1 Vakati ugougo kukali na vanu yevamlongie Yesu njowo cha vanu va ku Galilaya yevadochilwe na Pilato na danda lya vanu havo ikahang'anikana na usembe yevakali vekumuhechela Nguluvi. 2 Yesu akavahigile, "Mwihocha kuva vanu va ku Galilaya yevagitilwe endena kwakuva vakali na sambi kuvagina vanu va ku Galilaya vangi vonda? 3 Hamu, ndakyene ndikuvalongela, ngita semwileka sambi na nyenye mwidochwa ngita vawo. 4 Wuli vala vanu chumi na vanane yevafue kwa kugwiliwa na lilingo ukoya Siloamu, ndeni mwihocha vawo vakali na sambi kuchumba vangi vonda yevakalile ku Yelusalemu? 5 Hamu, ndakyene ndikuvalongela, ngita semwileka sambi na kumuwuyila Nguluvi na nyenye mwidochwa ngita vawo."

6 Baho Yesu akavalongile mufano ugu, "Munu yumwi akavyalile libiki lya likuyu mumgunda vake va masabibu. Akahelela kusaka linunu mulibiki ilyo, ila sealipatile. 7 Baho, munu yula akamlongie mnyigendwa va mgunda ugo, ‘Lole kwa myaka midatu ndikali ndikwacha kunokola manunu ga libiki ilyi na nene sendipatile hata limwi. Udumule! Wuli uwendelise kuhananga muhanga?’ 8 Ila mnyigendwa va mgunda ugo, akamlongie, ‘Mtwa, tuuleke kangi mwaka ugu, ndikuutufulila mganga na kuvika mboleya. 9 Ngita daubaba manunu ivecha unofu, ila ngita seubaba daudumula.’"

10 Mu Kigono kya Kutulula, Yesu akali iwulanicha mukaye lya kutang'anila Vayawudi. 11 Baho pakali na mdala, akali na lihoka lyelimgitile atamike kwa miyaka chumi na nane, lihoka ilyo likamgitile agogombile sewesile kwigolola. 12 Yesu peamuwene, akamkemela na akamlongie, "Maye, unanichwe utamwa vako." 13 Baho Yesu akamvikile liwoko mdala yula bahobaho akagolwike na akavanga kumnjuma Nguluvi.

14 Ila mkomi va kaye lya kutang'anila Vayawudi akavipile kwakuva Yesu akali amnaniche mdala yula mu Kigono kya Kutulula. Ifyo akavalongie vala vanu yevalundine bahala, "Mugehe na figono sita fya kugita kasi. Ifyo mwache mufigono ifyo mnanichwe utamwa venu, ila mbihile kwacha mu Kigono kya Kutulila."

15 Baho Mtwa akamuhigile, "Nyenye vafyangu! Ani pagati lyenu yeakumuwopola senga vake awu lipunda lyake kuhuma mukivingilili mu Kigono kya Kutulula na kumlongocha kunyuwa malenga? 16 Muhinja uyu ndi ulelo va Ibulahimu, yeabatilwe na Setani kwa myaka chumi na nane. Wuli, seunofu kumdindula ndegei cha kyuma Mukigono kya Kutulula?" 17 Yesu pealongile ndeni, vachundamwa vakawene nyoni, ila vanu vakaendelia kukeduka kwa njowo chinofu cheagitile Yesu.

18 Baho Yesu akavahucha, "Wuli Ung'achale va Nguluvi uwana na liki? Wuli ndiuwananise na liki? 19 Iwana na kimbeyu kadodo yeikemelwa haladali yeanyamule munu yumwi na kuivyala kumgunda vake na mbeyu yila ikamelile na kuvecha libiki na fidege vachengile fyaso fyawo pamakwati gyake."

20 Yesu akavahuchile kangi, "Wuli ndikuuwanisa Ung'achale va Nguluvi na liki? 21 Uwana na lisimika yeainyamue mdala yumwi na kuihanganya pamwi na utine va madebe gadatu mbaka utine vonda utupile."

22 Baho Yesu endelie na lugendo lyake kuhelela ku Yelusalemu. Peakali mung'asi, akachumbile mumwani na mufijijini, akiwulanicha vanu. 23 Munu yumwi akamuhuchile Yesu, "Wuli, Mtwa davakombolewa vadodo?"

Yesu akamuhigile, 24 "Mukangale kwingila mugati kwa kuchumbila mlyangilo mdodo, kwakuva vanu volofu vesaka kwingila ila seviwesa. 25 Vakati ukwacha, munu munya kaye ekwima na kudinda mlyangilo. Na nyenye mwikwima pevala na kuvanga kukong'ola mlyangilo pemulonga, ‘Mtwa, tudinduliye mulyangilo.’ Ila mwene akuvahiga, ‘Sendichela kwemuhumile.’ 26 Baho mukumuhiga, ‘Tukaliye na kunyuwa pamwinga na veve, ukatuwulaniche mufijiji fyetu.’ 27 Ila mwene akuvahiga kangi, ‘Sendichela kwemuhumile. Muhege baha nyenye vonda vawofu.’ 28 Damwivemba na kusigina mino, pemukumuwona Ibulahimu, Isaka na Yakobo na vavichi va Nguluvi vonda vagehe mu Ung'achale va Nguluvi, ila nyenye mwitagwa kwivala! 29 Vanu vekwacha kuhuma lubali chonda cha inyi lubali lwa kuhumila lichuwa na lubali lwa kudibala lichuwa, kuhuma lubali lwa kukyanya na lubali lwa kwivindi na vakwekala mulihungu vekiliya mu Ung'achale va Nguluvi. 30 Baho, vanu vevakali kumwiso davavecha va kwanja, va kwanja vakali Vayawudi ila vakamkanile Yesu. Na vamwiso vakali vanu vevakali se Vayawudi vakamdikie Yesu na va kwanja davavecha vakumwiso."

31 Figono fifila, vamonga va Mafalisayo vakamuhelelie Yesu vakamlongie, "Hege baha uhele pono pangi, kwakuva Helode esaka kukudocha."

32 Yesu akavahigile, "Muhelele mkamlongele mwene likeve ende, ‘Neng'uli na kilawu ndidaga mihoka na kunanicha vatamwa, mukigono kya udatu ndimalila kasi lyagu.’ 33 Hata ifyo, neng'uli na kilawu na pauke, ndiendelela na lugendo lwangu, kwakuva seunofu mvichi adochwe kwivala lya ku Yelusalemu.

34 "Nyenye vanu va ku Yelusalemu! Nyenye vanu va ku Yelusalemu! Mukuvadocha vavichi va Nguluvi na kuvatova maganga vala vananzi yevalagichwe kwaveve! Mala chilinga ndesakile kuvalundasa vana vako pamwinga ngita ng'uku peigubika twana twake kwa mapatilo gake, ila nyenye semukelie! 35 Mulole mulekilwe kaye lyenu lya Nguluvi. Ndikuvalongela semukunilola mbaka mulonge, afunyilwe yula yeikwacha kwa litawa lya Mtwa."