1 Baho, vanu vemile kwa pamwi, vakamsindika Yesu pautalo lya Pilato. 2 Vavangile kumlata vakilonga, "Tukamwene munu uyu akivayagicha vanu vetu, akuvakanila vabihile kuhomba usulu kwa Kaisali na kwikemela mwene ndi Kilisito, Ng'achale va Kilumi."

3 Pilato akamuhucha Yesu, "Veve ndi Ng'achale va Vayawudi?"

Yesu akamuhigila, "Ndakyene, ngita veve pewilonga."

4 Pilato akavalogela vakomi va vatekechi na vakomi na lipinga lya vanu, "Sendiwona nongwa lyolyonda kwa munu uyu."

5 Ila vavo vakaginile kulonga, "Kwa mawulanicha gake akuvachovelela vanu vevagehe Yudea lyonda vipinge na Kaisali, avangile ku Galilaya, nondee agehe baha."

6 Pilato peapulike ago, akahucha, "Wuli, munu uyu ihumila ku Galilaya?" 7 Peachelile kuva Yesu akali ihumila pono yeigehe panyi lya umwimike va Helode, akamsindike kwa Helode, ambaye chipindi icho Helode akali ku Yelusalemu.

8 Helode peamuwonile Yesu akedukile hilo. Kwa figono fyolofu apulikige njowo chake na kuvangila daha akelile kumulola. Akali ichindila kulola kimanyilo kyeagitile na Yesu. 9 Helode akamucha mahucho golofu, ila Yesu sehamuigile kyokyonda. 10 Vakomi vatekechi na vawulanichi va malagicho vihumile pautalo, vakamlatile Yesu malato gawo kwa kumlakilila. 11 Helode pamwi na vapuga vake, vakambedile na vakamkinile na kumfwalicha myenda gwa king'achale, vakamuwuyise kwa Pilato. 12 Kwakuva pamwandi Helode na Pilato vakali vachindwama, kuvangila baho vakali vaganja.

13 Suwe, Pilato akavakemela pamwi vakomi va vatekechi na filongochi va Vayawudi na vanu va mwani wula, 14 akavalongie, "Mumletile munu uyu kwa nene mkilonga kuva akali akuvayagicha vanu. Nondee mpulikiche! Baho nene ndimuhuchile pautalo lyenu na sendimwene nogwa lyolyonda gakumlata uyu munu. 15 Se nene hela, hata Helode filafila seawonile nongwa lya munu uyu, nde mana amuwusile kwa nene. Ndakyene munu uyu seagitile kyokyonda kyekikumgita adochwe. 16 Ifyo ndilonga atovwe ndomondo, baho ndikumleka." 17 Kila lihungu lya Pasaka, Pilato akumulekechela muwopwa yumwi.

18 Ila vonda vatovile kyowo pamwi, "Muheche munu uyo, tulekele Balaba!" 19 Balaba akali avikilwe mukiwopo kwa kugita ndewo na kudocha vanu ku mwani.

20 Pilato akelie kumulekela Yesu, ifyo akalongile navo kangi. 21 Ila vawo vatovile kyowo, "Muvambe mukipindilihicho! Muvambe mukipindilihicho!"

22 Pilato akavahucha lya udatu, "Wuli, agitile kinu liki kiwofu? Sendiwona nogwa lyolyonda lyakumgita adochwe, kwa ifyo ndikumtova ndomondo, baho ndikumlekela."

23 Ila vavo valutile kutova kyowo kwa ludali hilo, vakakelile Yesu muvambe mukipindilihicho. Na kwa kyowo chawo chikamgitile Pilato idikile. 24 Suwe, Pilato akaamule kugita ngita vanu vevikela kigitwe. 25 Akamulikelile yula munu yevamkelie, ambaye yeavikilwe mukiwopo kwa kugita ndewo na kudocha vanu na akamuhecha Yesu adochwe ngita pevakelile.

26 Vapuga pevali vakimsindika, vakatang'anile na munu yumwi yeakemeliwe Simoni yeihuma Kileni, akali ihuma kwivala lya mwani. Suwe, vakambatile, vakamtwikile wula kipindilihicho aunyamule kumbele lya Yesu.

27 Lipinga likomi lya vanu lyakamfwatila Yesu, pagati lyawo vakivecha vadala vevakali vakimvembela na kukilivicha. 28 Yesu avasedukie, akalongile, "Nyenye vadala va Yelusalemu! Mbihile kunivembela nene, ila mwivembele nyenye na vana venu. 29 Kwa kuva figono fikwacha pevilonga, ‘Vafunyilwe vala vadala yesevibaba vala kukong'echa vana!’ 30 Chipindi icho, vanu davavanga kufilongela fidunda, ‘Tugwilie na kidunda kadodo!’ ‘Tugubike!’ 31 Kwa mana, ngita vanu vakuugitila libiki lidodi ifi, daivecha wuli kwa libiki ligamu?"

