1 Kigono kimwinga, Yesu akali pono ekumsuka Nguluvi. Peamalile kumsuka Nguluvi, yumwi va vachulila vake akamlongie, "Mtwa, tukusuka utuwulaniche kusumka Nguluvi ngita Yohani Mbatisa paavawulaniche vachulila vake."

2 Yesu akavalongie, "Pemwisuka Nguluvi, mwilonge yendena,

‘Daada

Litawa lyako linjumwe,

Ung'achale vako ukwache.

3 Utugavile kyakulia kyetu kila kigono. 4 Utuhechele sambi chetu,

kwakuva nefwe tukuvalekela sambi vanu vonda yevatukosie,

vala bihile kutunyamuwa kutusindika mumagecho.’"

5 Baho Yesu akavalongie vachulila vake, "Tulonge ikihumila mugati lyenu yeagehe na mganja vake, akamuhelelie mwilogati na kumlongela, ‘Mganja vangu, ndachime mibumunda midatu. 6 Kwakuva mganja vangu achumbile kwa nene akiva mumagendo, nene ndihela kyakulia kya kumgavila.’ 7 Mwene akiva mugati ngaamhigile, ‘Ubihile kunisumbula! Ndidindile mlyangilo. Nene na vana vangu tuvasile, sendivesa kulamka na kukugavila kinu kyokyonda!’ 8 Ndakyene, ngita seilamuka na kumgavila mibumunda mganja vake, ila kwakuva munu seawene nyoni kuendelia kusuka, elamuka na kumgavila kila kyeakeliye. 9 Kwa ndeni ndikuvalongela, sukeni na nyenye mwigavilwa, sakeni na nyenye mwipata, mkong'ole mulyangilo na nyenye mwidinduliwa. 10 Kwa munu yeyonda yeisuka hugavilwa, munu yeyonda yeisaka ipatila na munu yeyonda yeikong'ola mulyangilo udinduliwa. 11 Wuli, daada ani pagati lyenu damgavile mwana vake lyoka, ngita mwana vake amsukile somba? 12 Awu pemsuka likang'a, wuli, dakumgavila njemi? 13 Ngita nyenye vawofu, muchela kuvagavila vana venu finu finofu, ndakyene Daada venu va kuluhano dakuvagitila kuchumba ago, dakuvagavila Muhe va Nguluvi vala yevakumsuka!"

14 Kigono kimwinga Yesu akali akumuhecha munu lihoka yeamgitile munu kuva abihile kulonga. Yula lihoka peamuhumile, yula munu akavesile kulonga, hata lipinga lya vanu vakadudwive. 15 Ila vanu vangi vakalongie, "Akuvadaga mihoka kwa kugavilwa umwimike va mkomi va mahoka yeikemelwa Belisebuli."

16 Vanu vangi vakamgechile vakasakile agite kimanyilo valole ngita idikilwe na Nguluvi. 17 Yesu akachela mahocho gawo, akavalongie, "Ung'achale vovonda veugavanike fipinga fipinga na kwitova uwene kwa uwene seuvesa kwikala hilo, kaye yeyonda yena ndewo, iyang'anika. 18 Ngita Setani akwipinga yumwene, ung'achale vake ukwima wuli? Ndilonga yendena, kwakuva nyenye mwilonga, nene ndikuvahecha mahoka kwa umwimike va ukomi va mahoka, mwene nde Belisebuli. 19 Suwe, ngita nene ndikuvadaga mahoka kwa umwimike va mkomi va mahoka yeakemelwa Belisebuli, wuli, hata vachulila venu va kuvadaga mahoka kwa umwimike vake? Ndeni, vene davakuvahiga nyenye. 20 Ila ikiva ndihecha lihoka kwa umwimike va Nguluvi, mchele kuva Ung'achale va Nguluvi ufikile kwa nyenye.

21 "Munu munya ludali peidima kaye lyake kwa kyalukilo palidamo, finu fyake fyonda figehe pono lya lutengamaso. 22 Ila peachila munu munya ludali kuchumba mwene ekumdula na kumnyanga fyalukilo fyake fyonda fyeali akwidimila na kutegula finu fyake fyonda.

23 "Munu yeyonda yeseisaka kuva pamwi na nene uyo ekunipinja na munu yeyonda yesenitanga kulundasa, uyo iyaganisa."

24 "Lihoka pelimuhumila munu, lichungutilachungutila isaka pono pe kwihela malenga, pono pakutulula. Seapatile pono pakutulula, akwilongela, ‘Ndiwuya mukaye lyangu pendihumile.’ 25 Peiwuya kangi uwilola yila kaye vafyagie na valembiche. 26 Suwe ihelela na kuvategula mahoka vangi saba vahafu kuchumba mwene, vonda huelela na kumwingila munu uyo. Na wumi va munu uyo ivecha wofu hilo kuchumba pamwandi."

27 Yesu peakali ilonga ago, mdala yumwi mulila lipinga lya vanu, akalonga kwa lichwi, "Afunyilwe mdala yeakubabile na kukuong'elecha!"

