1 Kigono kimwi kya Kutulula, Yesu na vachulila vake vakali vichumba mu mgunda lwa upemba. Vachulila vake vavangile ku denya mihocho gya upemba, vakanyukile mumawoko gyawo na kulia. 2 Vamonga Vafalisayo vakavahucha vachulila, "Wuli mwigita kinu kyekikanilwe mukigono kya Kutulula?"

3 Yesu akavahigile, "Wuli semkwimbile kye agitile Dawudi pamwi na vayage pevali na njala? 4 Dawudi akaingile mukaye lya Nguluvi, akanyamue gila mibumunda yeihechilwe kwa Nguluvi, akalie na ndenandena akavagavile vayage. Malagicho ikumkanila munu kulia mibumunda igo ila vatekechi hela" 5 Yesu akavalongie, "Mwana va munu ndi Mtwa va Kigono kya Kutulula."

6 Kigono kingi kya Kutulula, Yesu ingie mu Kaye lya Kutang'anila Vayawudi na kuvawulanicha. Mula mugati kukali na munu munya liwoko lyandeo lyelugasile. 7 Vafalisayo na vawulanichi va malagicho vakali visaka nongwa lya kumulata Yesu, ifyo vakali vakumlolela kwa pepi neke valole ngita ngaamnaniche munu mu Kigono kya Kutulula. 8 Ila Yesu achelile mahocho gawo, akamlongie yula munu munya liwoko lugaso, "Wime kwime pagatigati." Yula munu akahele kwima pagatigati. 9 Baho, Yesu akavahuchile vawulanicha va Malagilicho na Vafwalisayo, "Kuhumila na Malagilicho gyetu, nde unofu Kigono kya Kutulula kugita lukani lunofu awu kugita lukani luhofu? Kunanicha wumi va munu awu kumdocha?" 10 Akavalolile vanu vonda vevagehe baho, baho akamlongile yula munu munya liwoko lugaso, "Gonjolola liwoko lyako!" Akagitile ngita Yesu peamlongie na liwoko lyake ukananilwe.

11 Ila vawulanichi va malagicho na Vafalisayo vakavipile hilo, vakalonganile vamgitile liki Yesu.

12 Mufigono ifyo Yesu akakang'ie pakidunda kufunya, ekalile meho pamie wonda ekumsuka Nguluvi. 13 Kilawu lyake, Yesu akavakemelie vachulila vake na mugati lyawo akavahaguwe vanu chumi na vavili yeavakemelie vanjagila. 14 Simoni, Yesu amgavile litawa lingi Peteli na Andelea lukololo vake Simoni, Yakobo na Yohani na Filipo na Batolomeo, 15 Matayo na Tomasi na Yakobo mwana va Alifayo na Simoni yeakemeliwe Selote, mana lyake mtovanila inyi lya Isilaeli. 16 Yuda Mwana va Yakobo na Yuda Sikalioti, pambele achile kumkana Yesu.

17 Yesu peikile kukidunda pamwi na vanjagila vake, akaimile mulitava na lipinga likomi lya vachulila vake. Lipinga likomi lya vanu yevahumile inyi chonda cha Yudea na mwani va Yelusalemu na yevahumile mumbwani lya mwani lya Tilo na Sidoni. 18 Vanu havo vakaachile kumpulikicha Yesu na kunanichwa matamwa gyawo. Vanu vonda vevagudilwe na mahoka mihafu vakaachile vakananichilwe. 19 Vanu vonda vasakile kumbyalisa Yesu, kwakuva ludali lwa Nguluvi lukali lwihuma na kuvananicha vanu vonda.

20 Yesu avalolie vachulila vake na kuvalongela,

"Mufunyilwe nyenye vahangala,

kwakuva Ung'achale va Nguluvi ndi venu.

21 Vafunyilwe nyenye yemwigehe na njala nonde,

kwakuva pambele mugwita.

Mufunyilwe nyenye yemuvemba nonde,

Kwakuva pambele mwiheka.

22 "Mufunyilwe nyenye vanu pevakuvavipila na kuvanenga na kuvaliga na kuvalonga nyenye nde vawofu, kwakuva lya litawa lya Mwana va Munu. 23 Baho pamwandi vagogolo vetu vakavagitila ndeni Vavichi va Nguluvi, ndeni njowo icho pegivahumila, mukeduke na kukina, kwakuva mwipatila fupo ngomi kuluhano.

24 Ila damwilava nyenye vamosi,

kwakuva mpatile suwe lukeduko lwenu.

25 Damwilava nyenye mwemgwite nonde,

kwakuva pambele mwipulika njala.

Damwilava nyenye yemwiheka nonde,

kwakuva pambele mwikivilicha na kuvemba.

