1 Ka ccaaw, kae ccangpyanaw kha ning nan,

na thinlung nynh

ka kawbya hae hynh ccykekuh sah;

2 pawccecize tuh-e hae nynh

hiinshe saenaw te

hiin hoynaw kha ae pya cih.

3 Lungzinaw te zyn lan umnaw kha

na kyate phiasakuh nan hae;

tuh-e hae tuh na nging kyakhe

oikuh hae lah,

na thinlung lungphe kyakhe

zeikuh hae.

4 Tuhteze tuh Pachia te

ccungccaw mitmuihnaw kya

maehoynaw te minhoynaw

na mue cih.✝

5 Bawipaw kha na thinlung balyn te

doliakuh lah,

na hawnaw khate la rinkuh nan.

6 Na ccianaw laanpi takyh kya

amaw kha nyh lah,

na laanpi kha ae lawsahpah cih.

7 Amaw mitmuihnaw kya

ahawsakuhpaw la thua nan;

Bawipaw kha rih lah,

hoyleinaw kha maetawkuh.✝

8 Tuh-e tuh na ngesaw hanlan

dannaw athua cih zah,

na pyn hanlan isei athua cih.

9 Bawipaw kha na sisua te

na voisahpaw athae balyn kya-e

thaety khate sawtuanaw pyatua;

10 tuhteze tuh na ccung-inn hae tuh

phe abeih cih hae zah,

na misu mianawpaw akhu hae tuh

misutui te aleikuh cih hae.

11 Ka ccaaw, Bawipaw thuiheinaw kha

pawlangria leite um nan,

ae thuihei ze na lungroh nan sah,✝✝

12 pawccecize paaw nynh

a lunglahpaw a ccapaw kha

a thuihei hawte

Bawipaw nynh a sungsahpaw kha a thuihei.✝

13 Hawnaw kha ccung zah

a muihpaw tuh lungtuapaw nynh thua,

nythyanaw a hoipaw mah a lungtuabua,

14 pawccecize hawnaw kyate

muepaw tuh ngun laeze hoyhua zah,

hawnaw kya-e amia tuh

sui laeze ahoyhua.

15 Hawnaw tuh aphutepaw

lung-awpaw laeze aphutehua zah,

na rypaw balyn khate

touse kho thua khyh.

16 A ranglang kuih kyakhe

hiinshe saenaw um zah,

a voilang kuih kyakhe

hoirumnaw te sawtuanaw a um.

17 A laanpi tuh lungpawnaw laanpi thua zah,

a laanpi balyn tuh daenaw nynh thua.

18 Hawnaw a kyngkuh hae paw hanlan

hawnaw tuh hiinnaw thingku nynh thua;

hawnaw kha tynkaring lan

a kyngkuh hae paw tuh

lungtua hae paw nynh thua hae.

19 Bawipaw nynh hawnaw khate

laephi kha rae zah,

nythyanaw khate vaawlui kha a tynsah;

20 a hawnaw khate tui akhupaw kha

phiasakuh zah, maeking nynh

dangtui kha a ccawsah.

21 Ka ccaaw, hawnaw hoypaw te

nythyanaw kha na muihnaw kyate

zuasah nan,

22 tuh-e hae tuh na muisaw elang

hiinnaw athua cih hae zah,

na nging hanlan ccaankunawpaw athua cih.

23 Tetuh na laanpi kya

khyndadyh lan na cceih cih zah,

na ccu tuh thykuh lan khyh.

24 Na haung ze rinaw na hoi lan khyh zah,

na i ze na ithuathya cih.

25 Vaekheitmawte yn thuapaw siikunaw te

ccungccaw hoylei hae paw kya

athopaw khise kha rih nan;

26 pawccecize Bawipaw tuh

na zynkunaw athua cih zah,

na ccu kha kaangkaenaw kyate

ae khynsah cih.

27 Na kuih kya cyipya khonaw

huhan a um ze, hoynaw cyipya lan

accan hae paw kha cyipya leite

la um nan hae.

28 Pya lanpaw mang na hoi pite

na innpaw kha,

"La cceih ccavae, bua nae thua cih,

awkhualan kae pya cih," cite la cipah nan.

29 Namaw doliakute na pe umpaw

na innpaw tungvaw

vawsawnaw pya lan la tuakuh nan.

30 Na tungvaw hoyleinaw

a rae khyh lanze,

akonglang um leite humhung te mah

la pekuh nan oh.

31 A puathopaw ccungccaw tungvaw na eiung nan,

a laanpi pawpaw kha mah la pokuh nan;

32 pawccecize a ccouseikuhpaw tuh

Bawipaw hanlan anungsikuhpaw nynh thua,

thuasalama miding hae tuh Bawipaw nynh

a zyn hae paw nynh thua.

33 Bawipaw thyalawnaw tuh

ccungccaw hoylei hae paw inn kya a um cih,

thuasalama miding hae nynh

a umnaw hae kha tuh hythua a pya.

34 Ccungccaw dothatheih hae paw kha

Bawipaw nynh dothatheih hae zah,

zakawsangsakuh hae paw kha thaw a cci hae.✝

35 Mihawpaw tuh sawtuanaw a ccou cih,

thuasalama a lungkhungpaw mingaeepaw tuh

maethyanaw kha a mue cih.