1 Pambele Yesu achumbie kumwani na kufijiji kuno akuvadalikila vanu Njowo Nofu cha ung'achale va Nguluvi. Na vala vachulila chumi na vavili vakahelele pamwi na Yesu. 2 Akalongochine na vadala vamonga yeavahechile mihoka na kuvananicha matamwa. Vadala havo vakali Malia yeahumile ku Magidala, yeahechilwe mahoka saba, 3 na Yoana mdala va Kusa, mnyigendwa mkomi mulidamwa lya Helode na Susana na vadala vangi volofu. Vadala havo vakatumile mali chawo kumgundamikila Yesu na vachulila vake.

4 Kigono kimwi mapinga makomi ga vanu gakali gakwilundasa kuhuma kila mwani na vakumuhelelea Yesu. Na Yesu akavalongie mufano ugu.

5 "Munu yumwi akahele kuvyala mbeyu chake. Peagehe imicha mbeyu icho, chingi chaguwe mung'asi, vanu pevagendile vakachikinyile na fidege fyalie. 6 Mbeyu chingi chaguwe mumganga wene maganga, pechimelile chigamile kwakuva kukali kwihela unyinyafu mumganga. 7 Mbeyu chingi chaguwe mumibiki gya mihomi, gila mihomi na mbeyu chakulile pamwinga, mihomi ikaikekeneka mimelo igo. 8 Mbeyu chingi chaguwe mumhanga mnofu, chamelile na kubaba ilo." Peamalile kulonga ago, akalonga luchowo lwake, alongile, "Munu yeali na masigicha gakupulikicha na agapulikiche!"

9 Vachulila vake Yesu vakamuhuchile mana lya mufano ugo. 10 Yesu akahigile, "Nyenye mugaviliwe umwimike va kuchela undakyene va ung'achale va Nguluvi weufihilwe pamwandi nonde uchelilwe, ila havo vangi ndiywanga navo kwa mifano, neke valole vabihile kulola, pevipulika vabihile kuchela."

11 "Suwe mana lya mufano ugu ndi iyi, mbeyu ndi luchowo lwa Nguluvi. 12 Mbeyu chila chechague mung'asi ndi vala vanu yevipulika luchowo lwa Nguluvi na setani ehelela na kulihecha munumbula chawo, neke vabihile kwidikila na kuwokoka. 13 Mbeyu chila chechague mumganga wene maganga ndi vala vanu pevipulika luchowo lwa Nguluvi na kuliwanuka kwa lukeduko na vene vihela midadikwa, na pevigechwa vekulileka luchowo lwa Nguluvi. 14 Mbeyu chila chechiguwe mumibiki gya mihomi nde vanu vala yevipulika lila luchowo lya Nguluvi, bahobaho pevikwendelela ludodo luchowo lwa Nguluvi lihanangwa na magudo na lukeduko na maisa manofu. Vanu havo sevikula mu mbwatwa lyao. 15 Mbeyu chila chechaguwe pa muhanga mnofu nde vala vanu vevipulika luchowo lwa Nguluvi, vakulikolela na kwidikila kwa numbula chawo na kufumilia na kwendelela kugita njowo chechikumkelisa Nguluvi.

16 "Vanu sevikwasa chibatali na kugubikwa na kiviya awu kuvikwa panyi pa ulili. Ila vanu huivika pakwanya pa kisusu neke vanu pevukwingila mugati vavese kulola welu.

17 "Ifyoifyo kinu kyokyonda kyekifihiliwe kivecha pelu pee na kinu kyokyonda kyekigubikwe kichelwa na kuvikwa pawelu.

18 "Mwilole na pemkugapulikicha, kwakuva munu yeage na kinu hulutichilwa, ila yeseagehe na kinu inyagwa hata kila kidodo kyeinakyo."

19 Baho maye vake Yesu na vakololo vake Yesu vakamuhelelie, ila sevawesile kuhelela pepi lyake kwakuva kukali na lipinga likomi lya vanu. 20 Munu yumwi akamlongie Yesu, "Maye vako na lukololo vako vaimile kwivala visaka kukulola."

21 Ila Yesu avalongie vanu vonda, "Maye vangu na lukololo vangu nde vala yevipulika luchowo lwa Nguluvi na kulidikila."

22 Kigono kimwi, Yesu akakang'ie wato pamwi na vachulila vake, akavalongie, "Tuhagame kumwambo lya lihiva." Baho vavangile lugendo. 23 Pevali mulugendo, Yesu avasile tulo. Bahobaho likala likomi likavanga kupuga mulihiva, malenga gavangile kwingila mugati lya wato na vonda vasakile kudibala. 24 Vala vachulila vakamhelelie Yesu, vakamlamuse vakilonga, "Mtwa, Mtwa! Twidibala!"

Yesu kalamka, akaulakila likala na madaba gya malenga, nago gakatulie, kukali kunofu. 25 Avalongie, "Mbatwa lyenu igehe kwiya?"

Ila vene vakadudwive vakaogofya kuno vakwilongela, "Munu uyu ndi ani? Yeilakilila lukala na madaba gikumdikila!"

