10 Milagres de Jesus na Bíblia: Lista com versículos e explicação

Lihungu lya kutola muinyi lya Kana

1 Kigono kya udatu kukali na lihungu lya kutola kumwani va Kana inyi lya ku Galilaya. Maye vake Yesu akali pala. 2 Yesu pamwi na vachulila vake vakalalikwe mulihungu lila lya kutola. 3 Difwayi peisilile, maye vake Yesu akamlongie Yesu, "Vanu vahela difwayi!"

4 Yesu akamuhigile, "Maye ubihile kunilongela kinu kya kugita, saa lyangu yave kufika."

5 Maye vake Yesu akavalongiye vala vanyigendwa, "Kyokyonda kyekuvalongela, mgite."

6 Baho, pakali na fiviya sita fitengeneswe kwa maganga. Fiviya fyefivikwile na Vayawudi ngita pevachoviye, kwakuva lya kuvikila malenga gya kwing’alila. Kila kiviya kimwi kimemechwa ndowo chivili awu chidatu gya malenga. 7 Yesu akavalongiye vala vanyegendwa, "Mmemeche fiviya malenga." Navo vakamemecha topu. 8 Baho, Yesu akavalongie, "Nondee mnege malenga, msindikile mkomi va lihungu." Vakagitile ngita pevalongilwe, 9 mkomi va lihungu peagechile ago malenga, gyegagalambuke kuva difwayi. Mwene seakachele yila difwayi ihumile kwiya, ila vala vanyingendwa yevanegile malenga vakachelile. Suwe, mkomi va lihungu akamkemela yeitola, 10 akamlongiye, "Kila munu ihecha tandi difwayi nofu, pevigwita vagenji kunyuwa uvika yila yesenofu. Ila veve uhivikile difwayi nofu mbaka nondee!"

11 Yesu akagitile kimanyilo iki kya kwanja ukoya mwani va Kana, inyi lya ku Galilaya, akawonisa ukomi vake na vachulila vake vakamdikile.

Yesu ekumnanicha munu yeababilwe abofwike meho

1 Yesu peakali ichumba amuwonile munu yumwi, abofwike meho kuhuma pebabilwe. 2 Vachulila vake vakamuhucha, "Muwulanichi! Ndiani yeagitile sambi, munu uyu awu vala yevambabile?" 3 Yesu akahigile, "Uyu seagitile nongwa na vala yevambabile sevagitile sambi, ila ababilwe abofwike meho neke ludali cha Nguluvi iyonike ikigita kasi mugati lyake. 4 Kukiva ave palumie tuendelise kugita kasi cha yula yeandilagiliche, kwakuva pamie ukwacha munu seiwesa kugita kasi. 5 Pendave muinyi, nene ndi welu va inyi." 6 Peamalile kulonga ago, akafunya miti panyi, akahanganise na uganga likahumila lidope, akambaka yula yeabofwike meho muwuso, 7 akamlongie, "Helele ukakalave mulitanda lya Siloamu." Siloamu mana lyake ndi "Yealagilichwe" Baho yula yeabofwike meho akahelela, akakalava wuso, akawuya kuno akilola.

8 Vala vapepi vake na vala vevamuwonile pamwandi kuva muhangala, vakalonga, "Uyu munu seyula muhangala yeakali akwikala kuno akivasuka vanu?" 9 Vanu vamonga vakalonga, "Uyu mwene." Vangi vakalonga, "Semwene ila awanine na mwene." Ila yula yeabofwike meho akalonga, "Ndi nene!"

10 Vene vakamuhucha, "Nondee meho gako gadindwike wuliwuli?"

11 Mwene akahigila, "Yula munu yeakemelwa Yesu akayangasile uganga, akanibakile mumewo na akandilongie, helele ukakalave wuso mulitanda lya Siloamu. Baho, ndikahelela ndikakalava bahobaho ndikavanga kuwona."

12 Vakamuhucha, "Munu uyu agehe kwii?"

Mwene akavahigile, "Nene sendichela!"

Yesu akuvagavila kyakula vanu elufu chihanu

13 Yesu peapulike njowo chechimuhumile Yohani mbatisa, akahegile pono ipo kwa wato, akahelela pono pekwihela vanu. Ila vanu vakapulike njowo icho, vakamfwatile kwa kugenda kwa magulu kuhuma mimwani. 14 Suwe, peikile kwivindi, akavawene vanu volofu hilo, akawaonela lusungu, akavananiche matamwa gyawo.

