1 Nondee vakolo vangu, tukela kuvalongela usanzi va Nguluvi veagavile lipinga lya vanu vevamudikiye Kilisito ukoya ku Makedoniya. 2 Vanu avo vevamudikiye Kilisito vakagechilwe hilo kwa utumama, ila luhekelelo lwao lukali ngomi na ikavagitile vanu vakele hilo kutaula finu, ata ngita vakali vahangala hilo. 3 Ndakyene ndikuvalongela vakahechile ngita pevawesile ata kugina umwimike vawo, kwihela munu yeakavalongiye ila vakakeliye vavene, 4 vakatusukile hilo, tugite navo kasi lya kuvatanga vanu va Nguluvi vevagehe ukoya ku Yudeya. 5 Kangi, vakagitile hilo kuchumba petuhuvilile, vayihechile vavene tandi kwa Mtwa na vayihechele na kwa nefwe, kwa lukelo lwa Nguluvi. 6 Ndeni tukamusukile hilo Tito, yeavangiche kasi iyo nofu lya kuhecha kwa kukela, avatange nyenye kugita kasi iyi lya lukelo mugati lwenu. 7 Nyenye ndi mugehe na kila kinu, mugehe na ludikilo na umwimike va kulonga unofu na luchelo na ludali lyonda lwa kugita usanzi na lukelo venu kwa nefwe. Ndeni, tukuhuvilila muveche na numbula lya kuhecha hilo mukasi iyi lya kuvatanga vanu vangi. 8 Sendikuvaswitilicha, ila ndikela kugecha lukelo venu kuva nde va undakyene na uwana na vanu vangi vevagehe na ugangamalo lya kutanga neke ndiwese kuchela namuna lukelo venu peugehe va undakyene. 9 Kwakuva, nyenye muchela usanzi va Mtwa vetu Yesu Kilisito, ata ngita mweni akali na kila kinu, akayigitile muhangala kwa jili lyenu, neke kuchumbila uhuhangala veke, nyenye muveche na kila kinu.

10 Ila kyendisaka kuvalongela nde iki, ndi unofu kwa nyenye kugita fila fimuvangile mwaka weuchumbile. Nyenye mukali va kwanja sekuhecha hela finu fyenu, ila mukakelile hilo lya kusaka kwihecha. 11 Suwe, mumale kasi iyi lya kuhecha kwa lukelo, ngita pemugehe na ng'elu ngomi lya kutanga, ndeni, muhecha ngita pemuwesa kuhecha. 12 Ngita munu akela kuhecha, Nguluvi iwanuka kila kyeawesa kuhecha kuhumila na kila kiagehe nakyo, Nguluvi seisaka hilo.

13 Natilo lyetu sekulonga nyenye mgudiswe na mchigo va kuvatanga vanu vangi, neke vene vaveche na lutango, ila kyending'ang'a vanu vonda muveche telatela. 14 Finu fyolofu fyemugehe nafyo nondee fivatanga vayenu vevihela, neke navo dapevivecha na finu vavagavile nyenye pemugehe mwihela kinu, ndeni, kwakugita ndeni muvecha mwitange. 15 Ngita peisimbilwe mumasimbo ga Nguluvi, "Yealundasile fyolofu, seakali na kinu kingi, vala yealundasile fidodo, seakapwemuke na kinu."

16 Ndikumuhongecha Nguluvi yeamgavile Tito ng'elu lya kuvatanga nyenye ngita nene pendegehe na ng'elu lya kuvatanga. 17 Seakaidikile hela kila kyetumsukile, ila na mwene akali na ng'elu lya kuvatanga, ata yumwene akasakile hilo kwacha kwa nyenye. 18 Pamwi na Tito, tukumulagicha lukolo yumwi yeanjumwile na lipinga lya vanu vonda vevamuidikiye Kilisito kwa kasi lyake lya kulanducha Njowo Nofu. 19 Kangi mapinga gya vanu vevamuidikiye Kilisito vamuhaguwe lukolo vetu uyo neke aveche pamwi na nefwe petukusindika lutango kwa vanu. Kasi ilyo yikumnjuma Mtwa, kangi iwonesa kuva twikela kuvatanga vanu.

20 Twigenda na lukolo uyo, neke kwihepa luchogomecho lolonda petwigawa fupo chechihechwa kwa usanzi. 21 Natilo lyetu ndi kugita makani ganofu sekwa Mtwa ng'ani ila ata pautalo lya vanu.

22 Ndenindeni tukumlagilicha lukolo vetu pamwi navo, malacholofu tukamgechile na tukamuwene agehe na numbula lya kuvatanga vanu, nondee agehe na ng'elu lya kuvatanga hilo kwakuva akuvaidikila hilo nyenye. 23 Titusi nde mweyangu twigita kasi pamwi kwajili lya nyenye. Ila kutigila lukolo vetu ava vangi vevikwacha pamwi na mwene avo vihuma mumapinga gya vanu vevamuidikiye Kilisito, navo vakumnjuma Kilisito. 24 Suwe, muvaonese vanu avo lukelo venu neke mapinga gangi gya vanu veamuidikiye Kilisito vachele kuva gyetulonga nde gyaundakyene ndeni tukwidumbila nyenye.