1 Ccungccaw nynh a thinlung kya

khuakhankunaw kha a hoi,

thuasalama lae nynh a hopaw tuh

Bawipaw kyate nynh thua.

2 Ccungccaw nynh tuh

a cyipaw balyn kha

ahoy cite a muih,

thuasalama Bawipaw nynh tuh

thinlung kha a do.

3 Na ryalaw kha

Bawipaw kalan ap lah,

na paccynkunaw hae tuh atyn cih hae.

4 Bawipaw nynh atyn-are kha

mimaw eenaw raveih hanlan a rae,

ccungccaw hoylei hae paw heize

vawsawnaw nin hanlan a rae hae.

5 Alysakuhpaw balyn tuh

Bawipaw hanlan

anungsikuh hae paw nynh thua;

minmin tuh detahnaw

mue leite um lan khyh hae.

6 Lungzinaw te zyn lan umnaw liate

seinaw kha ngaethya athua,

Bawipaw rawrinaw liate

ccungccaw nynh hoyleinaw kha a sibia.

7 Ccungccaw cyisahnaw nynh

Bawipaw kha a lungry he thuasah te,

a rhaw hae khate heize

a ccawsaku hae.

8 Dingnaw te muepaw

uccaw beihtaraw tuh

dingleinaw te muepaw

uccaw patae laeze ahoyhua.

9 Ccungccaw nynh tuh

a ccianaw lanpaw laanpi kha

a thinlung kya khua a khanku,

thuasalama laandy a hoeitu tuh

Bawipaw nynh thua.

10 Pachia hopaw byapaenaw tuh

siapharan munglae kya a um,

bya a pianaw kya

a khalang tuh sei khyh.

11 Ahmepaw khinlung te zawccu tuh

Bawipaw kya-e nynh thua,

zaw lungkhu umpaw

khinlung balyn tuh

amaw nynh a raepaw nynh thua.

12 Hoyleinaw rae hynh

siapharan hae elang

anungsikuhpaw nynh thua,

pawccecize bawi haungnaw tuh

dingnaw liate tynsah athua.

13 Adingpaw mung tuh

siapharan nynh a rypaw thua zah,

hmerarih lan a ho hae paw kha

a sungsah hae.

14 Siapharan thinrianaw tuh

chinaw a zeccuetu nynh thua,

te mihaw hae miakaw nynh tuh

siapharan lung kha a hoysah hae.

15 Siapharan maesue hoynaw kya

hiinnaw a um, a thawccinaw tuh

hawkhuaa a rawsahpaw

maeking te nynh aloku.

16 Hawnaw muepaw tuh

sui muepaw laeze ahoyhua,

nythyanaw muepaw tuh

ngunphua muepaw laeze

poku lanpaw nynh thua.

17 Miding nynh a zuipaw

laanpi tuh hoyleinaw kha a sibia;

a laanpi kha hoyte a dokuhpaw tuh

a hiinnaw kha a khynsaku.

18 Lysakunaw tuh

ronaw laeze laan a mawty,

hangsahkunaw tuh

ccawbungnaw laeze laan a mawty.

19 Ryachi hae laku kya

zakawsangsakute umpaw tuh

a lysakuh hae paw ryte

mungkute luadepaw uccaw

neekupaw laeze ahoyhua.

20 Ccangpyanaw kha hoyte

a ngaepaw tuh hoynaw

a mue cih,

Bawipaw a doliakuh hae paw tuh

lungtua hae paw nynh thua.

21 Ahawpaw thinlung tuh

uccaw a laesah thyapaw nynh thua,

a-epaw bya nynh

ccungccaw a soih kho.

22 Hawnaw a hoipaw hanlan

hawnaw tuh hiinnaw tuidy nynh thua,

thuasalama mingaee hae kha

mih ngaeenaw nynh de a tah hae.

23 Mihawpaw thinlung nynh tuh

a munglae kha thuihei zah

a hopaw bya tuh

soih khonaw houh a hoi.

24 A-epaw bya tuh

khoilutui te nynh aloku,

muisaw hanlan e zah

pyn hanlan dannaw nynh thua.

25 Ccungccaw nynh ahmepaw

laanpi cite tuapaw kha,

athangnaw tuh chinaw lang

a cceihpaw laanpi nynh thua.✝

26 A vuelawpaw ryalahtu nynh

amaw hanlan rya a lawku;

a vuelawnaw nynh

amaw hanlan ryalaw lan a tuhou.

27 Ccungkia leipaw nynh tuh

hoyleinaw kha aruh lante

paccynkuh zah,

a hopaw bya tuh

aruapaw maee te nynh aloku.

28 Thethya a hopaw nynh

pekunaw kha pazaesakuh zah,

lawtypaw bya a hopaw nynh

ruiban hoy hae paw kha a phia hae.

29 Apuathopaw ccungccaw nynh

a innpaw hae kha soih hae zah,

laanpi ahoy leipaw kalan

a cciakhae hae.

30 Mit a masipahpaw

ccungccaw tuh hoyleinaw

a paccynpaw nynh thua,

a mung a supahpaw

ccungccaw mah hoyleinaw

a thuakhaepaw nynh thua.

31 Sang apawpaw tuh

phu-enaw bawilukhung nynh thua;

adingpaw hiinnaw nynh

tuh-e tuh a mue.

32 A lungsaepaw tuh

a thawsaepaw laeze ahoyhua,

thindynnaw a synkuh khopaw tuh

khuapi a taetupaw laeze ahoyhua.

33 Ccungthydungnaw kha

mih angkizaw lungkhu khe a rae hae,

thuasalama byapaenaw tuh

Bawipaw kya-e nynh thua.