26 Yesu na vachulila vake vakaendelie na lugendo, vakafikile muinyi lya Vagelasi, yeigee kumwambo lya lihiva ku Galilaya. 27 Yesu peikali ikwika muwato, akahelele muling'umbung'umbu lya lihiva, akatang'ana na munu yumwi yekali na mahoka. Munu huyu seafwalige myenda kwa figono fyolofu, vala seihela kaye, ila akali ikwikala muugono. 28 Peamwene Yesu akavembile akamgwilie Yesu, baho akabwatile, "Veve Yesu Mwana va Nguluvi yeagehe kukyanya va finu fyonda, ukela liki kwa nene? Ndikusuka ubihile kuniguda!" 29 Munu uyu alongile yendena kwakuva Yesu akali amlakalile yula lihoka lihafu amuhege. Lihoka lila likali likumwingilaga munu uyu, hata ngita vanu vakumuhopa mawoko na magulu gyake kwa ndegei gya kyuma, mwene akali akwichidumula ndegei icho cha kyuma na mahoka vakamsindike mbaka kuwelu.

30 Yesu amuhuchiche, "Litawa lyako ani?" Amhigile, "Litawa lyangu ndi ‘Lipinga’" Kwakuva akali na mihoka myolofu. 31 Havo mihoka vamsukile Yesu abihile kuvasindika mulilindi selihela mwiso.

32 Pono pala pakali na lipinga likomi lya migubi muligema lya kidunda veliya. Suwe mahoka mahafu gakamsukile Yesu vavaingile vala vangubi, Yesu akavaleka vavaingile. 33 Mahoka hago gamuhumile yula munu, kwingila kwa ngubi, lipinga lyonda lya vangubi vakanyilie palingema lya Galilaya, vakafwilie mumalenga.

34 Vala vakwamila ngubi pevalolile gala gegahumile vakanyilie, kuvalandulila vanu njowo icho mumwani na mufijiji. 35 Vanu vachile kulola gegahumile. Pevafikile kwa Yesu, vakamwene yula munu yeananichwe mahoka ekalile pepi na Yesu kuno afwalile mwenda na luhala lwake chikamuwuyile kangi, vanu vonda vakaogofya. 36 Vala vanu yevalolile kyegihumile vakavahumulile munu munya mahoka peananichwe. 37 Vanu va inyi lya Gelasi vakaogofya hilo. Ndeni, vakamsukile Yesu ahege. Ifyo Yesu akaingile muwato, neke ahege. 38 Yula munu yeahumilwe na lihoka lihafu akamsukile ahege pamwi nave.

Ila Yesu akamkanile na kumlongela, 39 "Wuye pakaye, ukavahumulile vanu kila kyeakugitile Nguluvi." Ifyo yula munu akahele kumwani yonda akavalongela vanu fila Yesu gyeamgitile.

40 Yesu peawuyile palubali lungi lwa lihiva, lipinga lya vanu vakamwanuke kwa ukeduko, kwakuva vonda vakali vekumchindila. 41 Baho akaachile munu yumwi yeakemeliwe Yailo, mkomi va kaye lya kutang'anila Vayawudi. Akafugamile pautalo lya Yesu, akamsukile ahele kukaye lyake, 42 kwakuva muhinja vake iyena, yeakali na myaka chumi na givili, akali pepi kufua.

Yesu peakali ihelela, vanu vakali vakumkekenecha kila paubali. 43 Mulipinga lila lya vanu kukali na mdala yumwi, yeakali na luholovela lya danda kwa myaka chumi na givili, akasindile sendi chake chonda kwa valami, ila kwihela munu yeyonda yeawesile kumnanicha. 44 Mdala huyo akamuhelelie Yesu kumbele na kubyalisa ubindo lwa mwenda lwa Yesu, bahobaho danda ikamlekile kumuhuma. 45 Yesu akahuchile, "Ndi ani yeanibyalise?"

Vanu vonda vakakanile. Peteli akamlongie, "Mtwa, lipinga lya vanu likuchungutile na kukukekeneka!"

46 Ila Yesu akalongile, "Agehe munu yeanibyalise, kwakuva ndewene ludali lwangu chimnaniche munu." 47 Yula mdala pealolile kuva seiwesa kwifiya, ahumile kuno itetema, akafugamile pautalo lya Yesu. Kavanga kuvahumulila vanu vonda wuli ambyalise Yesu na bahobaho akananichwe. 48 Yesu akamlongie, "Maye, mbatwa lyako ikunaniche. Bite na utengamaso."

49 Yesu peakali have kulonga, akaachile mnyigendwa kuhuma kaye lya mkomi Yailo, akamlongile Yailo "Muhinja vako afuwe, bihile kumsumbula muwulanichi."

50 Yesu peapulike ago, akamlongie Yailo, "Bihile kwogofya, dikile hela na muhinja vako dainana."

51 Peafikile kukaye lya Yailo, akavakanila vanu vabihile kwingila mugati pamwinga, ila vahingile Peteli na Yohani na Yakobo na vasasi va yula mwana muhinja. 52 Vanu vonda vakali vivemba na kukivilicha, Yesu avalongie, "Mbihile kuvemba kwakuva mwana seafuwe ila avasile tulo hela!"

53 Vanu vonda vakamuhekile Yesu, kwakuva vachelile kuva muhinja yula afuwe. 54 Ila Yesu akamkolile liwoko na kumlongela, "Mwana, lamke!" 55 Uwumi vake ikamuwuyile muhinja yula, bahobaho akalamwike. Baho Yesu akavalongie vamgavile kyakuliya. 56 Vasasi vake vadudwive, ila Yesu akavakanile vabihile kumulongela munu yeyonda njowo chechahumile.