1 Ccaaw hae, nae paaw

thuiheinaw kha ngae oh lah,

nythyanaw na hoi kho nawlan oh,

hoyte ngae oh;

2 pawccecize ahoypaw

thuiheinaw kha kae pya oh,

tukeiccuze kae ccangpyanaw oh kha

vua nan oh.

3 Ka paaw ccapaw ka la thua zah,

ka nung mitmuihnaw kya

nevyalyapaw te a sungsah huapaw

ccapaw nynh ka la thua,

4 ka paaw nynh yn ccangpah zah,

"Ka bya hynh tynkaring lan kyngkuh;

ka kawbya hae hynh zui lah hiintua.

5 Hawnaw kha ccangku tua;

nythyanaw kha ccangku tua;

Ka khalang kya-e bya hynh ning nan lah,

maetawkuh nan.

6 Hawnaw kha vua nan lah,

nang kha ae thungkhaw cih;

hawnaw kha sungsah lah,

nang kha ae rin cih.

7 Masaty na ccangku lanpaw tuh

hawnaw nynh thua;

hawnaw kha ccangku tua,

na ccangku lanpaw balyn kyaze

nythyanaw kha ccangku tua.

8 Hawnaw kha aphutesah lah,

nang kha ae hangthung cih;

tuh-e hawnaw tuh na pompaeku lanze

sawtuanaw ae ccousah cih.

9 Hawnaw nynh apuithyapaw

haetapawsi kha na lu vawlan

ae khungsah cih; apuithyapaw

bawilukhung kha ae pya cih,"

a cipya.

10 Ka ccaaw, ka bya hynh ngae lah

lawku tua, na hiinshe asae cih.

11 Hawnaw laanpi kha

kae ccangpah vae zah,

dingnaw laanpi lang

kae cciakhae vae.

12 Na ccia ze, pawpaw nynh mah

ae khaw lan khyh zah,

na ccue ze thykute

na khuliakuh lan khyh.

13 Thuiheinaw kha

phang kyngkuh lah saw nan;

hoyte rintua, pawccecize tuh-e tuh

na hiinnaw nynh thua.

14 Ccungccaw hoylei hae paw

laanpi kya tee nan lah,

hoyleinaw a rae hae paw

laanpi kya cceihbua nan.

15 Tuh-e tuh sibia lah, zui nan;

tuin kyate maekuh lah, po cciatawtua.

16 Pawccecize minmin tuh

seinaw rae leite ih kho khyh hae;

lukhakheit kha khuliasaku leite

ih kho khyh hae.

17 Pawccecize minmin tuh

hoyleinaw looh kha ae hae zah,

puathonaw misutui kha a nia hae.

18 Thuasalama miding hae laanpi tuh

ninthu cia houhouh a awpaw

awkhua takaw e awnaw te nynh aloku.

19 Ccungccaw hoylei hae paw laanpi tuh

marae mohpaw te nynh aloku;

a khuliaku hae ze pawkyamou

kae thyku cipaw nyh khyh hae.

20 Ka ccaaw, ka bya hynh

hoyte ngae lah,

ka hopaw bya kalan hin

na nakaring kha tuaku tua.

21 Hynh-e hae hynh

na mitmuihnaw kyate zosah nan;

na thinlung kya ccykekuh hae.

22 Pawccecize tuh-e tuh

a muih hae paw hanlan hiinnaw thua zah,

mih pynsaw balyn dannaw nynh thua.

23 Na thinlung kha hoyte raeringtua,

pawccecize tuin kyate nynh

hiinnaw tuidy yn phyh.

24 Hynbya kha na khalang kyate

sungkuh lah, thyaruhnaw bya kha

na kyate ccaring vuatua.

25 Na mit nynh malang khe

lawbabin lan dosah lah,

na malang khe tahrarin lan

phang dosah.

26 Na ccu nynh a kawnaw laanpi kha

hoyte dokuh lah,

na laanccia balyn tuh hoyte

na cceih kho cih.✝

27 Voilang ranglang maekuh nan,

na ccu kha hoyleinaw kyate

maeleih tua.