1 Yesu avalongie vachulila vake, kukali na mmosi yumwi yeakali na muhimilicha va finu fyake. Mmosi uyu akapulike kuva muhimilicha va finu fyake, ekuyaganicha sendi cha mtwa vake, 2 ndeni, kamkemela mugati akamuhucha, ndi njowo liki chendipulika kwa veve? Ndivalile finu fyonda fyeuwanuke na fyeuhechile, kwakuva seuvesa kangi kuvecha muhimilicha va finu fyangu. 3 Yula muhimilicha akahochile munumbula lyake, Mtwa vangu ekunidaga mukasi lyangu. Ndigita liki? Kuhelela kugima sendiwesa, kuhelela kusuka ndiwona nyoni. 4 Ndakyene, ndichela kya kugita, neke pendidagwa mukasi lyangu, vanu vanihanuke mukaye chawo. 5 "Ndeni yula muhimilicha akavakemele vanu vonda yevakali vidailwa na mkomi vake. Akamuhuchile yealonguwe kwanja, ‘Wuli, widailwa liki na mtwa vangu?’ 6 Mwene akamuhigile, ‘Mapipa miya gya mafuta ga miseituni.’ Yula muhimilicha akamlongie, ‘Tegule kiganulo kyako kya deni na wusimbe mapipa hamusini.’ 7 Akamuhucha yeidailwa yungi, ‘Na veve widailwa liki?’ Akamuhigile, ‘Maloboto miya gya mpunga.’ Yula muhimilicha akamlongie, ‘Tegule kiganulo kyako kya deni na wusimbe maloboto semanini.’

8 "Suwe, yula mtwa akamnjuma yula muhimilicha yesedikilwa, kwakuva agitile kinu kwa luhala. Kwakuva vanu vawofu va inyi sevakumdikila Nguluvi vigita kasi chawo kwa luhala kugina vala vanu vevakumdikila Nguluvi." 9 Yesu akaendelie kulonga, "Nene ndikuvalongela, muvatange vaganja venu kwa mali chenu chiwofu cha baha muinyi, neke pechisila, muwanukwe na vandumindumi va kuluhano kwa Nguluvi mbepali. 10 Munu yeyonda yeagehe mwidikilwa munjowo ndodo, ivecha mwidikiiwa munjowo ngomi, yeyonda yeibihila kwidikila njowo ndodo, seivecha mwidikilwa munjowo ngomi. 11 Ngita nyenye sevadikila kuvika mali cha inyi, ndi ani yeakuvagavila mali cha undakyene? 12 Ngita nyenye sevadikila mumali lya munu yungi, ndi ani yeakuvagavila mali chenu nyenye vavene?

13 "Kwihela mnyigendwa yeiwesa kuvagundamikila vatwa vavili, kwakuva daakumvipila yumwi na kumkela yungi, awu kwiwunga na yungi na kumubeda yungi. Semwiwesa kumgumbanikila Nguluvi na sendi."

14 Kwa fila Mafalisayo vakali vikela sendi, pevapulike ago, vakambeda Yesu. 15 Yesu akavalongie, "Nyenye mwikwigita vasanzi pautalo lya vanu, ila Nguluvi akuchichela numbula chenu. Kwakuva kinu kyekiwoneka kya unginyange, ila Nguluvi akugavipila."

16 "Malagicho gya Musa na masimbo gya vavichi va Nguluvi gakali gekuvalongocha mbaka chipindi cha Yohani Mbatisa. Kuhuma vakati ugo, njowo cha Ung'achale va Nguluvi chadalikilwe na kila vanu viswitilichwa kwingila mu Ung'achale va Nguluvi. 17 Ila ndi upefu hilo luhano na inyi kuyaganika, kuchumba kuhechwa helufi ndodo mumalagicho."

18 "Munu yeyonda yeakumleka mdala vake na kumtola yungi igita ugoni na munu yeakumtola mdala yealekilwe igita ugoni."

19 "Yesu akaendelie kuywanga, pakali na munu yumwi mmosi, akali ifwala myenda gya sendi ngomi hilo na akali akwikala maisa gya kwikedusa mwene." 20 Pamulyangilo mkomi pa yula mmosi akaletilwe mhangala yumwi litawa lyake Lasalo, akali amemile fikong'o muvili vonda. 21 Lasalo adobokile kugavilwa masigalio gegaguwe kuhuma pa mesa lya yula mmosi. Na mibuwa vakali vakumuheleliye na kumnafilicha fikong'o fyake. 22 "Pambele Lasalo akafue, baho vandumindumi va kuluhano kwa Nguluvi vakamtegule na vakamvika pepi na Ibulahimu. Munu mmosi filafila akafue, baho akasihilwe. 23 Yula mmosi akali na magudo ukoya ku inyi lya vanu yevafuwe, akalolile kukyanya, akamwene Ibulahimu kwa utali pamwi na Lasalo yeakali pepi lyake. 24 Ifyo yula mmosi akamkemela, ‘Daada Ibulahimu, niwonele lusungu! Mlagiche Lasalo achwike kyala kyake mumalenga apoleche lulimi lyangu, kwakuva nene ndigehe mumagudo makomi mulyoto ugu.’ 25 Ila Ibulahimu akamuhigile, ‘Uwike mwana vangu, peukali wikwikala kwako ukawanuke njowo nofu, ila Lasalo akawanuke makani mahofu. Ila nonde Lasalo agehe baha ekeduka. 26 Pamwi na ago, pagati lyetu na nyenye kuvikilwe lilindi likomi, neke munu yeisaka kuhagama kuhuma kuno kwacha kwa nyenye alemwe, filafila kwehela munu yeiswesa kuhagama kuhuma kwa nyenye kwacha kwa nefwe.’ 27 Yula munu mmosi akalongile, ‘Nonde ndikusuka daada vangu mlagiche Lasalo ahele kukaye lyangu, 28 mumo kugehe na vakolo vangu vahanu. Mleke ahele kuvalongela, vabahile kugita sambi, neke vabihile kwacha baha pono pamagudo.’ 29 Ibulahimu akamuhingie, ‘Ukoya kwevagehe lukolo vako, vagehe na malagicho gya Musa na Vavichi va Nguluvi, valeke vavapulike havo.’ 30 Ila mmosi akalongie, ‘Hamu, daada Ibulahimu. Ila ngita munu ichulubuka kuhuma mu inyi lya vanu vevafuwe na kuvahelelea davileka sambi na kumuwuyila Nguluvi.’ 31 Ibulahimu akamlongela, ‘Ngita sevidikila malagilicho gya Musa na vavichi va Nguluvi, sevidikila hata munu yeachulubuke kuhuma mu inyi lya vevafuwe.’"