1 Vakolo vangu, kwakuva tugavilwe jangila ichi, ndeni tuying'aliche na tuleke makani gyonda gegakutugita mivili gyetu na muhe chetu chibihile kudikilwa pautalo lya Nguluvi, tuveche vanu va Nguluvi na kwikala kwa kumginya Nguluvi.

2 Vakolo vangu twisuka mutukele! Setukamukosiye munu yeyonda, setukamulemacha munu yeyonda vala setukamuchangile munu yeyonda. 3 Sendilonga aga neke ndivahige nyenye kuva mugehe na nongwa, ngita pendilonguwe kulonga kuva nyenye tukuvakela, tufuwe pamwi na nyenye awu tuveche uwumi pamwi na nyenye. 4 Ndikuvaidikila nyenye nde vakangafu, ndikwidumbila nyenye. Mumagudo gyetu gyonda ndi gangamichwa numbula na ndikeduka hilo. 5 Kwakuva ata petufikile ku makidoniya setukawesile kutulula. Kila lubali kukali na utumama, kwivala kukali na ndewo na munumbula chetu kukali uwogofi. 6 Ila Nguluvi, yeakuvagangamicha yevatwinyike numbula, akatugangamicha numbula peaachile Tito. 7 Sekwacha kwa Tito hela, ila ndeni ndeni akatulongiye pemukamugangamicha. Mwene akatulongiye pemusaka hilo kuniwona na pemugehe na uswigwimo kwa gala gegihumile na pemusaka kunitasa, nondee ndikeduka hilo. 8 Ata ngita ndikavaswigwimiche kwa baluwa yila, nene sendikwiswitilicha. Ata ngita ngandikwiswitiliche, ndichela baluwa iyo ikavaswigwimiche ila kwa chipindi chidodo hela. 9 Ila nondee ndikedukila, sekwakuva ndikavagitile musugwime, ila kwakuva usugwimo venu ukaletilwe na Nguluvi neke mugalambule na kuleka sambi. Ila nefwe setukavalemacha kwa kyokyonda. 10 Kusugwima yeiletwa na Nguluvi ikuvagita vanu valeke sambi neke vakomboliwe, ila usugwimo va inyi ikumsindika munu kufuwa. 11 Nondee, muchela uswigwimo yeiletilwe na Nguluvi, peigitile kasi kwa nyenye, ivaletile makani manofu ivagitile muveche na ludoboko va kugita makani gye king'ang'wa, mwiwesa kwilongela kwa aga gye mukugagita kuva nde gya undakyene, muwesa kukana manjanganifu, kumuginya Nguluvi, kwa ng'elu lya kundilola na kulola munu ye agitile nongwa daipata daigitwa ngita ing'ang'a. Muago gyonda muwonesa kuva mwihela nongwa musaka kulolesa numbula chenu pechigehe nofu. 12 Ndeni, ata ngita ndikavasimbiliye baluwa yila se kwa jili lya munu yeagitile mahofu awu kwa jili lya munu yeseagitilwe mahofu. Ila ndikasimbile neke kuvavika wachi pautalo lya Nguluvi, neke mulole, pemwihecha kutugumbanikila. 13 Ndeni, tukagangamichwe numbula.

Sekugangamichwa numbula hela ndeni ndeni tukakeduka kumuwona Tito ana lukeduko, kangi pemukedusile munumbula lyake. 14 Nene ndikayinjuma hilo pautalo lyake kwakuva lyenu na nyenye semukanigavile nyoni. Figono fyonda tukavalongile undakyene na kwidumbila nyenye pautalo lya Tito ikawonise lukani lwa undakyene. 15 Ndeni lukelo lwake kwa nyeye ndi lukomi hilo, peiwuwika peadikilwe na peamuwanuke kwa uwogofi na kulindima. 16 Ndikeduka hilo kwakuva ndiwesa kuvahuvilila nyenye kwa kila lukani.