15 Peifikikle palumiye, vachulila vake vakamuheleliye na vakamlongiye, "Pono ipa ndi kudasi na muda usilile. Suwe, uvalage vanu neke vahelele mufijiji vakagule kyakula kyawo." 16 Yesu akavalongiye, "Mubihile kuveleka vahege, muvagavile nyenye kyakula." 17 Ila vawo vakamlongiye, "Tugehe na mibumunda gihanu na somba vavili hela." 18 Yesu akavalongiye, "Muniletele baha." 19 Akavalongiye vanu vakale pasi mumisoli. Baho, Yesu akanyamula gila mibuminda gihanu na somba vavili, akalolile kuluhano akavifunyila na kuiketula gila mibumunda, akavagavile vachulila vake mibumunda igo na vachulila vake vakavagavila avo vanu. 20 Vanu vonda vakaliye, vakagwita na vachulila vake vakalundasa fyevisigaliye vakamemiche findilu kumi na chivili. 21 Vanu vevaliye vakali vagosi elufu chihanu, ila vadala na vana sevavalilwe.

Yesu epolecha lidaba

35 Kigono kikila palumie, Yesu avalongie vachulila vake, "Tuagame tuhelele kumwambo lya lihiva." 36 Suwe, vakaleka lila lipinga lya vanu, Vachulila vakaingile muwato peagehe Yesu vakahelela pamwinga. Fifila miwato gingi gimfuatile. 37 Suwe, likala likomi likavanga kupuga, madaba gakaitove ula wato likavanga kuingicha malenga mugati muwato. 38 Yesu akali kumbele muwato, akiva agonile pakyanya lya msegamo. Vachulila vake vakamlamuse na kumlongela, "Muwulanichi, seulola kuva nefwe twisaka kufua?" 39 Yesu akalamwike, akalikanie ula likala na kuyalongela madaba, "Chike! Leke" Baho lukala gikachikila na kukasigala jii. 40 Pambele Yesu akavalongie vachulila vake, "Wuli mwikogopa? Be, mwave mwihela mbatwa hela?" 41 Navo vakakogwipe mno, vakava vekwihucha, "Uyu ani? Hata lukala na madaba gikumpulika!"

25 Baho pakali na mdala yumwi yeakali na utamwa va luholovela kwa myaka kyumi na givili. 26 Mdala uyo akali agudile hilo kuhelela kwa vaganga volofu. Na kusinda mali chake chonda, ila aponile hamu, ila endelie kutamika hilo. 27 Akali apulikile njowo lya Yesu, akachumbile lukekeno lya vanu kuhuma ku mbele, na kukolela mwenda gya Yesu, 28 kwakuva elongie munumbula lyake yumwene, "Ngita ndivesa kubyalisa mwenda vake, dandinana." 29 Peabyalise mwenda va Yesu, luholovela ikalekile kuhuma na mwene awonile mvili vake uponile. 30 Bahobaho Yesu achele kuva ludali chake chimponyile munu. Suwe akausedukila wula lipinga lya vanu, akaucha, "Ndi ani yeabyalise mwenda gyangu?" 31 Vachulila vake vakamuhigile, "Wiwona kuva vanu vakwikeng’eneka, wuli wiucha ndi ani yeakubyalise?" 32 Ila Yesu endelie kulola neke amlole nde ani yeabyalise. 33 Mdala yula achele njowo chechimuhumie, iwonise kuno itetema kwa wogofi, afugamile pautalo pa Yesu na kumlongela undakyene vonda. 34 Yesu kamlongela, "Muhinja vangu, mbatwa lyako ikuponyile. Helele kwa utengamaso, na uponile hilo utamwa vako."

