1 Baho Yesu akavawene vamosi pevakali vehecha usembe chawo mulisanduku lya lusanja lya mukaye lya Nguluvi. 2 Filafila akamwene maye yumwi mwigani ihecha sendi mulisanduku sendi chivili. 3 Suwe, akavalongie, "Ndakyene ndikuvalongela, maye uyu mwigani muhangala ahechile kuchumba vanu vangi vonda. 4 Kwakuva vangi vonda vahechile usembe kidodo kuhuma muuhala vawo, ila uyu maye, ingava muhangala, ahechile kila kinu kyekimtanga kwikala."

5 Vamonga va vachulila vakali viywanga njowo cha Kaye lya Nguluvi, namuna peichengilwe kwa maganga manofu, pamwi na usembe chechihumichwe kwa Nguluvi. 6 Yesu akavalongie, "Aga gyonda gyemkugalola, figono fikwacha kwihela hata liganga limwi lyelisigalia pakyanya lya lingi, kila kinu kitung'uliwa."

7 Baho, vachulila avo vakamuhuchile Yesu, "Muwulanichi njowo icho chihumila panili? Datuwonela kimanyilo liki dakiwonesa kuva pepi njowo icho kuhumila?"

8 Yesu akavahigile, "Muyilolele, mbihile kuchangwa. Kwakuva volofu vihumila na davakwacha kwa litawa lyangu vakilonga, nene ndi Kilisito, kangi davilonga, mwiso va inyi ugehe pepi kwacha. Ila nyenye mbihile kuvafwata. 9 Pempulika njowo cha fita na magudo, mbihile kwogopa, kwakuva makani ago lasima gihumile tandi, ila yila mwiso va inyi wave kufika."

10 Baho Yesu akaendelie kulonga, "Vanu va inyi yimwi davitovana na vanu va inyi yingi, ung'achale umwi daukwitova na ung'achale wungi. 11 Kila pono kwivecha na mganga weuhogoseka, lumyayo na mitamwa gyolofu. Vanu davawona makani makomi gyakogofya na kimanyilo kikomi kihumila kulufunde. 12 Ila ago gonda gakiva gave kuhumila, davavakuvabata, davakuvagudisa na kuvasindika mukaye lya kutang'anila Vayawudi na kuvavika mukiwopo, musindikwa kwa vang'achale na vakomi va vatavala kwakuva nyenye munidikile nene. 13 Na iyi daivecha fwasi lyenu kuvadalikila Njowo Nofu. 14 Muveche vakangafu munumbula chenu kuva damuhiga liki ukoya, 15 kwakuva nene mwene ndikuvagavila njowo cha kulonga na luhala, hata vachindwama venu davawesila hamu kusindana nalyo vala kuipinja. 16 Na nyenye mwikanwa na vasasi venu na lukolo venu na vaganja venu. Na vamonga venu mudochwa. 17 Vanu vonda davakuvavipila nyenye kwakuva nyenye ndi vachulila. 18 Ila hata lufwili lumwi lya mituwe gyenu dalwiyaga. 19 Kufumilila kwa nyenye, damugawokola numbula lyenu.

20 "Pemulola mwani va Yelusalemu uchungutilwe na vapuga, baho muchele kuva chipindi chifikile cha kuhanangwa. 21 Baho vevagehe mu inyi lya Yudea vanyilile mufidunda, na vala vevagehe kumwani vahege, vala vevagehe ku mgunda vabihile kuwuya mu mwani. 22 Kwakuva figono ifyo ndi figono fya kutangwa, neke gyonda gegasimbilwe mukiganulo kya Nguluvi, gagitwe. 23 Davilava, vala vevagehe na lusololo na vala yevikong'elecha kigono ikyo! Kwakuva daivecha na magudo makomi mu inyi na Ngulivi dakuvahiga nongwa vanu ava. 24 Vanu vangi davidochwa kwa lipanga na vanu vangi venyamuliwa vasutu na kusindikwa muinyi yingi. Na vanu se Vayawudi davautavala mwani va Yelusalemu kwa ludali na kuvagudisa vanu avo, mbaka fipindi fyawo pefitimila.

25 "Baho daivecha kimanyilo mulichuwa na mwechi na nondwa. Vanu vonda mu inyi dagivecha na magudo kwakuva lya uwogofu kuhumila na mdilimo na madaba gya inyanza. 26 Vatu davachilika kuhumila na wogofya na kugalola gala makani gegahumila muinyi, kwakuva ludali fya finu fyonda fya kulufunde dachihogocheka. 27 Baho davakumuwona Mwana va Munu ikwacha mu lifunde munya ludali na ukomi. 28 Suwe, pemuwona njowo icho dachihumila, mwime na kwinamula mituwe gyenu kukyanya, kwakuva ukombosi venu ugehe pepi."

29 Baho Yesu akavalongie mufano ugu, "Mulolele libiki lya likuyu na mibiki gingi gyonda. 30 Pemulola givanga kuhumicha makwati, muchele kuva chipindi cha mabenelo gagehe pepi. 31 Na nyeye ifyo ifyo pemuwona makani aga gahumile, mchele kuva ung'achale va Nguluvi ugehe pepi.

32 "Ndakyene ndikuvalongela, vanu va kilelo iki dasekichumba mbaka ago gyonda gagitwe. 33 Luhano na inyi dafichumba, ila njowo changu sengichumba ng'odo.

34 "Mukale meho, numbula chenu chibihile kukwegwa na kulia hilo na kugala na kufwata maisa mahofu. Ngita semwigita ifyo, kigono kya kuwuya kwa Mwana va Munu seichelwa. 35 Kwakuva kikuvachila vanu vonda vevikwikala muinyi. 36 Mukale meho, figono fyonda, mumsuke Nguluvi figono fyonda, neke avatange kuchumba gyonda ambago gegihumila na kukwima pautalo lya Mwana va Munu."

37 Vakati va pamunyi, figono fyonda, Yesu akali ekuvawulanicha vanu mukaye lya Nguluvi na pamie akali ihelela pa Kidunda kya Miseituni na kwikala ukoya. 38 Vanu vonda vakali vilamuka kinyola sagala na vihelela kumpulikicha Yesu peiwulanicha Mukaye lya Nguluvi.