1 Mkomi Tewofili.

Vanu volofu vakavangile kuisimba ngita vavesile makani gala gyegikahumile pagati lya nefwe. 2 Vayasimbile makani ago ngita petuhumulilwe na vanu vala vevakali vachiwene makani ago kwa meho gaho kuvangila pamwandi lya kasi lya Yesu. Avo yevalanduche kasi lya Yesu. 3 Veve mkomi Teofili, nene ndiwene ndisake njowo ichi kuhuma pamwandi, ndilolile unofu kukusimbila kwa undakyene njowo chechihumile. 4 Ndigita ndena neke na veve uchele undakyene vonda va njowo cheuwulanichwe.

5 Pafigono fila Helode peakali ng'achale va inyi lya Yudea, pakali na mtekechi yumwi, yeakemeliwe Sakalia, yeakali lipinga lya vatekechi va Abiya. Mdala vake akemeliwe Elisabeti nave akali va lukolo va mtekechi Haluni. 6 Vonda vavili vakali vasanzi pautalo lya Nguluvi, kuno vakolele hilo malagilicho gyonda gya Mtwa. 7 Vakali vahela vana, kwakuva Elisabeti akali mgulumbafu, navo vonda vavili vakali vagogolo hilo.

8 Kigono kimwi, Sakalia akali samu lyake lya kugita kasi lyake lya utekechi mukaye lya Nguluvi, 9 akahaguliwe kwa gudugudu, ngita pevachoviye vatekechi. Ndena Sakalia akaingile mukaye lya Mtwa akatutumiche ubani. 10 Vakati va kututumicha ubani peufikile, lipinga lya vanu vakali kwivala vakali va kumsuka Nguluvi. 11 Baho, ndumindumi va kuluhano va Mtwa amuhumile, akahimile palubali lwa ndewo pala pa kindangavala cha maganga pa kututumicha ubani. 12 Sakalia peamwonile, atinwike na kuogofya. 13 Ila ndumindumi va kuluhano va Nguluvi akamlongie, "Sakalia bihile kwogofya, kwakuva Nguluvi apulike kusuka kwako. Mdala vako Elisabeti akubabila mwana mkigosi na veve daukumkemela Yohani. 14 Na yuve wivecha na lukeduko hilo na vanu wolofu vikeduka kubabwa kwa mwene. 15 Ivecha mkomi pautalo pa Mtwa. Seinyuwa difwayi vala ugimbi. Imemechwa Muhe va Nguluvi akiva mulileme lya maye vake. 16 Yohani akuvawisa vanu volofu Vaisilaeli vamuwuyile Mtwa Nguluvi vao. 17 Ilongola pautalo pa Mtwa na ilongochwa na ludali na muhe ngita lya Elia, vadadi akuvakela kangi vana vawo, akuvawuyisa vanu se vasanzi na vawuye mumahocho manofu, ngita vanu vevakumuidikila Nguluvi, akuvagita vanu vayiandalise kumwanuka Mtwa."

18 Sakalia amwuchile yula ndumindumi va kuluhano kwa Nguluvi, "Ndichela wuli kuva lukani hulu ndi lya undakyene? Nene na mdala vangu ndi vagogolo." 19 Ndumindumi yula va kuluhano va Nguluvi akamhigile, "Nene ndi Gabilieli, nene nde ndumindumi va Nguluvi, Mwene ndeanilagiche ndilonge na veve ndikulongele njowo ichi nofu. 20 Seuwesa kuywanga, kwakuva seuidikile aga njowo changu, gegitimila kwa vakati gyake. Sewiwesa kulonga mbaka ago gendikulongie pegihumila."

21 Vakati ugo, vanu vevakali vakumchindila Sakalia, vakahochile wuli akwikala hilo mukaye lya Nguluvi. 22 Peahumile kwivala, seavesile kulonga na vala vanu, akalonga navo kwa mawoko, ndeni vakachele kuva akawoniswe kinu na Mtwa mugati lya kaye lya Nguluvi.

