1 Misutui tuh saryanaw

a thuakhaepaw thua zah,

aruikuhpaw niapaw tuh

pekunaw nynh thua,

tuh-e liate a seipaw miakaw tuh

a hawpaw thua khyh.

2 Siapharan thinrianaw tuh

chindeih nynh a siapaw te nynh aloku;

a thin a riasahpaw tuh

amaw te amaw kha hiinnaw

a zosakuhpaw nynh thua.

3 Pekunaw kha a daesahpaw tuh

sawtua lan umpaw nynh thua,

thuasalama angaeepaw miakaw nynh

pekunaw kha a puisah.

4 A thawnawpaw nynh

leithue ccyh kya leithue khyh;

tukeiccuze loohrue ccyh yn thua tuh,

pawpaw mah mue vae khyh.

5 Ccungccaw thinlung kya

eenaw tuh akhupaw tui te nynh aloku;

thuasalama mihawpaw nynh tuh

khah-e tui kha a thekuh cih.

6 Ccungccaw patae nynh

a lungzipaw nynh ka thua cite

mimaw te mimaw kha a hoku hae,

thuasalama alungzipaw ccungccaw kha

hum nynh mou a muih kho cih?

7 Miding nynh dingnaw laanpi kya zui zah,

a ccaaw a no hae tuh

hythuanaw a ccou hae!

8 Byapianaw bawitungkhung kya

a haungpaw siapharan nynh

hoyleinaw balyn kha

a mit te pong a laesah thya.

9 "Ka thinlung ka thyaasaku vae;

ka seinaw kyate ka thyaa vae,"

cite hummou a ho kho cih?

10 Ahme leipaw khinlung te

ahme leipaw tounawpaw tuh

parouh mawte

Bawipaw hanlan

anungsikuhpaw nynh thua.

11 Imua nynh heize a cyipaw kha

acci te cci khyh,

ahme te hme khyh kha

a cyisahnaw khate

amaw toulou nynh a langsaku.

12 Thaenawpaw nakaring te

muihnawpaw mit hynh

parouh mawte Bawipaw nynh a rae.

13 Ipaw kha sungsah nan,

tuhkhyhze tuh na ryachi cih;

na mit kha na dae zetuh,

looh patae na hoi cih.

14 A retupaw nynh,

"Hoy khyh, hoy khyh," a cithya,

oute cceih zah a poku.

15 Sui a um, amee rupaw lung mah

patae a um,

thuasalama hawnaw bya tuh

amee myarya rupaw nynh thua.

16 Ny leipaw ccungccaw elang

aamah a khanpakuhpaw kya-e

boeining kha kyngpah;

ny leipaw ccungccaw hanlan

aamahkhan lante pya athuapaw

ponpaw uccaw kha kyngpah.

17 Hynhute muepaw looh tuh

athua zemah,

a aetu khalang kya

lungpyng te phe abeih cih.

18 Tuanaw pyakupaw kha lawku liate

paccynkunaw tuh atyn;

Ahawpaw cciakhaenaw

a um ze kyalya rhaw na tho cih.

19 Thanrynaw nynh byaru kha a phy;

tukeiccuze bya kathuhkaleih

a hothyapaw khate

la mungkuh nan oh.

20 A nung te a paaw kha

thya a lawpaw tuh

mohkaraepaw kyakhe

a maeekhua tuh a chih cih.

21 Arangte muepaw rho tuh

athangnaw kya hythuanaw um lan khyh.

22 "Hoyleinaw kha ka liaru cih,"

cite la ho nan;

Bawipaw kha ngaw lah,

amaw nynh ae bawm cih.

23 Khinlung laesahnaw tuh

Bawipaw hanlan

anungsikuhpaw thua zah,

ahme leipaw zawccu tuh hoy khyh.

24 Ccungccaw a cciakhaetupaw tuh

Bawipaw nynh thua;

ccungccaw nynh a laanpi kha

pawtemou a nyh kho cih?

25 "E tuh Pachia hanlan athyaa,"

cite rangkhirangkhaete ho koute

nyalangte bua tuaku thui tuh

byakinkunaw a raetu hanlan

kaang hawte nynh thua,

26 Ahawpaw siapharan nynh tuh

ccungccaw hoylei hae paw kha

ccangkung vawte vaw hae zah,

leccu te a tousah thin hae.

27 Ccungccaw thinlung tuh

pyn lungkhu umpaw balyn kha

akaw-aleih a ccungpaw

Bawipaw maeekhua nynh thua.

28 Lungzinaw te zyn lan umnaw nynh

siapharan kha thungkhaw zah,

dingnaw nynh

a bawi haungnaw kha a tynsah.

29 Mino hae phu-enaw tuh

mih thawzung nynh thua,

ataw hae paw puithyanaw tuh

mih sangpaw kha nynh thua.

30 Vaemaw kha accih lante

singpya liate ahoy leipaw kha athyaa;

ziaku buakunaw nynh mah

pyn lungkhu e hae kha a thyaasah.