Yesu akumnanicha munu munya lihoka

1 Yesu na vachulila vake vakahagame kumwambo lya lihiva lya Galilaya, pa inyi lya Vagelasi. 2 Baho Yesu peikile muliwato, katang’ana na munu yeaumile kumgunda lya Nguluvi. Uyu munu akali na lihoka. 3 Munu uyo figono fyonda akali akwikala kumgunda va Nguluvi vala kuhela munu yeivesa kangi kumuhopa ata kwa ndegei cha kyuma. 4 Kwa figono fyolofu vakali vakumuhopa pingu mumawoko na magulu kwa ndegei cha kyuma, ila akali akichidumu. Na pakali kwahela munu yeali na ludali lya kumkanila. 5 Pamunyi na pamie akali akwikala kumgunda va Nguluvi na pafidunda, na kutova kyowo na akwiketulaketula na miganga. 6 Peamuonile Yesu kwa kutali, akamnyilie, na kumfugamila pautalo pake, 7 kamkemela kwa lichwi likomi akilonga, "Yesu, Mwana va Nguluvi yeagehe kukyanya mno! Ukela liki kwa nene? Ndikusuka Kwa litawa lya Nguluvi, bihile kuniguda!" 8 Kwakuva Yesu akali amlongile, "Veve lihoka, muhege munu uyu!" 9 Pambele Yesu akamuhucha, "Litawa lyako ani?" Akamhigile, "Litawa lyangu, ‘Lipinga’ Kwakuva twigehe volofu." 10 Pambele endeliye kumsuka Yesu abihile kuvadaga avo mihoka mu inyi yila. 11 Pepi na baho pakali na lipinga likomi lya vangubi vikwamilwa pa ligema lya kidunda vakali vakuli. 12 Suwe, havo mihoka vakamsuka Yesu vakilonga, "Utusindike kwa vangubi hava na utuleke tuvaingile." 13 Yesu akavahamulise na mihoka vakamuhumile yula munu na vakavaingie vala vangubi. Lipinga lyonda lya vangubi elufu chivili viikile pa lingema hadi pa lihiva viingie mu malenga na vafuwe. 14 Vanu vevali vikwamila vala vagubi vakanyila, na kuvalongela vanu njowo chila, mumwani na kumgunda. Vanu vakahelela kulola gila gyegihumie. 15 Vakafikile Yesu, vamuonile munu yula yeakali na fipuga lya mihoka ekalile panyi, afwalile myenda gyake na luhala lyake umuwuyile, vanu vonda vakahogwipe. 16 Vanu yevawonile njowo lula, vakavalongie vanu vangi njowo lwelumuhumie munu yula yeakali na mihoka na njowo cha vagubi vala. 17 Suwe vanu vakavanga kumsuka Yesu ahege pa inyi lyawo. 18 Yesu peakali akang’ala muwato, munu yula yeakali na mihoka kamsuka Yesu ahelele pamwinga nave. 19 Ila Yesu kamkanila. Na kumlongela, "Helele kukaye kwa vakolo vako na kuvalongela njowo chonda cheakugitile Mtwa na namuna peakuonile lusungu." 20 Suwe, munu yula akahelele, akavanga kuhumulila njowo chonda cheamgitile Yesu ukoya Dekapoli mana lyake inyi gyenye mwani kumi. Na vanu vonda vakadudwive.

Yesu akumuponya muhinja va Yailo na mdala yumwi

21 Yesu peahagame kangi paubali lwa pili lya lihiva lya Galilaya kwa wato. Lipinga likomi lya vanu palutalo lyake, nave akava ahemile mung’umbu lya lihiva. 22 Munu yumwi yekali mkomi va kaye lya kutang’anila Vayawudi, litawa lyake Yailo, akahelela kumlola Yesu, peamuonile Yesu, akafugamile pautalo lyake, 23 akamsuka Yesu akilonga, "Muhinja vangu mtamwa epepi kufuwa. Chondi tuhelele, ukamvikile liwoko lyako, neke apatile kuponila na kwikala." 24 Suwe, Yesu akahelela pamwinga na Yailo. Vanu volofu mno ukamfuatila, vakali vakumkekeneka kila lubali. 25 Baho pakali na mdala yumwi yeakali na utamwa va luholovela kwa myaka kyumi na givili. 26 Mdala uyo akali agudile hilo kuhelela kwa vaganga volofu. Na kusinda mali chake chonda, ila aponile hamu, ila endelie kutamika hilo. 27 Akali apulikile njowo lya Yesu, akachumbile lukekeno lya vanu kuhuma ku mbele, na kukolela mwenda gya Yesu, 28 kwakuva elongie munumbula lyake yumwene, "Ngita ndivesa kubyalisa mwenda vake, dandinana." 29 Peabyalise mwenda va Yesu, luholovela ikalekile kuhuma na mwene awonile mvili vake uponile. 30 Bahobaho Yesu achele kuva ludali chake chimponyile munu. Suwe akausedukila wula lipinga lya vanu, akaucha, "Ndi ani yeabyalise mwenda gyangu?" 31 Vachulila vake vakamuhigile, "Wiwona kuva vanu vakwikeng’eneka, wuli wiucha ndi ani yeakubyalise?" 32 Ila Yesu endelie kulola neke amlole nde ani yeabyalise. 33 Mdala yula achele njowo chechimuhumie, iwonise kuno itetema kwa wogofi, afugamile pautalo pa Yesu na kumlongela undakyene vonda. 34 Yesu kamlongela, "Muhinja vangu, mbatwa lyako ikuponyile. Helele kwa utengamaso, na uponile hilo utamwa vako." 35 Yesu pehave eywanga, vachile vanu kuhuma kaya lya Yailo, mkomi va kaye kukutanila Vayawudi. Vakamlongie Yailo, "Muhinja vako afue suwe. Wuli wikwendelela kumusumbula Muwulanichi?"

