1 Yesu avakemelie vachulila vake kumi na vavili, akavagavile ludali na umwimike va kuhecha mihoka na kuvananicha vatamwa. 2 Baho avalagiliche vahelele kuvadalikila vanu njowo cha Ung'achale va Nguluvi na kuvananicha vatamwa. 3 Avalongie, "Pemwigenda mbihile kunyamula kyokyonda, mbihile kunyamula lusaga, vala muhako, vala kyakuliya, vala sendi, vala mwenda wungi. 4 Kaye yeyonda yemukwingila na kuvawanuka, mwikale mbaka pemwihega umwani hugo. 5 Vanu vakilema kuvaanuka, muwege mumwani ugo, pemwihega mupumune lifuna mumagulu gyenu iveche kimanyilo kuva avakanile."

6 Ifyo vachulila havo vakavangile lugendo, vakachumbile mufijiji kuno vakidalika vanu Njowo Chinofu na kuvananicha vatamwa kila pono.

7 Helode yeakali ng'achale va ku Galilaya, akapulikile njowo chonda chechikali chigitilwe na Yesu, mwene akahogofya kwakuva vanu volofu vakali vakilonga, "Yohani mbatisaji achulubuke!" 8 Vangi valongie kuva Elia yeakali mvichi va Nguluvi ahumie na vangi valongie kuva yumwi va mvichi va daha achulubuke. 9 Ila Helode akalongie, "Yohani ndikamdumule mtuwe, ndi ani yendipulika njowo chake?" Nave akasakile kumlola.

10 Vala vanjagila pevawuyile, vakamlongie Yesu gyonda gevagitile. Yesu akavategula vanjagila vake hela, akahelela navo mwani va Betisaida. 11 Ila vala vanu pevachelile peahelele, vakamfwatile. Yesu akavaanuke, akaywangile navo njowo cha Ung'achale va Nguluvi, akavananiche vala yevasakile kunanichwa.

12 Lichuwa pelivangile kudibala, vala vachulila chumi na vavili vakamuhelelie Yesu na vakamlongie, "Uvalage vanu vahelele kufijiji na migunda fya pepi, vapatile kyakula na pono pa kuvasa, kwakuva baha petugehe ndi kudasi."

13 Ila Yesu akavalongie, "Mwavene muvagavile kyakula."

Vakamuhigile, "Nefwe tunagyo mibumunda mihanu na somba vavili hela. Wuli ukela tuhelele kuvagulila kyakula vanu hava vonda?" 14 Pono pala kukali na vagosi elufu chihanu.

Yesu akavalongie vachulila vake, "Muvalongele vanu vakale mumapinga lya vanu na kila lipinga liveche na vanu hamsini."

15 Vachulila vakagitile ngita pevalongilwe vanu vonda vakakalile panyi. 16 Baho Yesu akanyamue gila mibumunda mihanu na somba vavili, akalolile kuluhano akamlumba Nguluvi, akavifunyile. Baho kaiketula mibumunda na somba, akavagavile vachulila vake vavagavile vanu. 17 Vanu vonda vakalie na kugwita. Vachulila vakaholasa masigalio gya mibumunda na gya somba, vakamemiche findilu kyumi na givili.

18 Kigono kimwinga Yesu akali isuka weka hela na vachulila vake vakamuhelelie. Yesu akavahuchile, "Wuli vanu valonga nene nde ani?"

19 Vene vakamuhigile, "Vanu vangi valonga veve nde Yohani Mbatisa na vangi Elia yeakali mvichi va Nguluvi na vangi vilonga veve ni yumwi va mvichi va daha yeachulubuke."

20 Baho akavahucha, "Nyenye mwilonga nene nde ani?"

Peteli akamuhigile, "Veve nde Kilisito yeaguliwe na Nguluvi."

21 Baho Yesu akavalakilile hilo vabihile kumulongela munu yeyonda njowo ilyo.

22 Yesu akavalongie vachulila vake, "Mwana va Munu itakilwa apatile magudo hilo na kukanilwa na vagogolo na vatekechi vakomi na vawulanichi va malagicho. Na daidochwa, ila kigono kya udatu ichulubuka."

23 Baho akavalongie vanu vonda, "Munu yeyonda yeikela kunifwata nene, ajileme mwene, anyamule kipindilihicho lwake kila kigono, anifwatile. 24 Kwakuva munu yeikela kuwokola wumi lwake yumwene, akuyayagilicha, ila yeakuyayagilicha wumi lwake kwakunifuatila nene, daigawokola. 25 Wuli, munu ipatila liki ngita akiupata umosi vonda va inyi na kuno akiyagilicha wumi vake? 26 Munu yeakuniwonela nyoni nene na mawulanichi gyangu, Mwana va Munu ekumuwonela nyoni paikwacha paukomi vake na muukomi va Daada vake na vandumindumi vang'alili. 27 Ndakyene ndikuvalongela, vangi vagehe baha sevifuwa mbaka vauwene Ung'achale va Nguluvi."

