1 Ahme leipaw zawccu tuh

Bawipaw hanlan

anungsikuhpaw nynh thua,

thuasalama ahmepaw

khinlung kha tuh a lungrythua,

2 Lysakunaw a um lanze,

maethyanaw a um;

thuasalama hawnaw tuh

zakaw a sangsakuhpaw kya a um.

3 Dingnaw nynh miding hae kha

a cciakhae hae,

thuasalama thyaruhnaw nynh

mihyn hae kha a ro hae.

4 Thinria ccyh lya tuh

hoirumnaw hynh thane khyh,

thuasalama dingnaw nynh

chinaw kyate a khum,

5 Dingnaw nynh ccaenaw um leipaw

ccungccaw kha a laanpi a lawsahpya,

thuasalama ccungccaw hoy

leipaw tuh a hoyleinaw liate

a khuliakuh.

6 Dingnaw nynh miding hae kha

a khum hae,

thuasalama a lungzi leipaw tuh

a karankunaw keiccuze kaang a kae.

7 Ccungccaw hoyleipaw tuh

he a chih te, a ngaehoinaw kha

phe aroh,

ccungccaw hoyleipaw

ngaehoinaw tuh

accakaepaw lang nynh a tang.

8 Miding tuh vawsawnaw kyate

luesah thua zah, amaw ccelang

ccungccaw hoyleipaw nynh

tuh-e vawsawnaw lungkhu lang

a tee ru.

9 Pachia pawlangria leipaw nynh

a khalang khate a innpaw kha a ro,

thuasalama miding kha tuh

hawnaw liate luesah athua.

10 Miding hae nynh hoynaw

a mue hae ze,

akhuapi te mih lungtua;

ccungccaw hoylei hae paw nynh

ronaw a mue hae ze,

lungtuate a sia hae.

11 Miding hae kya-e hythuanaw liate

khuapi tuh hangthung athua,

thuasalama ccungccaw hoylei hae

munglae keiccuze khua tuh ro athua.

12 Mingaee nynh tuh

a innpaw kha a dothatheih,

thuasalama a hawpaw tuh

daebabi lan a um.

13 Ccungccaw thethya

a hothyapaw tuh byaru kha a phy,

thuasalama a lungzipaw nynh tuh

a thinlung kya zya a thuruh.

14 Cciakhaenaw a um leinaw tuh

ram a khuliakuh,

thuasalama tuanaw hoypaw pyatu

alungnaw kya tuh khynnaw a um.

15 A ny leipaw ccungccaw laebah hanlan

bya a kinpakuhpaw tuh

vawsawnaw a tung cih,

thuasalama tuhcite byakinpyaku lan

a eipaw tuh a khyn cih.

16 Thawccithyapaw nopi tuh

sawtuanaw a mue,

thuasalama a ozia hoy leipaw

nopi tuh maethyanaw nynh thua.

Rawthyanaw tuh pawpaw sanmah

hoi leinaw lang a tang,

thuasalama a rawhoypaw tuh

hoirumnaw a mue.

17 Thawccinaw a hoipaw tuh

amaw te amaw kha hoynaw a pyaku,

thuasalama thawccinaw

a hoi leipaw tuh amaw te amaw kha

vawsawnaw a pyaku.

18 Ccungccaw hoyleipaw nynh tuh

ahme leipaw ryalaw mee kha nynh a mue,

thuasalama dingnaw ccacii

a vua hae paw tuh

ahmepaw ryalaw mee kha a mue hae.

19 Dingnaw kya

varyng atynpaw tuh a hiin cih,

thuasalama hoyleinaw kya

a ohleihkuhpaw tuh a chih cih.

20 Thinlung thyaruhpaw tuh

Bawipaw hanlan

anungsikuhpaw nynh thua,

thuasalama ccaenaw um leipaw

laanpi kha a zui hae paw kya tuh

a lungrythua.

21 Ccungccaw hoyleipaw tuh

detahnaw mue leite um lan khyh.

thuasalama miding hae tuh

a lue cih hae.

22 A puithya zemah tuanaw-roihnaw

a hoi leipaw nopi tuh

voh naduh kya-e

sui kuihpu te nynh aloku.

23 Miding hae rynaw tuh

hoynaw te rou nynh

a thangkhaeku;

ccungccaw hoyleipaw nynh

a ngaehoinaw tuh

thinrianaw te nynh a thangkhaeku.

24 Ccungccaw abang nynh

rythyte a pya hae zemah,

houh a hoithung hae;

mingccang hae tuh

mih sithah zahmah,

ahobounaw houh alung.

25 A lung-uapaw ccungccaw tuh

a hoirum cih zah,

milae kha tui a pyapaw tuh

amaw kha mah tui pyaru athua cih.

26 Looh kha phang a byhpaw tuh

ccungccaw hae nynh

thya a law cih hae,

thuasalama looh a zua hae paw lu

vawlan khe hythuanaw a um cih.

27 Hoynaw kha zuakute

a ccungpaw tuh maehoynaw a mue cih,

thuasalama hoyleinaw

a ccungpaw tuh hoyleinaw nynh

a thuanua cih.

28 A hoirumnaw kha

a doliakuhpaw tuh

baleih anaan cih,

thuasalama miding tuh thingnaw

hinlalyhpaw hawte a hiin cih.

29 A innbyn kya vawsawnaw

a thuakhaepaw tuh khivae kha

rho lang a ccou cih,

A ngaeepaw nynh a hawpaw kha

rya a lawpah cih.

30 Miding nynh a thaepaw thae tuh

hiinnaw thingku nynh thua,

puathonaw nynh hiinnaw kha a ro.

31 Miding nynh mah laephi vawlan hin

a ryalaw mee kha a mue ze,

ccungccaw hoyleipaw te

miseipaw nynh pawcih alungpaw

amee kha mou houh a mue cih?✝