Mi'shinkǝn 25

Bulus Tǝla Shilǝn kina ɗǝ Kaisal

1 Nǝ Pestus mbǝ’ci ge' atlwasu, Kal ki mutti maki i' za' Kaisaliya illǝ Ulshelima, 2 Iki i bas lǝɓasi nǝ mi’kina ki Yahudawa is tǝla shilǝn ki Bulus ma’ti. Is bǝl Pestus bi 3 tǝ' ɗǝlsi, sǝm mbǝl Bulus a Ulshelima, amma is kǝndi tǝ gen hwun tǝn shitu gaki sǝ' tloti. 4 Amma i Pestus ndǝgi i' usu, "Bulus ki i dle Akaisaliya, ami nǝ gayini ami lyab lǝti tyaka ge' muttuni. 5 Hwe tǝ na mi’kina wakǝn mbǝ ne' kǝni, in a mbi mullisi nǝ lati asǝn giɓi u as mbǝl shilǝn wasi." 6 Pestus a ngǝtl mutti usǝpsi ko kutl a tine’siwai, i lǝ Kaisaliya. Lucili i' totǝn kundǝn guntwasi, illaki sǝm mbǝl Bulus a kina ɗa’ka. 7 Nǝ Bulus tette' giɓi u, I Yahudwa ginǝ mbǝ te' Ulshelima i is gadǝl ti galgal. Asi mbǝtl shilǝn dimɓǝli tǝnti besni, gini sima bǝs Mani wai u. 8 I Bulus dlǝli gawasi: i' usu "Amiɓo a lew nǝ zhil ki Yahudawa wai ko libi ki Lya ko Kaisallwai." 9 Pestus, ne gaki ngau hwol hwula ma' Yahudawa, i' ul Bulus su, kǝn ndǝ’ti ki’su Ulshelima sǝp pǝli shilǝn a kina ɗaka tǝn usi nǝsi zi’ki gawa?" 10 I Bulus usu: "Nǝgun u ki dlǝli ami ɗa abidla shilǝn ki Kaisal, a ge’lu unǝ mbuni tǝ pǝli shilǝn ɗa u. A pǝli Yahudawa ulǝn wai, ki gawagi ki mani nǝguɗa. 11 In lati asǝn gibi i u atala tlotu, ai, a kǝn dlali mǝshtwai. Amma in bal shilǝn nisi ɗa tǝn ulnǝ si ngauti tǝn kǝn u wai u, to mul bǝtl Yahudawa ami ɗawai. Ya ngayi tǝ mbǝl' shilǝn ini a kina ɗǝ Kaisal!" 12 Kalkǝ shilǝn ki Pestus ne' mi’dlǝdl shilǝn wasi, indǝgi i' usu, "To ka ngayi tǝ tala shilǝn wa' kina ɗǝ Kaisal. To ma' Kaisal kǝn ki’lǝ!"

Bulus akina ki Agalipa nǝ Banis

13 Nǝ tlǝp mutti tenngulen u, i Guu Agaliba nǝ Banis is mbǝ Kaisaliya gaki sǝ' uli Pestus ɗem. 14 Is lǝm mutti tyaka diɓǝlu, iki i Pestus dlǝm shilǝn tǝn Bulus isǝ Guu. I' usu: "Mulǝn aki gunǝ Pelis za’ti ge’lu ki ndǝ mbalǝn. 15 Na lǝ Ulshelima u, i bas laɓasi nǝ kolsisi ki Yahudawa is mbǝl shilǝn tǝnti, is usu ta poci' shilǝn. 16 "Amne ya ulsisu Lomawa aku ɗǝ pǝlt guwai, tǝ’zi mul lati asǝn giɓi ɓatltwai, gaki tǝla' mulǝn ɗǝ hwol tugwai, sai nǝti nǝ mi’pǝlti nǝ shilǝn sa mbǝ sa makina ɗǝ pǝtl shilǝn, ammbi abmbun gawas tǝn shilǝn u nǝs mbǝli tǝntu. 17 Nǝs mbǝ kummwasǝn u, a dǝmbǝl shilǝni wai, citl ki lu ya totǝn kundǝn guntini ya bǝl zhil sǝm mbǝli mulisi. 18 Nǝ mi’ship shilǝn hilya u, a kum bezǝn shilǝn u nǝ a la’mbadli sǝn dlǝmti tǝn tuwai. 19 Sai hwu’shilǝn yen kǝn sǝ mbǝlli tǝnti tǝn bǝtl Lya wasǝn, nǝ mulǝn kise Yesu, gunǝ mǝcu, amma i Bulus dlǝl katl tǝn ta mǝcuwai. 20 Amine a hol kan unǝ ta bǝl gǝs ki shilǝn u ɗa u i: Ya usu ko tǝn suti Ulshelima gaki sǝ' pǝllit shilǝn swaka. 21 Amma i Bulus ngayi sǝ' dlǝl shilǝn wasi, i Augustas ya shilǝn nisi, iki ya bǝl zhil sǝ' idlati sai gasi u nǝ a taki Kaisal ti u." 22 I Agilipa ul Pestus su, "Ami gayi ma ami lyap kup ulnǝ tǝ mulu dlǝmi u." I Pestus usu Akyeu kǝn kubti."

Bulus akina ki Agilipa

23 Nǝ citl kǝlu Agilipa nǝ Balniki is mbǝ age' naltwasǝn ki gunti is te’ge' kǝs ki dlǝl shilǝn ne' mi’kina ki dlati nǝ bas mbalǝn kige' gatli. I Pestus, bǝlsi zhil sǝn mbǝl Bulus. 24 I Pestus usu, "Guu Agilipa, nǝ mus mbalǝn i nǝ ne' mini u, kǝn ɗǝ ye' muluwa gunǝ Yahudawa mbǝl shilǝn was a Ulshelima nǝ a ki a Kiasaliya, asi matltti ambuni tǝzati tǝ' dǝm tǝn diwai. 25 A yen ulnǝ' pǝli i a kǝmmǝsh tuwai, tun nǝ ti nǝ gawas kǝn tǝ ngauyi sǝ' palshilǝni akina ki Augustas, ya usu an takkitki tiswai. 26 Amma ulǝn niɗa gunǝ ta laci mul ban ini gawa suwai. Tǝn gaki nǝgu ambǝlti kina wakǝn ɗa, nǝ akina ɗa’ka Guu Agilipa, ko gaki kal ki gyepti an ammbi ulnǝ talaci u. 27 Tǝn yati ini, ndokkǝkkǝni tǝta' mul ki kǝndi bǝnǝ mbitti nǝ ulnǝ' pǝli uwai."