1 Nene Paulo, mnjagila va Kilisito Yesu ngita Nguluvi peikela, ngigehe baha na Timotewo tukuvasimbiliya.

Tukuvasimbila baluwa iyi nyenye lipinga lya vanu vevamudikiye Kilisito ukoya Kolindo na vanu vonda va Nguluvi vemugehe pono lyonda lya Akaya. 2 Ndikumsuka Nguluvi Daada vetu na Mtwa vetu Yesu Kilisito avagavile usanzi vake na lutengamaso.

3 Anjumwe Nguluvi, Daada va Mtwa vetu Yesu Kilisito, Daada yeakuvawonela vanu lusungu na Nguluvi yeakututanga. 4 Nguluvi akututanga nefwe mumagundo gyonda, neke na nefwe tuvatange vanu vangi vevagehe mumagudo gyonda ngita fila Nguluvi peatutangile nefwe. 5 Ngita, magundo gya Kilisito pegigina kuhongeleka mugati lyetu, ndeni ndeni Nguluvi igina kututanga kuchumbila Kilisito. 6 Ata ngita twiguda, twiguda neke kuvatanga nyenye na kudikila kwa nyenye. Tukigudichwa na nyenye ndeni ndeni mugudichwa na mugavilwa ludali muhuvilile magudo aga aga getuhuvilila. 7 Ndeni ndeni, luhuvililo lyetu kwa nyenye ndi likangafu, twichela kuva magudo gemwipata ndi gala gala getupatile nefwe. Ila Nguluvi yeatutangile nefwe, dakuvatanga na nyenye.

8 Vakolo vetu, tung'ang'a muchele makani getugapatile ukoya muinyi lya Asia. Tukagudike hilo, magudo ago gakali makomi mbaka setukawesile kugahuvilila, tukahochile ngatuwesa kufuwa. 9 Ila munumbula chetu tukwilola ngita vanu vevahigilwe kufuwa. Lukani ulo likahumile neke tubihile kwihuvilila nefwe vavene, ila tumuhuvilile Nguluvi yeachulubucha vanu. 10 Ila Nguluvi akatulowola mumagudo ago ngagatugita tufuwe na mwene iendelela kutulowa. Na nefwe tukumuhuvilila Nguluvi kuva dakutulowa kangi, 11 nyenye pemuendelela kututanga kwa kutusukila nefwe. Nguluvi daihiga masuko ga vanu volofu vevatusukila na dakutunemela. Vanu volofu davakumuhongecha Nguluvi kwakuva lya usanzi vake kwa nefwe.

12 Suwe, nefwe twikwidumbila kinu kimwi. Numbula chenu chikutuwonesa petukalile muinyi iyi, hilo pagati lyenu, tukakalile kwa ufokomasi na kwa usanzi ngita Nguluvi peatutangile. Setukagitile ago kwa luhala chetu, ila kwa kutangwa na Nguluvi. 13 Tukuvasimbila makani gala gegimuwesa kukwimba na kugachela. Ndihuvilila kuva damugachela unofu makani aga, 14 kwakuva mbaka nondee muchela udodo. Twichela kuva mukigono kya kwacha Mtwa Yesu, mwiwesa kutudumbila nefwe ngita nefwe petukwidumbila nyenye. 15 Kwakuva ndikali na luhuvilila ulo, ndikasakile kuvagendelela nyenye mala chivili neke nyenye mupatile lunemelo hilo. 16 Ndikasakile kuvagendelela nyenye pendivecha mulugendo kuhelela ku Makedonia na pendiwuya kuhuma ku Makedonia, neke munitanga mulugendo lwangu kuhelela ku Yudea. 17 Pendipangile lukani ulu, ndikali ngita munu yeiseduka seduka? Awu mwihocha ndilamula ngita pendikela yune na kulonga, "Ena ndi ena" Na "Hamu ndi hamu?" Mala yimwi? 18 Ngita Nguluvi aviye mndakyene, suwe, kila kyetuvalongile nyenye selukani lwa kulonga "Ena" na "Hamu" kwa chipindi kimwi. 19 Kwakuva Yesu Kilisito, Mwana va Nguluvi, yetumudalike kwa nyenye, nene na Silivano na Timotewo, seakali munu va "Ena na hamu," Kwa mwene figono fyonda ndi "Ndakyene." 20 Kwakuva jangile chonda chealongile Nguluvi chevechile "Ndakyene," kuchumbile Yesu Kilisito. Ndeni, ena lyetu yetuilonga kuchumbila Yesu Kilisito, tukuilonga kwa kumnjuma Nguluvi. 21 Nguluvi yumwene nde akutugita nefwe na nyenye tuveche vagangafu kwa kwiwunga na Kilisito, Nguluvi yumwene nde atuhagule nefwe, 22 yumwene atuvikile kimanyilo yeiwonesa kuva nefwe ndi vanu vake na atugavile Muhe vake munumbula chetu, kuwonesa kuva ndakyene kwa gala gyonda gyeatuvikile. 23 Nguluvi ndi mswida vangu na akuichela numbula lyangu! Nene sendikachile kangi ku Kolindo neke ndibihile kuvalakilila kwa gala mahofu gemugagitile. 24 Setukela kuvang'ang'anicha nyenye mudikile kinu liki, nefwe tuchela kuva muhimile ukangafu muludikilo lwenu, ila tugita kasi pamwi na nyenye kwa jili lya lukeduko lwenu.