahoypaw kha

a paccyn hae paw tuh

lungzinaw te zyn lan umnaw kha

a mue cih hae.

23 Ryalaw rupaw miakaw kya

thanenaw a um,

thuasalama bya kyalya

honaw nynh tuh

ryachinaw rou kha nynh athuakhae.

24 Mihaw hae bawilukhung tuh

mih hawnaw kha nynh thua,

thuasalama ngaeenaw tuh

mingaee hae kya-e

haetapawsi nynh thua.

25 Ahmepaw ccaekia nynh tuh

ccungccaw hiinnaw kha a khum,

thuasalama hynbya a hopaw tuh

ccungccaw a pheepaw nynh thua.

26 Bawipaw raw a rihpaw tuh

zynkunaw varyng hoi zah,

a ccaaw hae mah

khynnaw a hoi cih hae.

27 Bawipaw rawrinaw tuh

chinaw kaang kha

sibia khonawpaw

hiinnaw tuidy nynh thua.

28 Siapharan phu-enaw tuh

ccungccaw zapi kya nynh a um,

thuasalama ccungccaw zapi

a um khyh lanze,

uktu siapharan tuh aroh.

29 A lungsaepaw tuh

myarya hawpaw nynh thua,

thuasalama a thindynpaw nynh tuh

ngaeenaw kha a langsaku.

30 Lungdaenaw nynh

pynsaw kha a dansah,

thuasalama eiungnaw nynh tuh

ru kha a mueesah.

31 Ryachi hae kha

a tuaa a sah hae paw tuh

minmin a Raetupaw kha

a sarya hae paw nynh thua,

thuasalama ryachi hae kha

thaw a ccih hae paw tuh

a Raetupaw kha

saw a tua hae paw nynh thua.

32 Ccungccaw hoyleipaw tuh

ahoy leipaw cyisahnaw keiccuze

a khuliakuh,

thuasalama miding tuh

chinaw kya heize khynnaw a hoi.

33 Hawnaw tuh hawnaw

a hoi hae paw tuanaw kyakhe a um,

thuasalama mingaee hae thinlung kya

a umpaw tuh a langkuh.

34 Dingnaw nynh minphuin kha

a hangthung,

thuasalama seinaw tuh

minphuin miakaw elang

minthunaw nynh thua.

35 Hawrarih lante

ryalahpaw ryalahtu tuh

siapharan kya maehoynaw a mue,

thuasalama maethyanaw

a thuakhaepaw ryalahtu tungvaw khe

siapharan tuh a thinria.