1 Elkosh khuapaw Nahum nynh Nineveh khua konglang a muihpaw vizin ccauh.✝

2 Bawipaw tuh a eiungpaw te

phulaw a mangpaw Pachia nynh thua,

Bawipaw nynh phulah hae zah

myarya a thinria;

Bawipaw nynh amaw a rawsetu hae kha

phulah hae zah,

a rhaw hae tungvaw myarya a thinria.

3 Bawipaw tuh a lungsae,

thuasalama a huhan myarya ale,

Bawipaw nynh a sei hae paw kha

detah leite cciasah lan khyh hae.

Bawipaw tuh khiccung te

khise kya cceih zah, maeking hae tuh

a ccukaw umpaw vuiping nynh thua hae.

4 Rili kha pe zah a rousah,

vaw hae balyn kha

a kansah hae;

Bashan mua te Karmel mua tuh

rou hae zah,

Lebanon haetapaw hae tuh

anaan hae.

5 Amaw malang khe mua hae tuh

hy hae zah, sangpyng hae tuh

atui hae; amaw malang khe

laephi tuh hy zah,

laephipi te a vawlan

um hae paw balyn tuh ahy hae.

6 A thin-unaw malang khe

hummou a thadyn kho cih?

A thinrianaw kha hummou

a ngaesang kho cih?

A bungpawnaw tuh maee hawte rua zah,

a malang khe lung hae tuh

zoihtatyh lan akoi hae.

7 Bawipaw tuh ahoy,

vawsaw tung ccyh lya

khynnaw hmin nynh thua;

amaw kya a rekuh hae paw kha

thungkhaw hae zah,

8 tuileih athopaw kya mah

a thungkhaw hae.

Amaw a rawse hae paw kha

khaleih a thangsah cih hae,

a rhaw hae kha amohnaw langkhe

a deehui cih hae.

9 Pawkeiccumou Bawipaw kha

rawsete na paccynnuaku?

Aning nynh nang kha ae thangsah cih;

amaw a rawsetu hae tuh

vae ning thokuh lan khyh hae.

10 Hinpaw ku hawte khelekuh hae zah,

samaw ruipaw hawte a rui hae;

ccatanphue aroupaw hawte

maee nynh phe ccung lan a u hae.

11 Pou Nineveh, Bawipaw kha rawsete

ahoy leipaw a paccynnuakuhpaw,

ahoy leipaw tuanaw pyatu kha

na kyate a langkuh vae.

12 Bawipaw nynh hynhte a ho,

"Assiria hae tuh thawzung te

phe beih hae zah milu alung hae zemah,

vua athua cih hae zah azo cih hae.

Nanning kha vawsaw

kae la teingsah oh zemah,

atu te vawsaw kae pya vae lan khyh oh," a ci.

13 Assiria nynh ae puihsah oh paw

a puihnawpaw ccong kha

kae khyapah cih oh zah,

ae heedenaw oh paw arui kha

kae paepah cih oh.

14 Nanning te asekuh lante

Bawipaw nynh kaw a thopaw tuh:

"Na min a tynsah lanpaw

ciihan um vae lan khyh;

na soiikupaw te na laeekupaw

zohtuh hae kha

na pachia hae inn kyate ka roh cih.

Nang tuh ccungkiapaw na thua vae khyh,

tukeiccuze shawku kae raepah cih," a ci.

15 Thehoypaw yn phupaw te

daenaw kong a phypaw

mua vawlan e ccungccapaw ccu khuh

dotua oh!

Pou Judah, na poi kha tua lah,

bya na kinkupaw kha ccingsah tua,

pawccecize ccungccaw hoyleipaw nynh

nang kha teenuate ae thiing vae lan khyh;

minmin kha khaleih ro athua vae hae.✝