1 Wuli, twivanga kangi kwinjuma vavene? Awu tung'ang'wa baluwa lya kwitambucha kwa nyenye awu kusuka baluwa kuhuma kwa nyenye neke vanu vangi vatutambule, ngita pevigita vanu vangi? 2 Nyenye vavene ndi baluwa lyetu yeisimbilwe munumbula chetu kila yumwi ailole na kuikwimba. 3 Muchelwa kuva nyenye ndi baluwa lya Kilisito yeihumile na kasi lyetu. Baluwa yene seisimbilwe kwa wino, ila isimbilwe na Muhe va Nguluvi yeagehe wumi, seisimbilwe kukyanya lya liganga, ila munumbula cha vanu.

4 Tuwesa kulonga ndeni, kwakuva lya luhuvililo lyetu lyetugehe nalyo kwa Nguluvi kwa ng'asi lya Kilisito. 5 Setuwesa kulonga kuva tugitile makani gyonda kwa umwimike vetu vavene, ila umwimike vetu vetuunago uhuma kwa Nguluvi. 6 Mwene nde atutangile kugumbanikila Lyagano Limiya ambalyo selyagano lya lulagilicho lyelisimbilwe, ila ndi lyagano lya Muhe va Nguluvi. Kwakuva lulagilicho lyelisimbilwe ligita kufuwa, ila Muhe va Nguluvi iletela wumi.

7 Suwe, ikiva wula lulagilicho yeiletile kufuwa, yeisimbilwe kwa kuhongola mufipande fya figanga, ikachile kwa ukomi ata Vaisilaeli sevawesile kuulola wuso va Musa kwakuva lya ung'alo vake, nago ukali ukomi va chipindi hela, 8 wuli, kasi lya Muhe va Nguluvi sedaivecha na ung'alo hilo? 9 Ngita kasi yeihiga vanu ndi kasi ngomi, wuli kasi yeileta ulowola sedaivecha na ung'alo hilo? 10 Nondee, ukomi va Lyagano Dahila seuwana na ukomi va Lyagano Limiya, kwakuva ukomi va Lyagano Limiya ndi ngomi hilo. 11 Kwakuva kikali chipindi chidodo hela cha ukomi, ndeni kila kyekwikala kwa chipindi kitali dakivecha na ukomi hilo. 12 Suwe, kwakuva ulo luhuvililo lwetu, tulonga ngajila uwogofi. 13 Nefwe setuwana na Musa, akang'ang'ile kugubika wuso vake kwa kindimula neke vanu va Isilaeli vabihile kuulola mwiso va ung'alo veukali utinala. 14 Ila luhala chawo chikagubuchwe. Mbaka neng'uli pelikwimba Lyagano lya Daha, kindimula iko wave ugehe ugubike luhala chawo. Kindimula iko kihechwa pala munu akimdikila Kilisito. 15 Ndakyene, mbaka neng'uli pevikwimba lulagilicho lwa Musa, kindimula iko kigubika luhala chawo. 16 Ila kindimula iko kihechwa pala munu peakumsedukila Mtwa. 17 Ndeni, "Mtwa" Ndi Muhe, na pala peagehe Muhe va Mtwa kuna upekesu. 18 Suwe, nefwe vonda wuso vetu sechigubikwa kwa kindimula, twiwonesa ukomi va Mtwa ngita mulundala pekiwonesa picha, nefwe tuwoneswa kuhuma muukomi umwi mbaka ku ukomi hilo. Mtwa nde muhe na nde igita kasi iyo.