28 Yesu akamuhigile, "Ila vafunyilwe hilo vala yevapulika luchowo lwa Nguluvi na kulidikila."

29 Lipinga lya vanu peuginile kwongeleka, Yesu akavalongie, "Kilelo iki ndi kilelo kyekigehe na sambi, kisaka kimanyilo, sekigavilwa kimanyilo kyokyonda seivechile kila kimanyilo kya Yona. 30 Ngita Yona peakali kimanyilo kwa vanu va Ninawi, ndifyo Mwana va Munu ivesa kimanyilo kwa kilelo iki. 31 Mukigono kya kuhiga, mtavala mkomi mdala va Sheba daikwima na kuvawonesa kuva kilelo iki ndi kihofu, kwakuva mwene ahegile muinyi lyake. Akahele kupulika njowo cha uginyange lwa ng'achale Solomoni na baha ndigehe mkomi kuchumba ng'achale Solomoni. 32 Mukigono kya kuhiga, vanu va Ninawi vakwima na kuwonesa kuva kilelo iki kihofu, kwakuva vavo vakahongiche pevapulikile madaliko gya Yona. Ndakyene ndikuvalongela nene ndigehe baha mkomi kuchumba Yona.

33 "Kwihela munu yeiwesa kwasa kibatali na kuifiya awu kuigubika na kiviya, ila kuivika pakyanya lya kisusu neke vanu yevakwingila mugati vawese kulola welu. 34 Meho gyako nde kibatali lya mvili vako. Ngita meho gyako gilola unofu, mvili vako vonda dauvecha muwelu. Ngita meho gyako segilola, filafila mvili vako vonda dauvecha mukisi. 35 Suwe wilolele, welu weugehe mugati lyako ubihile kuseduka kuva kisi. 36 Ngita mvili vako vonda umemile welu na kuhela pono pepagehe na kisi, mvili ugo daung'ala hilo ngita kibatali kyekikulangachila kwa welu lwake."

37 Yesu peamalile kulonga, Mfalisayo yumwi akamlalika kulia kyakula kukaye lyake. Yesu akahele, akakalile panyi kuliya kyakula. 38 Mfalisayo uyo akadudwive peamuwonile Yesu eliya kyakula bila kukalava mawoko gyake ngita pevigita kila kigono. 39 Mtwa akamlongie, "Nyenye Vafalisayo mwiwofoga fikombe na sahani kwivala, ila mugati mumemile ndewo na uwofu. 40 Vapufi nyenye! Wuli Nguluvi yeagelaniche kwivala, ndiyulayula yeagelaniche mugati? 41 Muvagavile vahangala finu fyemnafyo na kila kinu kyemugita dakikumkelisa Nguluvi.

42 "Ila damukikilava nyenye Mafalisayo! Kwakuva mukumuhechela Nguluvi pono lya chumi, mahamba ga mgunda mdodo ngita file nyasafu na fiwungo fya kuwungila kyakulia mafweme na mapambalambuwa, ila uguvachanga vanu na semukumkela Nguluvi. Mwitakilwa tandi muveche vanu vasanzi na vevamkela Nguluvi bila kugaleka ago gangi.

43 "Damwilava nyenye Mafalisayo! Kwakuva mwikela kukala figoda fya pautalo mukaye lya kutang'anila Vayawudi pono pa uginyange na kuhungilwa kwa uginyange musoko. 44 Damwilava nyenye Mafalisayo, kwakuva mwiwana ngita miugono gegayagile na vanu vachumba kukyanya lyake kuno sevachela."

45 Yumwi va vawulanichi va Malagicho akamlongie, "Muwulanichi, njowo chako chikutuliga na nefwe filafila."

46 Yesu akamuhigile, "Damwilava nyenye Vawulanichi va malagicho! Mkuvatwika vanu michigo mikomi, kuno nyenye semwikolela hata kwa kyala kimwi kuvatanga. 47 Damwilava nyenye! Kwakuva nyenye mukuvachengela muugono, vavichi va Nguluvi vevadochilwe na vagogolo venu. 48 Nyenye vavene nde vaswida na mwikwidikila gala gyevagitile vagogolo venu. Vavo vavadochile vavichi va Nguluvi na nyenye mwichenga migunda gya Nguluvi gyawo. 49 Ifyo, Nguluvi alongile muuginyage vake endee, ‘Ndikuvalagicha vavichi va Nguluvi na vanjagila, ila vamonga vadochwa na vangi vagudwa.’ 50 Ifyo kilelo iki dakihigwa, kwa kuvadocha vavichi va Nguluvi vonda kuhuma inyi peiwumbilwe, 51 kuhuma kudochwa kwa Abeli mbaka kudochwa kwa Sakalia yula yeadochilwe mukaye Nguluvi pautalo lya kindangavala kya kunyanya na pono pang'alili. Ena, ndakyene kilelo iki dakihigwa kwa kuvadocha havo vonda.

52 "Damwilava nyenye vawulanichi va Malagicho! Kwakuva muhufihile udindulo lwa mulyangilo lya kumchela Nguluvi, nyenye vavene semukwingile na muvakanile vanu vala vevakali kukwingila!"

53 Yesu peakali ihumile pala, vala Mafalisayo na vawulanichi va Malagicho vavangile kumkekeneka na kumsokosa kwa kumuwucha mahucho gyolofu, 54 neke vambate kwa kinu kyokyonda kyeilonga.