32 Vapuga vakavategule vahofu vavili, neke vadochwe pamwi na Yesu. 33 Pevafikile pono pepikemelwa, "Libang'a," Baho vakamvamba Yesu mukipindilihicho. Na vala vahofu vavili vakavambwa kila yumwi mukipindilihicho kyake, yumwi lubali lwa kuliya na yungi palubali lwa kusoto. 34 Yesu akalongile, "Daada uvalekela sambi kwakuva sevichela kyevigita." Baho vakagavine myenda gyake kwa gudugudu. 35 Vanu vakali vemile bahala vakilola. Navo vakomi va Vayawudi vakali vakumbeda akilonga, "Avakombuwe vanu vangi, leke ikombowe yumwene ngita mwene ndi Kilisito, Mkombosi yeahaguliwe na Nguluvi!"

36 Vapuga navo vakamligile vakamuhelelie na kumgavila difwayi njachu. 37 Valongile, "Ngita veve ndakyene ndi Ng'achale va Vayawudi, wuyiwokole yumwene."

38 Filafila vakavikile kibawo kukyanya lya kipindilihicho kyake kyekisimbilwe njowo ichi, "Uyu ndi Ng'achale va Vayawudi."

39 Muwofu yumwi pagati lya vala vevavambilwe, akamligile Yesu, "Wuli, veve se ndi Kilisito mkombosi? Ifyo wikombole yuve na utukombole na nefwe."

40 Ila yula muwofu yungi akamlakila mweyage akilonga, "Wuli, veve seukumwogofya Nguluvi? Veve uhigilwe ngita mwene. 41 Nene na veve tuhigilwe unofu, ifyo tuwanuka mahombo galagala gye tukagagitile. Ila munu uyu seagitile kyokyonda kiwofu." 42 Baho akalongie, "Vee Yesu undiwike na nene pewikwingila pa Ung'achale vako."

43 Yesu akamuhiga, "Ndakyene ndikulongela, neng'uli wivecha na nene kumafunde."

44 Yikali ngita saa sita pamunyi, kukali na kisi pa inyi lyonda mbaka saa tisa, 45 pasiya lyelikali ligawanike pono pavili mukaye lya Nguluvi lyademwike fipande fivili kuhuma pakyanya mbaka panyi. 46 Yesu akavemba kwa lichwi likomi, "Daada mumawoko gyako ndivika numbula lyangu." Peamalile kulonga ago, akafuwe.

47 Yula mkomi va vapuga va lipinga mia Vakilumi pealolile gegahumie akamnjuma Nguluvi akalonga, "Ndakyene uyu akali munu msanzi."

48 Vanu vala vonda vevakali vehele kulola njowo chila, pevalolila gala gegahumie, vawuyile mukaye lyawo kuno vakwitova mkihafu kwa kusugwima. 49 Ila vanu vonda vevamchelie Yesu pamwi na vala vadala yevalongochile pamwi nave kuhuma ku Galilaya, vemile patali vakilola njowo chila.

50 Suwe, kukali na munu yumwi mnofu litawa lyake Yusufu, mwene kaye va mwani va Vayawudi kyekikemelwa Alimataya akali munu msanzi yeaginyilwe.

51 Akali ichindila kwacha kwa ung'achale va Nguluvi. Ata ngita akali ihuma muinyi lya Alimataya yumwi va vakomi mulidamo lya Vayawudi, seidikile gala gyevavagite vayage. 52 Suwe, munu yula ahelelie kwa Pilato, akasukile agavilwe muvili gya Yesu. 53 Akwisile muvili va Yesu kuhuma pa lipindilihicho na akauchungutilie ligubiko, akauvika muugono lyelikali lihogulwe muliganga nalyo likali lave kumvika munu. 54 Kigono ikyo ikali ijumaa, kigono kya kuandalisa kigono kya kutulula.

55 Vala vadala yevalongue na Yesu kuhuma pa Galilaya vevamfwatile Yusufu, na vakaliwene lila muugono na muvili vake Yesu peuvikilwe. 56 Baho vawuyila pakaye, vakatayalisile manung'ililo gya kuubaka mvili gwa Yesu.

Kigono kya kutulula vatulile ngita malagicho gya Musa gegalagichwe.