1 Baho, Yesu akavalongela vachulila vake, "Makani gegakuvagita vanu vagite sambi dagivecha figono fyonda, ila dailava yula munu yeileta makani ago. 2 Kwa munu uyo ivecha ngiba awopwe lwala musingo lyake na kutagwa muinyanza, kuliko kumgita yumwi va vanu yevakunifwata agite sambi. 3 Mwiyilolele! Ngita lukolo vako akugitie nongwa, umlakilile, peidikila sambi chake, mlekele sambi. 4 Ngita akugitile sambi mala saba kwa kigono, kila mala iwuya kwaveve akilonga, ‘Ndihongicha,’ Mlekele sambi."

5 Vanjagila va Nguluvi vakamlongie Mtwa, "Utulutichie mbatwa."

6 Yesu akavahigile, "Ngita muveche na mbatwa ndodo ngita mbeyu lya haladali, mngevesa kuulongela libiki hilo lya likuyu, ‘Tupuka ukayivyale muinyanza,’ nawo ungevapulika.

7 "Tulonge yumwi venu munya mnyigendwa yeigima awu yeikwamila kondolo. Wuli, peiwuya kuhuma pa mgunda akumlongela uyo mchulila, wache tandi ukale panyi uliye kyakulia? 8 Hamu! Ila akumlongela, ‘Nditelekele kyakulia, fwale unofu wache kunigundamikila mbaka pendisinda kulia na kunyuwa, baho na veve uliye na kunyuwa!’ 9 Wuli, akumuhongecha uyo mchulila kwa kuvaagitile kyealongilwe? 10 Filafila nyenye pemsindile kugita kyemlongilwe, longeni, ‘Nefwe ndi vachulila twihela, tugitile hela gala getutakilwe kugita.’"

11 Yesu akiva mulugendo kuhelela ku Yelusalemu achumbile mumbaka va Samalia na Galilaya. 12 Peakali ikwingila pa kijiji kimwi, vanu chumi venye ukalavilo vatang'anile nave, vemile patali. 13 Vakabwatukile vakilonga, "Yesu, Mtwa, tuwonele lusungu!"

14 Peavawene avalongie, "Muhelele mukajiwonese kwa vatekechi."

Suwe pevali vihelela, vakang'alichwe. 15 Yumwi vawo pealolile kuva ananichwe, awuyile kwa Yesu kuno akimnjuma Nguluvi kwa lichwi likomi. 16 Akafugamile pautalo lya magulu gya Yesu kuno akimulumba. Munu uyo akali ihumila ku Samalia. 17 Yesu akalongile, "Wuli, sevananichwe vanu vonda chumi? Vala tisa vagehe kwiya? 18 Wuli, ndi mgenji uyu hela yeawuyile kumgavila ukomi Nguluvi?" 19 Yesu akamlongie, "Wime uhelele, kwidikila kwako kukunaniche."

20 Chipindi chimwi, Vafalisayo vamuhuchile Yesu, "Ung'achale va Nguluvi ukwacha panili?" Mwene akavahigile, "Ung'achale va Nguluvi seukwacha ngita kinu kyeukukiwona kwa meho. 21 Kwihela munu yeiwesa kulonga, ‘Lole ugehe baha,’ awu ‘Ugehe pala.’ Kwakuva Ung'achale va Nguluvi ugehe pagati lyenu."

22 Baho avalongie vachulila vake, "Figono fyefikwacha mudoboka kulola mwinga vapo lya figono fya Mwana va Munu, ila semukwilola. 23 Na vanu vakuvalongela, ‘Mlole, agehe pala!’ Awu ‘Mlole, agehe baha!’ Ila nyenye msihume vala mbiile kuva nyilila. 24 Muchele kuva mwana va munu peiwuya, ikwacha ngita lung'ali lwelung'alicha bahobaho na kulangacha lubali chonda kuluhano. 25 Ila daing'ang'wa agude hilo na akanilwe na vanu va kilelo iki. 26 Ngita yali pa kigono kya Nuhu, ndifyo daivecha pa kigono kya kuwuya kwa Mwana va Munu. 27 Vanu vendeliye kulia na kunyuwa, kutola na kutauka mbaka vakati gula Nuhu peingie muwato mkomi weukemelwe safina. Ulava wahumie na kuvadocha vonda. 28 Kangi ikali ndeni mu kigono kya Lutu. Vanu vendelie kulia na kunyuwa, kugula na kugucha, kuvyala mbeyu na kuchenga. 29 Ila kigono kila Lutu peahegile Sodoma, lyoto na maganga gegikwaka kakaikile ngita ndonya na kuvadocha vonda. 30 Ifi ndifyo pedaivecha mukigono kila Mwana va Munu peigubutuliwa.

31 "Kigono ikyo, munu yeyonda yeivecha pakyanya lya kituvili abihile kwika kuhelela kunyamula finu fyake mugati, filafila mwene yeagehe pa mgunda abihile kuwuya ku kaye kunyamula kyokyonda. 32 Muwike gegamupatile mdala va Lutu. 33 Munu yeyonda yeikela kuwokola wumi vake, akugayaganisa na munu yeyonda yeakugayaganisa wumi vake, akuuwokola. 34 Ndikuvalongela, kigono ikyo pamiye vanu vavili vivecha vavasile pamwi paulili, yumwi enyamulwa na yula yungi ilekwa. 35 Vadala vavili davavecha vidibula pamwi, yumwi enyamuliwa na yula yungi ilekwa." 36 Vanu vavili davavecha vigita kasi pamwi pa mgunda, yumwi enyamuliwa na yula yungi ilekwa.

37 Baho vachulila vake vakamuhuchile, "Mtwa, aga gihumila kwiya?"

Na Yesu akavahigile kwa musemo akilonga, "pepagehe na musoga, vandapu vakwilundasa."