1 Iyi ndi mala lya chidatu kwacha kwa nyenye. Ngita peisimbilwe mumasimbo ga Nguluvi, "Kila nongwa lihigwa kwa uswida va vanu vavili awu vadatu." 2 Ndikalonguwe kuvalakilila pendikali mulugendo lwa pili, nondee ndilonga kangi ndikiva kutali. Vala vonda vevagitile sambi na sevahongiche, kangi na vala vongi pendikwacha sendikuvawonela lusungu. 3 Nyenye mwavene damulola kuva Kilisito ilonga kuchumbila nene. Kwa nyenye Kilisito semusosovafu, ila ludali lyake igita kasi mugati lyenu. 4 Ata ngita avambishwe pakipindilihicho kuno akivecha musosovafu, ila nondee akwikala kwa ludali lwa Nguluvi. Ndeni ndeni nefwe vasosovafu kwa kwiwunga na mwene, ila tukwikala na mwene kwa ludali lwa Nguluvi kwa kuvagitila kasi nyenye. 5 Mwiyilolele mwavene muchele kuva muna ludikilo. Mwiyilolele mwavene. Wuli, semuchela kuva Kilisito Yesu agehe mugati lyenu? Ngita se ndeni, suwe, nyenye mulemuwe. 6 Ila ndidikila kuva nyenye muchela kuva nefwe setukalemuwe. 7 Tukumsuka Nguluvi mubihile kugita uwofu wowonda, ila se natilo tuwoneke ngita vanu twetuwesile suwe, ila mugite manofu, ata ngita nefwe tuwoneka tulemuwe. 8 Kwakuva setuwesa kuupinja undakyene, ila tugine kudalika undakyene. 9 Tukeduka kuva nefwe vasosovafu, ila nyenye muna ludali, ndeni tukumusuka Nguluvi neke mugine kugita unofu hilo. 10 Suwe, ndikuvasimbila makani aga ndikiva kutali, neke pendifika kwa nyenye ndibihile kuva mung'ali kwa nyenye, sending'ang'a kutumila umwimike veanigavile Mtwa. Kwakuva Mtwa seandigavile umwimike va kuvahananga ila vakuvatanga muludikilo venu.

11 Ndeni vakolo vangu, nondee ndikuvalagalila! Muveche va undakyene kwa kila kinu, mukolele gendigavalongile, muveche na natilo yimwi, mukale kwa lutengamaso. Na Nguluvi va ukelo na lutengamaso daivecha pamwi na nyenye.

12 Mwiyihungile kwa ukelo va Kilisito. 13 Usanzi va Mtwa Yesu Kilisito na lukelo va Nguluvi na kwiwunga na Muhe va Nguluvi, viveche pamwi na nyenye vonda.

14 Ndisuka Mtwa vetu Yesu Kilisito Usanzi va Mtwa Yesu Kilisito na lukelo va Nguluvi kwa kwiwunga na Muhe va Nguluvi, viveche na nyenye vonda.