1 Nene ndiendelela kwidumba ata ngita seunofu! Ila nondee ndilonga makani geaniwonisile Mtwa na kunigubutuliya. 2 Ndikamchele munu yumwi yeamudikiye Kilisito, myaka kyumi na chitai gyegichumbile, akanyamuliwe kuhelela kuluhano hilo. Ila sendichela akwikala ukoya kwa muvili awu kwa muhe va Nguluvi yumwene nde yeichela. 3 Ndilonga kangi, sendichela kuva munu uyo, akwikala kwa muvili awu kwa muhe Nguluvi yumwene ndi yeichela. 4 Akanyamulwa mbaka pono pepikemelwa Paladiso ukoya kuluhano, akapulike makani segilongeka, ambagyo munu yeyonda seing'ang'wa kugalonga. 5 Ndikwidumbila munu ngita uyo, ila sendikwidumbila yune, ila ndikwidumbila makani gegiwonesa usosovafu vangu. 6 Ngandikeliye kwidumbila, ngandivecha mupufi kwakuva ngandilongiye undakyene. Ila ndikayikanile mwene, neke vanu vabihile kunilola kuva nene ndimukomi kugina gala gevagalola na kupulika kuhuma kwa nene. 7 Neke makani aga makomi gegigubutuliwe, ndbihile kwidumbila, ndigagavilwe ung'ali ukomi muvili vangu ngita ung'ali ngita ndihomilwe na mihomi. Mang'ali ago ngita ndumindumi va Setani yealagichwe neke anigudise ndibihile kwidumba hilo. 8 Ndikamsukile hilo Mtwa mala chidatu neke kinu ikyo kinihege. 9 Ila Mtwa akanilongile, "Usanzi vangu ukwiliye, kwakuva ludali lwangu ivecha ngomi pale peuvecha msosovafu." Ndeni, ndikwidumba kwa usosovafu vangu, neke ludali lwa Kilisito lukali kwa nene. 10 Ndeni, ndikedukila usosovafu, pendiligwa, pendigudika, pendiutumama kwakuva lya Kilisito. Pendivecha musosovafu baho Kilisito dahunigavila ludali.

11 Ndikali ngita mupufi, ila nyenye nde munigitile ndiveche ndeni. Kwakuva nyenye mukang'ang'ilwe muninjume, kwakuva ata ndiwoneka ndi mdodo, ila nene se mdodo kuchumba avo, vevakwikemela, "Vanjagila vakomi." 12 Chipindi pendigehe kwa nyenye ndikahuviliye na kugita umanyitu na filuwiluwi fyefikawonesile ndakyene kuva nene ndi mnjagila va Nguluvi. 13 Kuhela lukani lolonda lyendikaligitile mumapinga gangi gya vanu vevamwidikiye Kilisito, lyesendikagitile kwa nyenye yivecha ndikavagitiye nongwa kwakuva sendikavasukile munitange kwa finu fyending'ang'a, ngita ilyo lyendigitile ndi nongwa ndisuka muniwonele lusungu.

14 Ndondee, iyi ndi mala lya udatu ndiyiandalise kuvagendelela, nene sendivecha muchigo kwa nyenye. Sendikela finu fyenu ila ndikuvasaka nyenye, kwakuva vana sevakuvavikila finu mulusanja vasasi vawo, ila figono fyonda vasasi nde vivika finu mulusanja kwakuva lya vana vawo. 15 Ndikedukila hilo kuhecha fyendinafyo, ata kuyihecha ndimwene neke ndivatange nyenye. Ila yiwoneka nene pendiluticha kuvakele, nyenye mwipwemsa kundikela p 16 Ila mudikila kuva nene sendikavasumbule kwa kusaka kinu kwa nyenye. Ila munu yungi iwesa kulonga, kwakuva nene ndi msugu, avagomeche kwa kuvachanga. 17 Wuli, nene ndikavanyagile kinu pala pendimulagiche munu kwacha kwa nyenye? 18 Ndikamulagiche Tito, ache kwa nyenye pamwi na lukolo vetu yungi. Wuli, Tito akategule kinu kyokyonda kwa nyenye? Wuli, semulola kuva nene na mwene ndi kinu kimwi mukasi? Wuli, semulola kuva ata kyanda kyetu ndi kimwi?

19 Wuli, mwihocha kuva nefwe mbaka nondee tukwitasa pautalo lwenu? Ila twilonga makani aga pautalo lwa Nguluvi, kuno tuhungine na Kilisito. Vaganja vangu, kyokyonda kyetugita, tugita kwa kuvatanga nyenye. 20 Kwakuva ndikogofya pala pendikwacha kwa nyenye dandikuvalola mukwikala ngita pemkela nyenye. Ndeni dasendikeduka, lukani ulo dalikundigita ndigite makani gyesemukugakela, ndikwogopa ndiwesa kuvalola mwikwitova na vimi na kwiwonela wifu na ndewo na kwipinja na ufyangu na kwidumba na luvipo na kuvecha na mayovelecho. 21 Ndikogofya pendikwacha kangi kwa nyenye, Nguluvi vangu daandigita ndiwone nyoni pautalo lyenu. Dandivemba kwakuva lya vala vevigitile sambi kuhuma pamwandi, ila sevakahongeche sambi chawo cha uhafu na ugoni na ludobokelo chiwofu chevakali vagitile.