36 Ila Yesu peapulike gevaywangile akabedile, Akamlongiye yula mkomi va kaye lya kutang’ala Vayawudi, "Bihile kwogopa, mbatwa hela." 37 Yesu akavalongela kuhela munu yeyonda kulongocha na mwene, ila Peteli na Yakobo na Yohani na lukolo vake Yakobo. 38 Pevafikile kaya kwa Yailo yumwi vakomi va kaye lya kutang’anila Vayawudi, Yesu awene kudadavila akapulike vanu vivemba na kukivilicha. 39 Yesu akaingila mugati, akavalongela, "Wuli mwigita madadavila na kuvemba? Mwana seafue ila avasile hela!" 40 Ila vene vamuhekile kwakubeda, ila mwene akavahumicha vonda kwivala. Kavanyamula daada na maye va mwana yula, pamwinga na vachulila vake vadatu, vakaingila mugati yeagehe mwana yula. 41 Yesu akaukolela liwoko lya mwana yula, akamlongie, "Talitha, komu!" Mana lyake, "Muhinja, ndikulongela, lamwike!" 42 Bahala pala muhinja yula akalamwike na kuvanga kugendagenda. Muhinja yula akali na myaka kumi na givili. Vanu pegavawonile hago vadudwive hilo. 43 Ila Yesu kavakanila vabihile kumlongela munu yeyonda njowo hichi chechihumile. Pambele kavalongela, "Mgavile muhinja yula kyakula."

Yesu igenda pamalenga

22 Suwe, Yesu akavalongile vachulila vake vakang’ale muwato valongole kuhelela kumwambo lya lihiva, mwene akali akuvalaga vanu. 23 Peamalile kuvalaga vanu, akahelela weka kukidunda kufunya. Peifikile palumiye, Yesu akali ukoya yumwene, 24 na chipindi ikyo wato ukali uhelele pepi na ng’umbung’umbu lya lihiva, ila kukali na utumama kwakuva lukala ukali upuga wato. 25 Pamiye pepi na kukiya, Yesu akavaheleliye vachulila kuno igenda pamalenga. 26 Vachulila vake pevamuwene igenda pamalenga vakaogwipe hilo, vakalongile, "Lingasaga!" Vakatovile kyowo kwa uwogofi. 27 Bahobaho Yesu akavalongile, "Muchike, ndi nene. Mubihile kwogofya!" 28 Peteli akamlongiye, "Mtwa ngita veve ndakyene ndongele ndigende pamalenga ndache kwa veve." 29 Yesu akalonga, "Wache." Suwe, Peteli akaikile muwato, akagendile pamalenga akahelela kwa Yesu. 30 Ila peauwene lula lukala, akaogwipe, akavanga kudibala, akavembile, "Mtwa, unitange!" 31 Suwe, Yesu akakonjolala liwoko lyake, akamkolela na kumlongela, "Veve ugehe na ludikilo ludodo! Wuli, ukaogwipe?" 32 Suwe, vakakang’ala wato na lukala ukaleka kupuga. 33 Vonda vevakali muwato vakamgundamila, vakalongile, "Ndakyene veve nde Mwana va Nguluvi."

