1 Uktu bawi ryte aekheih lan

he na haung ze,

na malang umpaw kha

hummou athua cipaw hoyte la do,

2 eih a ae khopaw

ccungccaw na thua ze,

namaw te namaw kha

na lohtharue kyakhe

tangpaw kha nungde.

3 Uktu bawi kya-e

looh athuapaw kha duaa nan,

pawccecize tuh-e looh tuh

lingnawpaw looh nynh thua.

4 Hoirum khylan

eih reihkuh kaesy nan;

umtaw thya nawlan hawsakuh.

5 Na mit nynh hoirumnaw kha

he a do tuh, phe azo vae;

pawccecize vaawlui lang

a zoupaw mosi hawte

a sake kha daw kangmaw zah

a zouthya.

6 A sithahpaw kya-e looh kha ae nan,

a looh athuapaw kha duaa nan;

7 pawccecize na lohtharue kya

sangrua hawte athua cih.

"Ae lah niatua hei," ae cipah cih;

thuasalama tuhcite

ae hopya rypaw thua khyh.

8 Na ae vae paw looh

beihtaraw kha bua na loh cih zah,

na lungtuanaw bya kha

alakaw lan a tang cih.

9 Mingaee nynh a thaenaw khe

byaho nan,

na hopaw hawnaw bya kha

pawlangria lan khyh.

10 Langmawlya e syntawnaw

lungbing kha la nue nan,

ngawraw hae loo kha

la lua nan hae,

11 pawccecize minmin

a shawkhawtupaw tuh

a thawsaepaw thua zah,

nang kha rawsete

mih bya kha a pankhae cih hae.

12 Na thinlung kha

ccangpyanaw kalan khe

pyatua lah, na nakaring kha

hawnaw bya kalan khe tuaku tua.

13 Imua kha ccangpya leite um nan,

ccungngue te na bua ze,

chih lan khyh.

14 Imua kha ccungngue te na bua ze,

a hiinnaw kha michi khua kyate

na khumpaw nynh thua.

15 Ka ccaaw, na lunghaw zetuh,

kae mah ka lungtua cih.

16 Na mung nynh akyhpaw kha

a ho zetuh, ka lungtua cih.

17 Misei hae tungvaw

na eiung nan sah,

Bawipaw rawrite

zungzae la um.

18 Malang ccyh tuh

a um ccaccing keiccuze,

na ngaehoinaw kha

la zosah nan.

19 Ka ccaaw, ngae lah hawsaku tua,

na thinlung kha

akyhpaw laanpi kya zuisah tua.

20 Misutui myarya neih

hae paw ryte thuasah,

saw myarya ae kho

hae paw ryte thuasah

mungkuh nan oh;

21 pawccecize eih a neihpaw te

aepaw eih a ccopaw tuh

a ryachi accih cih,

myarya a ih khopaw tuh

boeining apuepaw kha

a lawkuh cih.

22 Nang ae saahpaw

na paaw bya kha ngae lah,

na nung kha he a taw vae ze

la theihrya nan.

23 Byaccing kha rekuh lah,

zua nan vae;

hawnaw, thuiheikunaw te

nythyanaw kha rekuh hae.

24 Midingpaw a paaw tuh

myaryamaw a lungtua cih;

ahawpaw ccapaw a saahkuhpaw tuh

a ccapaw tungvaw kya

a lungtua cih.

25 Na nung te na paaw kha

mih lungtuasah hae;

nang ae saahkuhnung

na nung kha a lungpawsah tua.

26 Ka ccaaw, na thinlung kha

yn pya lah, na mit nynh ka laanpi hynh

hoyte dokuhsah.

27 Pawccecize ohhuanung tuh

akhupaw hunghua nynh thua;

a ccouseikuhpaw zu tuh

abypaw tuisung nynh thua.

28 Damiah hawte ccungccaw kha

buhthya zah, a ccouseikuhpaw

pise kha a lungsah thung.

29 Hummou lungvawsaw te a um?

Hummou a ngaethah?

Hummou a pekuh hae paw um?

Hummou byalungnaw a hoi?

Hummou akonglang um leite

vaemaw a mue?

Hummou a mit sedadae lang a um?

30 Tuh-e hae tuh misutui khaw cia

neih hae paw, amynkhuhpaw te

pykuhpaw misutui a ccungpaw

ccungccaw hae kha nynh thua hae.

31 Banang lungkhu kya asepaw,

awrarih lan aw zah,

nawpali lan a luabungpaw

misutui kha la do nan.

32 Nyathyakou tuh hupaw hawte

khyhthya zah,

huparepaw hawte sy a hoi.

33 Na mit nynh paleihpanawpaw

uccaw kha a muih cih zah,

na thinlung nynh

tualitua-aepaw bya kha a ho cih.

34 Nang tuh rili ngaelung a ihpaw,

sanphalung kya boei zonawpaw

tung adungparyh kya

a ihpaw hawte na thua vae cih.

35 "Minmin nynh yn bua hae,

thuasalama ka ccisah khyh;

kae kha yn thung hae zemah

ka nyhkuh khyh.

Hohtuhmou ka thaekuh cih?

Ccangpaw niapaw kha

bua ka ccungkuh cih," cite na ho cih.