23 Peamalile kasi lyake mu kaye lya Nguluvi, Sakalia akawuyile kukaye lyake. 24 Pambele Elisabeti mdala va Sakaliya akapatile lusololo. Seahegile mukaye lyake kwa mihechi gihanu. 25 Akalonga, "Endena nde Mtwa anigitile na kuniwonela lusungu, ahechile nyoni lyangu lyakulemuwa kubaba pautalo lya vanu!"

26 Elisabeti pe akali na lusololo lya mihechi sita, Nguluvi akamlagiliche ndumindumi va kuluhano kwa Nguluvi litawa lyake Gabilieli, ahelele ku mwani va Nasaleti inyi lya Galilaya, 27 kwa muhinja yumwi yeikemelwa Malia yeahetilwe na Yusufu yeahumile mulukolo lwa Dawudi. 28 Ndumindumi uyo va kuluhano va Nguluvi akamuhelelie Malia na kumlongela, "Kamwene! Mtwa agehe pamwi na veve na mwene akufunyile!"

29 Maliya peapulike njowo icho akatinwike munumbula lyake na akahochile njowo ichi china mana liki? 30 Ndumindumi uyo va kuluhano kwa Nguluvi akamlongie, "Malia ubihile kwogofya, Nguluvi kakugavila usanzi. 31 Wipata lusololo, nave ukumbaba mwana mkigosi na ukumkemela Yesu. 32 Ivecha mkomi na ekemelwa Mwana va Nguluvi yeagehe Kukyanya va finu fyonda. Mtwa Nguluvi daakumgavila kigoda kya ung'achale ngita peakali kuukuu vake Dawudi. 33 Ivecha ng'achale va vana va Yakobo mbepali na ung'achale vake sewusila ng'odo." 34 Malia amuhuchile ndumindumi va kuluhano va Nguluvi, "Nene nde muhinja sendikumchela mgosi. Ivecha wuli luchowo ulu?" 35 Ndumindumi va kuluhano kukyanya kwa Nguluvi akamhigile, "Muhe va Nguluvi daukwikila na ludali lwake Nguluvi daukugubika, ndena Mwana yeibabwa daikemelwa Mng'alili, Mwana va Nguluvi. 36 Uchele kuva lukolo vako Elisabeti apatile lusololo ku ugogolo vake na ugu ndi mwechi gwake gwa sita, mwene yeacheliwe na vanu kuva seivesa kubaba mwana, 37 kwakuva kwihela seliwesekana kwa Nguluvi." 38 Malia alongile, "Nene ndi mnyigendwa va Mtwa, ndigitwe ngita ulongile." Baho ndumindumi va kuluhano kwa Nguluvi ahegile.

39 Figono fifila, Malia akagitile kisatu kubita ku mwani yeugehe pafidunda fya Yudea. 40 Ukoya akaingile mukaye lya Sakalia na kumhungila Elisabeti. 41 Elisabeti peapulike Malia akumhungila, kyali ipindule mulileme lya Elisabeti. Baho ludali cha Muhe va Nguluvi chikamwingile Elisabeti, 42 alongile kwa lichwi likomi, "Ufunyilwe veve kuchumba vadala vonda na mwana yeukumbaba afunyilwe! 43 Kwa liki njowo ulu lunihumie nene, hata maye va Mtwa vangu anigendelie nene! 44 Pendipulike ukunihungila, kyali kyekikali mulileme lyangu akakeduke na ipindue. 45 Ufunyilwe veve yeudikile, kuva ivecha ndakyene kyealongile Mtwa."

46 Malia alongile,

"Numbula lyangu imnjuma Mtwa,

47 Numbula lyangu ekumkedukila Nguluvi yeagehe mkombosi vangu,

48 Kwakuva andiwikile nene mnyigendwa vake mdodo.

Kuhuma nonde na kuendeleya filelo fyonda vakunikemela nene ndifunyilwe,

49 Kwakuva Nguluvi munya Ngufu andigitie makomi.

Litawa lyake ndi ling'alili na seliwananiswa na litawa lingi.