28 Pefichumbile figono finane paalongile hago, Yesu akavategule Peteli na Yohani na Yakobo, vakakang'ile pakidunda kumsuka Nguluvi. 29 Yesu peakali ekumsuka Nguluvi, wuso vake ukasedukile, myenda gyake gikali mivalafu pee. 30 Bahobaho vawonike vanu vavili vakali vaywanga na Yesu. Vanu havo vakali Musa na Elia, 31 vawonike paukomi va kuluhano, vakaywangile na Yesu njowo lya kufua, gyekikamilika ukoya ku Yelusalemu. 32 Peteli pamwi na vayage vakali vavasile tulo, hata ifyo valamkile vawene wula ukomi va Yesu na vakavawene vala vanu vavili vevali vahemile pamwi nave. 33 Baho vanu vala vavili pevakali vahega, Peteli akamlongie Yesu, "Mtwa nde unofu nefwe tugehe baha! Suwe tuchenge fibudi fidatu, kimwi kyako na kimwi kya Musa na kimwi kya Elia." Ndakyene Peteli seachelige elonga liki.

34 Peteli peakali ilonga ago, bahobaho likahumile lifunde na likavagubika, vachulila vake vakaogofya lifunde pelikuvagubika. 35 Lichwi yapulikile kuhuma mulifunde, "Uyu nde mwana vangu yendimuhague, mumpulikiche mwene."

36 Lichwi peichikile, vakamuwonile Yesu agehe weka hela. Vachulila vekalile jii na sevakamlongie munu yeyonda njowo chevalolile figono ifyo.

37 Kilawu lyake Yesu na vachulila vake pevikile kula kidunda, lipinga likomi lya vanu lyatanganile na Yesu. 38 Munu yumwi mulila lipinga akabwatile, "Muwulanichi! Ndikusuka mnaniche mwana vangu, mwana vangu yeiyena! 39 Mahoka ekumbata na kumgita abwate, ekumgavila kilibisi na ahumilwe mafulofulo mumlomo. Uyo lihoka lihafu likumgudisa hilo na selikumleka kisatu. 40 Ndikavasukile vachulila vako vamheche lihoka lihafu ilyo, ila sevawesile."

41 Yesu akavahigile, "Nyenye kilelo sekidikila na kiwofu! Ndikwikala na nyenye na kuvafumilia mbaka panili?" Baho akamlongie yula munu, "Mletile mwana vako baha." 42 Mdimi uyo peamuhelelie Yesu, yula lihoka lihafu likamgavile kilibisi. Ila Yesu akamlakilila yula lihoka lihafu, akamnaniche yula mwana mdimi na akamuwuyisile kwa daada vake. 43 Vanu vonda vakadudwive na umwimike ukomi va Nguluvi.

Vala vanu pevali vave vadudwiva kwa njowo chonda cheagitile Yesu, mwene akavalongie vachulila vake, 44 "Mbihile kusemwa ikyi kyendikuvalongela, Mwana va Munu isindikwa mumawoko gya vanu." 45 Ila vavo sevachele mana lya luchowo ulo, luchowo ulo lyafihilwe pawo neke vabihile kuchela, navo vakaogofya kumuhucha Yesu mana lya luchowo ulo.

46 Vachulila vake vavangile kwiwucha, nde ani yeivecha mkomi pagati lyawo. 47 Yesu agachelie mahocho gegagehe munumbula chawo, baho akamyamue mwana mdodo na kumvika pepi nave. 48 Akavalongie, "Munu yeyonda yeakumuwanuka mwana uyu kwa litawa lyangu, aniwanuke nene. Na munu yeyonda yeakuniwanuka nene amuwanuke mwene yeanilagiche. Kwakuva munu yeyonda yeagehe mdodo pagati lyenu nde mkomi mugati lyenu."

49 Yohani akamlongile Yesu, "Mtwa, tumwene munu yumwi ihecha vanu mahoka kwa litawa lyako tukamkanie, kwakuva mwene se yumwinga vetu."

50 Yesu akamlongie Yohani na vachulila vangi, "Mbihile kumkanila, kwakuva mwene yesepinjana na nyenye agehe palubali lyenu."

51 Chipindi peukali pepi va Yesu kunyamuliwa kuhelela kuluhano kwa Nguluvi, Yesu alamule kuhelela ku Yelusalemu. 52 Avalagiliche vananzi vamlongole, navo vahelelie ku mwani va Samalia kumwandalisia kila kinu, 53 Ila venekaye va pala valema kumuwanuka Yesu kwakuva akali ihelela ku Yelusalemu 54 Vachulila vake, Yohani na Yakobo, pevawonile ago, vakalongie, "Mtwa, wuli wisaka tuukemele lyoto ukwike kuhuma kuluhano uvanyanye vanu vonda?"

55 Yesu akavasedukile na kuvalakila. 56 Pambele Yesu na vachulila vake vakahele mu kijiji kingi.

57 Pevali mulugendo, munu yumwi akamulongie Yesu, "Dandikufwata kokonda kwewihelela."

58 Yesu akamuhigile, "Mikeve vana manga, fidege vana fiwaso ila Mwana va Munu ihela pono pa kutulula."

59 Baho Yesu akamlongie munu yungi, "Unifwate."

Ila munu huyo akalongile, "Mtwa leke tandi ndiwuyile ndikamsile daada vangu."

60 Yesu akamlongie, "Uvaleke vanu vevali vahafu munumbula lyao vasilwe na vevafuwe, ila veve helele ukavadalikie vanu Ung'achale va Nguluvi."

61 Munu yungi akamlongie, "Mtwa ndikukufwata ila leke tandi ndikavalage vakololo vangu."

62 Yesu akamlongie, "Munu yeyonda yeipandula kuno ilolela kumbele seidikilwa kuva mnyigendwa va ung'achale va Nguluvi."