1 Ccungccaw hoylei hae paw kha

eiung nan hae,

minmin ryte mungkuh ry nan,

2 pawccecize mih thinlung nynh

puathonaw kha tua zah,

mih mung nynh ming hae

vawsaw pyanaw bya kha a ho.

3 Hawnaw liate inn tuh sak thua zah,

nythyanaw liate inn tuh atyn;

4 nynaw liate innkhaan hae tuh

aphutepaw te apuithyapaw

sisua hae khate phe a beih.

5 Mihawpaw tuh

a thawsaepaw laeze a thunghua,

nynaw a hoipaw tuh thawzung

a hoipaw laeze a thunghua;

6 pawccecize a haw hae paw

khuakhannaw liate

rhaw kha na tuk kho zah

tuanaw pyatu patae

a umnaw kya taenaw a um.

7 Mingaee hae hanlan

hawnaw tuh myaryamaw ahang;

khua koikua kya

byaho ngan khyh hae.

8 Hoyleinaw rae lan

a paccynkuhpaw tuh

vawsawnaw a raetu cite

ko athua cih.

9 Ngaeepaw khuakhannaw tuh

seinaw nynh thua,

sarya a mangpaw tuh

ccungccaw balyn hanlan

anungsikuhpaw nynh thua.

10 Vawsaw tung lya

na rhawthya zetuh,

na thawzung azya.

11 Chia lan a cciakhae hae paw kha

la luesah hae,

chia lan a cciakhae hae paw kha

la khum hae,

12 tuhte cyi leite nang nynh,

"E paw hynh ka nyh khyh,"

na ci lanze, tuh-e tuh

thinlung a nyhtupaw nynh

thaethya lan khyh tou?

tuh-e tuh nang kha

phang ae rintupaw nynh

nyh lan khyh tou?

Aning tuh ccungccaw balyn kha

mih cyisahnaw thyhte

a sangru cih hae paw thua khyh tou?

13 Ka ccaaw, khoitui kha niatua,

athuapaw nynh thua,

adaw kyate accawpaw khoitui tuh

na khalang kya a-epaw nynh thua.

14 Hawnaw tuh na hiinnaw hanlan

tuh-e hawte nynh thua cipaw nyh;

hawnaw na hoi zetuh,

na hanlan malang ccyh

ngaehoinaw a um cih zah,

na ngaehoinaw tuh roh lan khyh.

15 Ccungccaw hoyleipaw nynh

midingpaw inn kha

a dokhaw hawte la dokhaw nan;

midingpaw nynh

a umnawpaw hmin kha la ropah nan;

16 pawccecize midingpaw tuh

vae sari a khuliaku zemah

bua a thokuh cih;

thuasalama ccungccaw hoyleipaw tuh

vawsawnaw keiccuze a khuliakuh cih.

17 Na rhaw hae nynh a khuliaku hae ze,

na lungtua nan sah,

a thy a pawku hae zemah,

na lungpaw nan sah,

18 tuhkhyhze tuh Bawipaw nynh

tuh-e tuh a muih cih zah

a lunghoy lan khyh,

te a thinrianaw kha minmin kyate

a maeleihsei cih.

19 Hoyleinaw a rae hae paw keiccuze

na thinphang nan sah,

ccungccaw hoylei hae paw kha

eiung nan hae;

20 pawccecize ccungccaw

hoyleipaw tuh ngaehoi lanpaw

malang ccyh hoi khyh,

ccungccaw hoyleipaw

maeekhua tuh a chih cih.

21 Ka ccaaw, Bawipaw te

siapharan raw kha ritua,

minmin kaw kha la ngaetua;

22 pawccecize minmin kyate

ronaw tuh vaekheitmawte

yn thua cih, minmin nynh

a thuakhae kho hae paw

ronaw tuh hummou a nyh?

23 E hae hynh mah

ahaw hae paw bya nynh thua:

Byapianaw kyaze maedo tuh hoy khyh.

24 Ccungccaw hoyleipaw kha,

"Nang tuh miding nynh na thua,"

cite a hopaw tuh

ccungccaw hae nynh

thyalaw cih hae zah,

minphuin nynh a hua cih;

25 thuasalama ccungccaw

hoyleipaw kha pe zah

a thuiheipaw tuh a lungtua cih zah

ahoypaw hythuanaw kha a ccou cih.

26 Ahmepaw bya te khung tuh

ruiban hoy ccaccing thuanaw kha

a langsakuhpaw nynh thua.

27 Atolang khe na ryalaw kha

paccynku tua,

loo kyakhe namaw hanlan

atyn-are kha paccyn tytua;

tukoute na inn kha sakku tua.

28 Akonglang um lei pite

na innpaw kha rawsete

ccaekia lang tang nan,

na mung te hynbya ho nan.

29 "Milae nynh ka tungvaw

a cyi hawte milae tungvaw

ka cyihru cih; milae nynh

a cyi thyhte ka liaru cih,"

cite ho nan.

30 A thawnawpaw ccungccaw loo pe te

a ngaeepaw kya-e

misu khokhu pe khe

po ka cceih zah,

31 hinpaw nynh pong a po thin hae paw,

hinpaw ku nynh

laephi pong a bongpaw te

a lungrua atingpaw kha ka muih.

32 Te khah-e ka muihpaw kong kha

ka tua; ka do zah

thuiheinaw kha ka mue.

33 Sosoh na ih,

sosoh na ngawphukuh zah

kuih lepiakute sosoh

na haeung lyakhe,✝

34 ryachinaw tuh

miruh hawte thuasah,

hobounaw tuh zunghe ccyngkuhpaw

rhawkawpaw hawte thuasah

na tungvaw yn thua cih.