1 Kwakuva mivili gyetu ngita kyama gyegikala muinyi iyi daihanangika. Ila tuchela kuva Nguluvi datugavila kaye yingi kuluhano, kaye seichengilwe kwa mawoko gya vanu. 2 Nondee, petwali mumvili ugu muinyi iyi tung'ung'ulika. Tusaka kuhelela na kwikala mukaye iyo ukoya kuluhano kwa Nguluvi. 3 Baho, Nguluvi dakutugavila mivili miya muhe chetu dachivecha na mivili gya kwikala mugati lyake mbepali. 4 Tukiva twave mukyama iki kya inyi yene ndi mivili gyetu, tung'ung'ulika mugati lyetu kuhumila na makani molofu makangafu gyegakutuhumila, sengita tukela kuhufula mvili ugu veufuwa, ila tukela kufwaliswa mvili seufuwa, neke muvili ugu weufuwa ugalambuchwe na muvili weseufuwa. 5 Nguluvi mwene nde yeagita makani aga gyonda, mwene akatugavile Muhe vake neke atuwonese kuva kwa undakyene daakugagita. 6 Ndeni, figono fyonda tugangamichwa. Tuchela kuva petukwikala kwa muvili ugu hela ndi kwikala kutali na kaye lya Mtwa. 7 Kwakuva, tukwikala kwa kudikila na sekwa gala getukugalola. 8 Ndakyene tugehe na ukakatima na kusaka kuuleka mvili ugu na tukakale pamwi na Mtwa. 9 Ila lukani linofu hilo, tusaka kumkelesa Mtwa, yiveche tukwikala paha muinyi awu ukoya kuluhano. 10 Kwakuva, kila munu daikwima pautalo lya Kilisito neke ahigwe. Kila munu daiwanuka kyeang'ang'wa kuwanuka kwa gala geagitile peagehe muinyi, gaveche manofu awu mawofu.

11 Suwe, tuchela kumginya hilo Mtwa, ndeni tukuvayovelecha vanu vamudikiye Kilisito. Nguluvi akutuchela unofu petugehe na nene ndihuvilila mukutuchela unofu munumbula chenu. 12 Setukela kangi kwinjuma kwa nyenye. Ila tusaka kuvalongela kila kyemung'ang'wa kwinjuma kwakuva lya nefwe, neke muveche na makani kya kuvahiga vala vevikwinjuma pautalo lya vanu na valeka kwidumbila gegagehe munumbula chawo. 13 Kwa vanu vangi, tuwoneka tugehe na lukwale, kwakuva lya kumgumbanikila Nguluvi, ila ngita tuwoneka tugehe na luhala lunofu suwe nde kwakuva lya kuvatanga nyenye. 14 Tulongochwa na ukelo va Kilisito, nondee tuchela munu yumwi akafuwe kwakuva lya vanu vonda, ndeni vanu vonda vafuwe pamwi na mwene. 15 Mwene akafuwe kwakuva lya vanu vonda, neke vala vevagehe uwumi vabihile kwikala kwa kuyikela vavene, ila vakale kwa jili lyake, mwene yeafuwe na kuchulubuka kwakuva lya vene.

16 Setukumlola munu yeyonda na kumgecha kwa kimunu, ata ngita tukamchele Yesu Kilisito kwa kumgela, ila nondee setugita ndeni kangi. 17 Ata yivechile munu yeyonda agehe mugati lya Kilisito avechile munu mumiya, gadahile gachumbile na gamiya gachile. 18 Aga gyonda gihuma kwa Nguluvi, yeatunjengilekaya nefwe na mwene kuchumbila Kilisito, na kutugavila kasi lya kuvanjengakaya vanu na Nguluvi. 19 Nde kulonga, Nguluvi yumwene akali akunjengakaya vanu vonda na mwene kwa kuchumbila kilisito ngajila kuvalila sambi chawo. Mwene akatugavile unanzi va kunjengakaya. 20 Ila nefwe tulagichwe na Kilisito tulonge na vanu, Nguluvi yumweme akututumile nefwe kuvasuka hilo nyenye. Nefwe, tukuvasuka kwa litawa lya Kilisito, neke munjengwekaya na Nguluvi. 21 Kilisito seakali na sambi, ila Nguluvi akamgitile ategule sambi chetu, neke nefwe kwa kwiwunga na mwene, tuveche vanu vasanzi pautalo lya Nguluvi.