Yesu akumnanicha munu munyalugaso

1 Pefichumbile figono fidodo, Yesu awuyile Kapelinaumu na vanu vapulike kuva agehe pakaye. 2 Vanu volofu vamemile hilo mugati ata fwasi ikali kwihela, mbaka kwivala pamlyangilo. Yesu akali akuvadalikila njowo chinofu cha Nguluvi, 3 Baho vafikile vanu vatai, vamnyamue munu munyalugaso vakamsindike kwa Yesu. 4 Kwakuva lipinga lya vanu likali likomi vakalemwile kumsindika kwa Yesu, vatobuwe pono pa kitufili yeigehe pakyanya pono peagehe Yesu. Pevapatile pono, vakamkwisa yula munu akiva avasile pa kitefu. 5 Yesu pealolile ludikilo lyawo, akamlongie munu yula munyalugaso, "Mwana vangu, ulekilwe sambi sako." 6 Vamonga va vawulanichi va malagicho pevali vikaliye pala vakahocha mnumbula chawo. 7 "Wuli munu uyu ilonga ifyo? Ekumliga Nguluvi! Ndi ani yeiwesa kuvalekela sambi, ila Nguluvi yumwene?"

8 Baho, baho Yesu akachele mahocho gyawo, akavalongela, "Wuli, muhocha ndeni munumbula chenu? 9 Njowo liki lipefu hilo, kumlongela munu uyu munyalugaso, ‘Ulekilwe sambi chako,’ awu kumlongela; ‘Wime tegule litefu lyako ubite?’ 10 Nondee ngamchela kuva Mwana va Munu anago umwimike va kuvalekela sambi chawo muinyi. Baho Yesu akamlongiye yula munu munyalugaso." 11 "Ndikulongela wime, tegule kitefu kyako uwelele kukaye lyako!" 12 Yula munu munyalugaso akawime, akategula kitefu kyake akagenda pautalo pa vanu vonda pevilola njowo lula lukavaduduvile vanu vonda, vakamnjuma Nguluvi, vakilonga, "Tukali setupatila kowona njowo ngita yili haa!"

Kufua kwa Lasalo

1 Suwe, kukali na munu yumwi litawa lyake Lasalo, mwenekaye va ku Betania, akali mtamwa. Mwani va Betania kikali pono pevakali vakwikala Malia na Malita, vahacha vake. 2 Malia ndi yula yeambakile Mtwa mafuta ga manung’ililo na kumfyangusa magulu gyake kwa fwili chake. 3 Suwe, vahacha vake Lasalo Malia na Malita vakalagiliche unanzi kwa Yesu, vakalongile, "Mtwa, mganja vako Lasalo mtamwa!"

4 Yesu peapulike njowo icho, akalongile, "Utamwa ugu, sevakumdocha Lasalo, ila dauguvagita vanu vamnjume Nguluvi na kuchumbila ago Mwana va Nguluvi kange dainjumwa."

5 Yesu akavakelie hilo Malita na vakolo vake, Malia pamwi na Lasalo. 6 Suwe, Yesu peapulike kuva Lasalo itamika, akahongeliche kukala pono baho kwa figono fivili. 7 Suwe, akavalongela vachulila vake, "Tuhelele kangi muinyi lya Yudea!"

8 Vachulila vake vakamuhigile, "Muwulanichi! Chipindi kidodo hela kichumbile Vayawudi vakasakile kukutova na maganga ukoya. Wuli, wisaka kuhelela kangi ukoya?"

9 Yesu akahigile, "Wuli, masaa gya pamunyi se kyumi na chivili? Ndeni, vala vevagenda pamunyi, seawesa kwikwambadula mgulu vake kwakuva vilola welu va muinyi iyi. 10 Ila munu yeigenda pamie akwikwambadula kwakuva welu kwihela." 11 Yesu peakali ilonga ago, akaendelela kuvalongela vachulila vake kuva, "Mganja vetu Lasalo avasile, ila ndihelela kumlamsa."

12 Vachulila vake vakamuhigila, "Mtwa, ngita avasile tulo, dailamka."

13 Ila vachulila vake vakahochile kuva Lasalo avasile tulo, Yesu akali ilonga kuva Lasalo afuwe. 14 Suwe, Yesu akavalongie undakyene kuva, "Lasalo afue, 15 ila nene ndikeduka kwakuva sendikali ukoya peafue Lasalo, neke nyenye mpatile kunidikila. Suwe, tuhelele kwa Lasalo."

16 Suwe, mchulila yumwi litawa lyake Tomasi yevakamkemela Pacha, akavalongela vachulila veyage kuva, "Tuhelele na nefwe, neke tukafue pamwi nave!"

