1 Kigono kimwi, Yesu akali imile mumbali lya lihiva lya Genesaleti, vanu volofu vakali va mchungutile kuno vikwikekeneka neke vaveche kupulika unanzi va Nguluvi. 2 Akawene wato givili muling'umbing'umbu lya lihiva. Gegilekilwe na valowa somba yevakali visambula nyafu chawo. 3 Yesu akaingile muwato wumwi lwa Simoni, akamsukile Simoni ahegeleche wato kidodo kuhuma muling'umbung'umbu mulihiva mbaka mumalenga. Baho ekalile panyi, ekuwulanicha lipinga lya vanu akiva muwato.

4 Peamalile kuwulanicha akamlongie Simoni, "Gube wato mbaka pakilwitu cha malenga, baho ukwise nyafu chako mumalenga ulowe somba."

5 Simoni akamhigile, "Mtwa, tugitile kasi lya kulowa somba palumie yonda setupatile kinu, ila kwakuva ulongile, nditaga nyafu." 6 Vakatagile nyafu chawo na vakalovile somba wolofu hata nyafu chawo cha vangile kudumuka. 7 Vakavapungile mawoko vayawo vevakali muwato wungi vache kuvatanga. Vakaachile na vakamemiche somba wato chonda givili hata chivangile kudibala. 8 Simoni Peteli peaonile njowo ago gyonda, afugime pautalo pa Yesu kuno elonga, "Hege pautalo lyangu, eve Mtwa, kwakuva nene nde munya sambi!"

9 Simoni na vayage vonda vakadudwive kwa kulova somba wolofu. 10 Filafila Yakobo na Yohani, vana va Sebedayo, vakali vakolo valowa somba. Yesu akamlongie Simoni, "Bihile kwogofya! Kuhuma neng'uli na kwendelela uvecha ukuvaleta vanu kwa nene ngita valowa pevileta somba kukaye."

11 Vakakwegile wato chawo mbaka muling'umbung'umbu lya lihiva, valekile kila kinu na vakamfuatile Yesu.

12 Yesu peakali ku mwani wumwi, akaachile munu yumwi munya ukalavilo muvili vonda. Munu yula peamwene Yesu, akajigwise ufuma akamsukile Yesu, "Mtwa, ndichela wiwesa kuninanicha neke nding'ale."

13 Yesu akagolue liwoko, akambyalise na kulonga, "Ndisaka! Unane!" Bahobaho wula ukalavilo ukamuhuma. 14 Yesu akamlagiche, "Ubihile kumlongela munu yoyonda, ila helele kwiwonesa kwa mtekechi, ukaheche usembe kwa kung'alichwa kwa veve ngita pealagiliche Musa, vanu vonda vachele kuva ung'alichwe."

15 Ila njowo cha Yesu chikaginile kulutala muinyi yonda. Mapinga ga vanu vakafikile kumpulikicha na vakasakile kunanichwa matamwa gyawo. 16 Ila Yesu akahelelie kudasi na ukoya akamsukile Nguluvi.

17 Kigono kimwi, Yesu akali iwulanicha. Vamonga Vafalisayo na vawulanichi va malagicho yevahumile ku mwani ku Galilaya na Yudea na Yelusalemu vakali vikalile baho. Ludali cha Mtwa chikali pamwinga nave kwa kuvananicha vatamwa. 18 Baho vanu vangi vakaachile, vamnyamue munu munyalugaso paulili, vakasakile kumwingicha mugati vamvike pautalo pa Yesu. 19 Ila sevakawesile kwingila mugati kwakuva kukali na vanu volofu, baho vakakang'ie pakyaya pa kituvili kuno vamnyamue mtamwa, vakatobuwe kituvili pono pe agehe Yesu, vakamkwisile munu munya lugaso muluhaga, vakamvikile pautalo pa Yesu.Vanu vatai vakumkwisa munu pakituvili 20 Yesu pealolile mbatwa yawo ngomi, akamlongie yula mtamwa, "Mwato vangu, ulekilwe sambi chako."

21 Vawulanichi va malagicho na Vafalisayo vakavangile kwiwucha. "Uyu nde ani yekumliga Nguluvi? Yeani yeiwesa kuvalekela sambi? Nguluvi yumwene yeiwesa kulekela sambi!" 22 Yesu akachele mahocho gawo, akavahucha, "Mwihocha liki munumbula chenu? 23 Nde liki lipefu hilo, kulonga, ‘Ulekilwe sambi chako,’ awu kulonga, ‘Wime ugende’? 24 Ila ndisaka muchele kuva nene Mwana va Munu ndigehe na umwimike va kuvalekela vanu sambi muinyi." Baho akamlongie munu munyalugaso, "Wime utegule luhaga lyako na uhelele kukaye."

25 Bahobaho yula munu munyalugaso akaemile pautalo lya vonda, akategule luhaga lyake na kuhelela kukaye kuno akumnjuma Nguluvi. 26 Vanu vonda vakadudwive hilo! Vakakogofya, vamkamnjuma Nguluvi, vakilonga, "Neng'uli tuwonile umanyitu."

27 Pambele, Yesu akahumile kwivala, amwonile mnyamula usulu yeakemelilwe Lawi, ekalile mukaye mwa kuhombela usulu. Yesu akamlongie, "Ndifwate!" 28 Lawi akahimile akaleka kila kinu na akamfwatile.

29 Baho Lawi akamwandalie Yesu lihungu likomi mukaye lyake. Lipinga likomi lya vanyamula usulu na vanu vangi vakali vekalile pamwinga navo. 30 Ila vamonga Vafalisayo na vamonga Vawulanichi va Malagicho vakavaswigwime vachulila va Yesu vakilonga, "Wuli mwiliya na kunyuwa pamwi na vanyamula usulu na vene sambi vangi?"

31 Yesu akavahigile, "Venye wumi se vikela mlami, vevakumkela mlami nde vala vatamwa. 32 Sendachile kuvakemela vanu vasanzi, bali vanu venye sambi, vavese kuhongecha."

33 Vanu vangi vakamlongie Yesu, "Vachulila va Yohani Mbatisa vidindaga kuliya na kumsuka Nguluvi, hata vachulila va Vafalisayo vigita ndeni. Wuli vachulila vako veliya na kunyuwa?"

34 Yesu akavahuchile, "Wuli, vala vanu vevalalikwe kulihungu lya kutola vitakilwa vadinde kuliya kinu na mtwa va lihungu lya kutola agehe pamwi navo? 35 Ila kigono kikwacha nene mtwa lihungu Mtwa va lihungu baho iwonesa kuva Yesu pendihechwa na baho pemudinda kulia."

36 Yesu akavalongie mufano ugu, "Vanu sevitegula kipapi kya mwenda mumiya na kuvika mumwenda weusakiye, ngita vigita ndena, ivecha iyanangike mwenda mmya na kila kipapi kuhuma mumwenda mmya sekiwana na ula mwenda weusakie. 37 Kwihela munu yeivika difwayi miya mukihako kya ngwembe ihofu. Ngita peigita ndena difwayi miya ibachula ikyo kihako na difwayi isukuka na kihako cha ngwembe kikwanangika. 38 Difwayi itakilwa kuvikwa mukihako kya ngwembe miya. 39 Kwihela munu yeinyuwa difwayi yadaha baho isaka kunyuwa difwayi imya kangi ilonga, ‘Difwayi yadaha nofu.’"