50 Akuvawonela lusungu vala vevakumwogofya Nguluvi,

Lusungu lyake ikwikala kilelo mbaka kilelo.

51 Agitile njowo chikomi kwa liwoko lyake,

Kavayaganisa vanu venye kidada mumahocho gya mnumbula chawo.

52 Avakwisile vang'achale mufigoda fyawo fya ung'achale.

Avanamule vala vevakali vadodo.

53 Venye njala avagwitise kwa finu finofu,

Vamosi avadagile mawoko ng'ani.

54 Kamutanga mchulila vake Isilaeli,

Akiendeleya kuvawika kuvawonela lusungu.

55 Daavawika kuvawonela lusungu

Ibulahimu na filelo fyake mbepali."

56 Malia ekalile kwa Elisabeti mihechi gidatu, baho akuwuyile pakaye lyake.

57 Figono fya kubaba kwake Elisabeti pe fifikile, ababile mwana mkigosi. 58 Vapepi na vakolo vake pevapulike kuva Mtwa amwonie lusungu hilo, navo vakedusile pamwi na mwene.

59 Mwana pafikile figono finane, vakamdumule bina. Vakasakile kumgavila litawa lya daada vake, yeakemeliwe Sakalia. 60 Ila maye vake alongile "Ndaa! Litawa lyake ikemelwa Yohani."

61 Vakamlongie, "Kwihela munu yeyonda mulukolo lyenu yeakali na litawa ngita ilyo.?" 62 Baho vamgitile kimanyilo Sakaliya daada va yula mwana, neke kuchela kuva mwene ekela kumtambucha litawa ani.

63 Sakalia asukile kibawu kya kusimbilia, asimbile endena, "Litawa ndi Yohani." Vanu vonda vakadudwive! 64 Bahobaho, Sakalia avangile kulonga kangi, akavanga kumfunya Nguluvi. 65 Vapepi vake vakaogofya na luchowo lila lyalutie kila pono pa fidunda fya inyi lya Yudea. 66 Kila yumwi yeapulike luchowo lila, akahochile munumbula lyake akwihucha, "Mwana uyo ivecha munu wuli?" Kwakuva ndakyene ludali cha Mtwa chikali pamwi na mwene.

67 Sakalia, daada vake Yohani, amemichwe Muhe va Nguluvi, nave akalonga uvichi ugu kuhuma kwa Nguluvi,

68 "Tumnjume Mtwa Nguluvi va Isilaeli,

Kwakuva avaachile vanu vake na kuvawokola.

69 Atugavile Mkombosi munya ludali,

kilelo kya Dawudi mchulila vake.

70 Ngita alongile kuhuma pamwandi

Kuchumbila vavichi vang'alili,

71 Kuva akutukombola kuhuma kwa vachindwamwa vetu,

na kuhuma muludali lwa vanu vonda vevikutuvipila.

72 Alongile akuvawonela lusungu vagogolo vetu,

na daiwika lyagano lyake ling'alili.

73 Kilapo kyeamlapie mgogolo vetu Ibulahimu,

74 kutukombola kwa vachindwamwa vetu,

Atutange tuvese kumgundamikila mwene bila kogofya,

75 Neke tugite ngita Nguluvi peikela na vadikiliwa pautalo pa Nguluvi,

Figono fyonda fya wumi vetu.

76 Veve mwana vangu wikemelwa mvichi va Nguluvi yeagehe kukyanya lya finu fyonda.

Ukumlongolola Mtwa umgololie ng'asi lyake,

77 Kavalongela vanu vake kuva mwikombolewa,

kwa kuvahechela sambi chawo.

78 Ukelo va Nguluvi vetu na lusungu vake.

Ukutung'alachila ngita lichuwa pelihumila kukyanya,

79 Kwa nefwe twitukala mukisi na vala vevikala munyigi lya kufuwa,

welu ulo ukutulongocha muwumi na mulutengamaso."

80 Mwana akulile na kwongeseka ludali mumuhe. Ekalile kudasi mbaka kigono kila peibwitukile kwa vanu va Isilaeli.