Yesu nde akuvachulubula vanu kuvagavila uwumi

17 Yesu pafikile ukoya akawene likabuli, lyeakawekilwe Lasalo kwa figono fitai. 18 Kijiji cha Betania ukali pepi na ku Yelusalemu, utali vake ukali ngita kilomita chidatu. 19 Vayawudi volofu kuhuma Yudea vakachile mukijiji kya Betania, kuvanamacha Malita na Malia kwakuva lya kivembo cha maama vawo.

20 Suwe, Malita peapulike kuva Yesu ikwacha, akahelela kumuwanuka, ila Malia akasigalile mukaye. 21 Malita akamlongie Yesu, "Mtwa, ngita ngauvechile baha, maama vangu ngaseafua! 22 Ila ata nondee ndichela kuva kyokyonda dakyeumsuka Nguluvi, daakugavila."

23 Suwe, Yesu akamuhigile, "Maama vako daachulubuka na kuvecha uwumi kangi."

24 Malita akamuhigile, "Ndichela kuva daichulubuka chipindi vanu dapevichulubuchwa, mukigono kya mwiso."

25 Yesu akamlongie, "Nene ndi yendichulumbucha vanu na kuvagavila uwumi. Yeakundidikila nene ata ngita afua daikwikala kangi. 26 Na munu yoyonda yeikwikala na kundidikila, seafua mbepali. Wuli, veve ukugaidikila aga?"

27 Malita akamlongie, "Ndakyene Mtwa! Nene ndidikila kuva veve ndi Kilisito, Mwana va Nguluvi, yula yeachile ku inyi."

Yesu ivemba

28 Malita peamalile kulonga ago, akahelela kumkemela Malia muhacha vake, akamlongie pono pahela vanu, "Muwulanichi agehe baha, akukukemela." 29 Malia peapulike ago, akaimile kisatu, akamuhelelie Yesu. 30 Yesu akali seingiye ku kijiji, ila akali pono pala Malita peamwanuke. 31 Vala Vayawudi vevakali ku kaye pamwi na Malia vakimnamacha, pevamuwonile ikwima na kuhuma kwivala, vakamfwatile kuno vahocha iyelela mumgunda va Nguluvi kuvembela ukoya.

32 Malia peafikile pono pala peakali Yesu, akafugamile na kulonga, "Mtwa, ngita ngauvechile baha, maama vangu ngeseafuwa!"

33 Yesu peamuwene ivemba na vala Vayawudi vevakali pamwi nave vivemba, akasugwime hilo na akali na lihingili munumbula lyake. 34 Baho akavahucha, "Mumvikile kwii?"

Vakamlongie, "Mtwa, wache upalole."

35 Yesu akavembile. 36 Baho Vayawudi vakalonga, "Mulole njawo peakamkela Lasalo!"

37 Ila vamonga vakalongile, "Wuli, munu uyu se nde yeamdinduwe meho yula munu yeabofwike meho, seawesile kumgita Lasalo abihile kufua?"

Yesu ekumchulubucha Lasalo

38 Yesu akiva ave asugwime hilo, akahelele mumgunda va Nguluvi. Likabuli lyene likali manga na likali ligubwike kwa liganga likomi. 39 Yesu akalonga, muheche liganga ilyo.

Malita muhacha va Lasalo, akamlongie, "Mtwa, avangile kunung’a, kwakuva chichumbile figono fitayi kuhuma peavikilwe mulikabuli!"

40 Yesu akamlongie, "Wuli, Sendikulongile kuva ukidikila daukuulola ukomi va Nguluvi?" 41 Ndeni, vakalihechile lila liganga. Yesu akalolile kukyanya kwa Nguluvi, akalonga, "Ndikuhongecha Daada kwakuva veve ukupulika kusuka kwa nene. 42 Ndichela kuva ukundipulika figono fyonda. Ila ndilongile aga kwakuva lya lipinga ili lya vanu vevagehe baha neke vapatile kudikila kuva veve nde yeundilagiliche." 43 Yesu peamalile kulonga ago, akakemela kwa lichwi, "Lasalo, hume kwivala!" 44 Yula yeakali afue akahumile kwaivala, kuno ahingilichiwe ligubiko na mawoko gyake na magulu gyake gawopilwe ndegei cha ligubikilo na wuso vake ugubikwe na litambala. Yesu akavalongie, "Mumwopole, mumleke ahelele."