26 "Damwilava nyenye vanu pevakuvanjuma, kwakuva endehe nde vagogolo vawo vakavagitilie vavichi va udesi.

27 "Ila ndikuvalongela nyenye yemukunipulikicha, muvakele vachindwama venu, muvagitile unofu vala vevakuvavipila. 28 Muvasukile lufunyo kwa Nguluvi vala yevevakutola avagitile njowo nofu, muvasukile kwa Nguluvi vala vevakuvagitila mawofu. 29 Ngita munu peakutovile njeche limwi msedukile na njeche lingi. Munu peakunyagile mwenda vako filafila mlekele na ligwanda lyako. 30 Munu yeakusuka mgavile, ngita munu akikunyanga mali chako bihile kumlongela akuwisile. 31 Muvagitile vanu vangi kila kyemkela nyenye vavagitile.

32 "Ngita mkuvakela vala yevakuvakela nyenye, mwipata fupo liki? Kwihela! Ata venye sambi vakuvakela vanu yevakuvakela. 33 Ngita mkivagitila manofu vala vanu yevakuvagitila manofu, mwipata fupo liki? Ata vene sambi ugita ndeni. 34 Ngita mukivakopela vala vekumchindila vakuvahomba, mwipata fupo liki? Ata venye sambi huvakopela vayao na kuhocha davawisilwa. 35 Ila nyenye muvakele vachindwama venu na kuvagitila manofu, muvakopele, mbihile kuhocha kuwisilwa. Baho, fupo lyenu livecha likomi na pemwigita ndeni mwigita ndeni ndeni ngita vana va Nguluvi yeagehe kukyanya lya kila kinu pevang'ang'wa kugita. Kwakuva mwene ndi msanzi kwa vala vevihela luhongecho na vala vawofu. 36 Muveche na lusungu ngita Daada venu yeagehe na lusungu.

37 "Mbihile kuvahiga vanu vangi na Nguluvi sevakuvahiga, mbihile kuvagitila vayenu mawofu na Nguluvi sevakuvagitila mawofu, muvawonile lusungu vangi na Nguluvi vekuvawonela lusungu. 38 Muvagavile vanu vangi finu fefikela na Nguluvi akuvagavila kyemkela. Mwiwanuka mumawoko gyenu kigelo kye kimemile na kukingindwa mbaka kusukuka, kwakuva kigelo kikila kyemwitumila kwa vangi ndikyo Nguluvi itumila kwa nyenye ndeni."

39 Baho Yesu akavalongie mufano ugu, "Wuli yeabofwike meho ivesa kumwongocha yeabofwike meho muyage? Pevagita ndena vonda vegwilila mulilindi. 40 Kwihela mchulila yekumgina muwulanichi vake, ila kila mchulila peisinda mawulanichi ivecha ngita muwulanichi vake.

41 "Wuli wilolela kibako mumeho lya lukololo vako, ila seukulilola libiki leligehe mumeho gako? 42 Awu, wiwesa kumlongela lukololo vako, ‘Lukolo vangu, leke ndikuheche kibako mumeho gako,’ Na kuno seukuilola libiki leligehe mumeho gyako? Veve mfyangu! Heche tandi libiki leligehe mumeho gyako, baho wilola unofu na kuhecha kibako kyekigehe mumeho mwa lukololo vako.

43 "Libiki linofu seliwesa kubaba manunu mawofu, filafila kwihela libiki liwofu seliwesa kubaba manunu manofu. 44 Vanu huchela libiki kwa manunu gyake. Kwakuva vanu sevinokola mapela mumihomi, vala sevinokola sabibu mumiswampondo. 45 Munu msanji huhecha manofu gegagehe munumbula lyake na munu muwofu uhumicha mawofu kuhuma munumbula lyake. Kwakuva munu ulonga njowo chechimemile mnumbula lyake.

46 "Wuli mukunikemela ‘Mtwa, Mtwa,’ Na kuno semwigita gala gendikuvalongela? 47 Ndikuvawonesa ewoneka wuli munu yeyonda yula yeikwacha kwanene na yeipulikicha njowo changu na kuchigita. 48 Huyu iwana na munu yeichengile kaye lyake, agimile panyi hilo na kuvika musingi pakyanya paliganga, kukahumile na ulava na kuitova yila kaye ila seihogosike kwakuva ichengilwe unofu. 49 Ila munu yeyonda yeipulikicha njowo changu na seigita ngita peitakilwa, uyo iwana na munu yeachengile kaye pakyanya lya muhanga na seagimile musingi, ulava gakahumile na kuhogosa kaye ikague na kwanangika tukutuku!"