1 Ndeni, nene sending'ang'wa hilo kuvasimbilya ngajila lya kasi lya kuvatanga vanu va Nguluvi. 2 Ndichela pemugehe na numbula lya kuvatanga vanu vangi na ndikayidumbile lukani ulo kwa vanu vevavamuidikiye Kilisto ku Makedoniya. Ndikavalongile, "Vakolo vetu va Akaya vagehe tayali kutanga kuhuma mwaka veuchumbile." Ndeni, numbula lyenu lya kuhecha ivayovelechile vanu volofu vaheche hilo. 3 Suwe, ndivalagicha vakalo vetu avo, neke kwidumbila kwa nefwe kwajili lya nyenye kubihile kuwoneka ndi njowo hela. Ila yiwoneke mwiyandalise na mgehe na finu fya kuvatanga ngita pendilongile. 4 Kwakuva ngita vanu va Makedoniya davikwacha pamwi na nene na kuvalola semwiyandalise, datwilola nyoni ngajila kulonga kyokyonda kutigila nyenye na nyenye ndenindeni damulola nyoni kwakuva tukali tuvahuviliye hilo. 5 Ndeni, ndiwene unofu kuvasuka ava vakolo vandilonguwe kwacha kwa nyenye, vapate kuandalisa fupo chenu ngomi chemlongile damwihecha. Baho yiwonesa kuva fupo ilyo muhechile vavene na se kwa kuswitilichwa. 6 Muwiwuke, munu yeivala mbenyu chikefu ibena chikefu, munu yeivala mbeyu chongofu ibena chongofu. 7 Suwe, kila yumwi, aheche ngita pealamule kwa numbula na se kwa uswigwimo awu kwa kuswitilichwa, kwakuva Nguluvi umkela yula munya kuhecha kwa lukeduko. 8 Nguluvi iwesa kuvagavila nyenye kugina gala gemwisaka, neke chipindi chonda muveche na kila kinu kyemung'ang'a, neke muveche vanu va kugita manofu myolofu kuvatanga vanu vangi. 9 Ngita peisimbilwe mumasimbo gya Nguluvi,

"Mwene kuhecha kwa numbula lya kukela,

uvagavila vahangala,

usanzi vake ukwikala mbepali."

10 Nguluvi yeakumgavila mgima mbeyu na nde yeakumgavila kyakula, davakuvagavila nyenye ndeni mbeyu chemng'ang'a na dachigita chimele na kukula na kuvagavila mabenelo myolofu gyemukugapata kwajili lya kuhecha kwa nyenye kwa numbula nofu. 11 Dakuvagita muveche na kila kinu figono fyonda, neke vanu vawese kumuhongecha Nguluvi kwakuva lya fupo chenu chevawanuka kwa kuhumila nyenye. 12 Kwakuva, kasi iyi lya Nguluvi yemukuigita seikuvatanga vanu va Nguluvi weka hela, ila daikuvagita vanu volofu vamuhongeche Nguluvi. 13 Kuhumila na gala gyegiwoneka mukasi lyetu iyi vanu davakumnjuma Nguluvi, kwakuva lya nyenye kudikila Njowo Nofu cha Kilisito chemudalika, kangi kwakuva lya numbula lya kukela kuvagavila vanu vonda finu fyenu. 14 Ndeni, davakuvasukila nyenye kwa numbula kwakuva lya usanzi mkomi weavagavile Nguluvi. 15 Tumuhongeche Nguluvi kwakuva lya fupo lyake ngomi yeatugaviye yeseiwesa kulongwa.