1 Kigono kya jumapili nyolasagala, vala vadala vahelelie muugono kuno vategue gala manung'ililo gevaandalise. 2 Vakaliwene lila liganga lyelikali ligubikile muugono libingiliswe patali na ligono. 3 Pevingie mugati, sevauwonile muvili va Mtwa Yesu.Liganga lyelibilingiswe 4 Pevakali wave viduduva luchowo lula, bahobaho vanu vavili vevafwalile myenda gyeging'alile pee, vakaimile pepi navo. 5 Avo vadala vakawogwipe hilo, vakagundime mumhanga. Baho, vanu vala vakavalongie, "Wuli, mukumusaka yeagehe wumi pagati lya vanu vevafuwe? 6 Kwahela baha, achulubuke. Muwike geavalongie peakali ukoya Galilaya. 7 ‘Mwana va Munu etakilwa ahechilwe na vanu venye sambi navo vakumuwamba mulipindilihicho na kigono kya udatu echulubuka.’"

8 Baho vala vadala vakawiwuke machowo gyeavalongie Yesu. 9 Pevawuyile kuhuma muugono, vakavalongie njowo cha Yesu vala vanjagila chumi na yumwi pamwi na vangi makani gyonda. 10 Vadala vevalongile njowo chila kwa vanjagila ndi Maliya Magidala, Yoana na Malia maye va Yakobo, pamwi na vadala vangi vevalongochine pamwi. 11 Vanjagila va Yesu vawonile njowo chechilongilwe na vala vadala ndi upufi hela, ifyo sevidikile. 12 Ila Peteli ahegile na kunyila mbaka muugono. Peagundamile kung'omelela mugati, akawene ligubiko hela. Baho awuyile pakaye kuno adudwive kwa gala gegahumie.

13 Kigono kilakila, vachulila vavili va Yesu vakali vihelela pa kijiji kimwi kyekikemelwa Emau, utali va kilometa chumi na yimwi kuhuma ku Yelusalemu. 14 Vakali veywanga kwa gala gonda gegahumie. 15 Pevali mung'asi vakiywanga, Yesu yumwene akavahumie na akalongochine navo. 16 Vamwene kwa meho gawo ila sevakamuchelile. 17 Yesu akavahucha, "Mwiywanga liki kuno mwigenda?" Na vene vakaimile chii kuno vasugwime. 18 Yumwi vawo, yeakemelilwe Kileopa, amkamuhuchile, "Wuli, veve ndi mgenji wi weka pa mwani va Yelusalemu sewichela gegihumie ukoya figono ifi?"

19 Yesu akavahucha, "Makani liki?" Vao vakamuhiga, "Makani gyegamuhumie Yesu va Nasaleti. Munu akali mvichi va Nguluvi munya umwimike va kugita na kuwulanicha makani pautalo lya Nguluvi na pautalo lya vanu vonda. 20 Vakomi va vatekechi na vatavala vetu vakamuhechile adochwe. Baho vakamvamba mukipindilihicho. 21 Ila nefwe tukachindile kuva mwene ndi ngaavakombola vanu va Isilaeli. Nondee neng'uli kigono kya udatu kuhuma pegahumie makani ago. 22 Vamonga va vadala kuhuma mu lipinga lyetu vagatugitile tuswituke. Nyolasagala vahelelie kuugono, 23 ila sevakuvawene muvili vake. Vakawuyile vakatulongie vahumilwe na ndumindumi va Ngulivi vevavalongie kuva Yesu ndi mumi. 24 Vangi venu vahelelie muugono vakawene gala gavalongile vala vadala, ila sevamuwonile Yesu." 25 Yesu akavalongie, "Wuli, muvapufi na numbula chenu ndi mikangafu kwidikila gonda gegalongilwe na vavichi va Nguluvi! 26 Wuli, seitakilwe Kilisito kugudwa kwa ng'asi ilyo na pambele kwingila muukomi vake?" 27 Ndipo Yesu akavahumulile makani gyonda gyegasimbilwe gyegikumlonga mwene Mumasimbo gya Nguluvi kuvangila mukiganulo kya Musa mbaka vavichi va Nguluvi vonda.

28 Pevakali pepi na kijiji kyevali vihelela, Yesu agitile ngita echumbanicha na lugendo, 29 ila vawo vakambebelise hilo, "Wikale pamwi na nefwe, kwakuva nondee ndi palumie na kisi likwingila." Suwe akaingie mugati kwikala navo. 30 Peikalile panyi na kulia kyakulia pamwi navo, akategue libumunda na akamufunyile Nguluvi akaudumula na akavagavila. 31 Bahobaho meho gawo gakadinduliwe, vakamuchela kuva mwene ndi Yesu, ila mwene akayaganile. 32 Suwe, vakahuchine, "Wuli, numbula chetu segikali na lukeduko ukoya petukali mung'asi peakali akutugumbutulila Masimbo gegasimbilwe mukiganulo kya Nguluvi?"

33 Bahobaho vakahega na kuwuya ku Yelusalemu, ukoya vakavawene vala vachulila kumi na yumwi va Yesu na vanu vangi vevakali pamwi navo, 34 vakavalongie vachulila vala vavili, "Ndakyene Mtwa achulubuke, amuhumie Simoni."

35 Baho avo vachulila vavili navo vakavalongie gala gyegivahumie mung'asi, na namuna pevamuchelile kwa kudumula libumunda.

36 Pevali vakivalongela ago, Yesu yumwene akaemile pagati lyawo, akavongie, "Ulutengamaso iveche na nyenye." 37 Vakatinuke na kwogofya vakahochile vawene ligelawima. 38 Ila Yesu akavahucha, "Wuli, mwikogopa? Wuli, semwidikila mu numbula chenu? 39 Mulole mawoko na magulu gyangu lya kuva ndi nene. Munikolele mulole, kwa kuva ligelawima lihela muvili na michege ngita pemkunilola."

40 Pealongile ago, avawonise mawoko na magulu gyake. 41 Vakali sevidikila, kuno vakidudwiva, mbaka ikavagitile vahoche labuda sendakyene, ifyo Yesu akavahucha, "Mgehe na kyakulia kyokyonda baha?" 42 Vakamgavie kipande kya somba yeabanikilwe. 43 Akakitegule akalie, vonda vakimulola.

44 Baho akavalongie, "Aga ndi mana lya machowo gyangu chendivalongilige pendikala pamwi na nyenye. Kuva ikali lasima gagitilwe gala gyonda gyegasimbilwe mukiganulo kya malagicho gya Musa na pa figanulo fya vavichi na pa kiganulo kya Sabuli."

45 Baho Yesu akachilangachile luhala vawo neke vaveche kugachela Masimbo gya Nguluvi. 46 Akavalongie, "Aga ndigo gayandikilwe, kuva Kilisito eguda na kigono kya udatu echulubuka. 47 Kangi kwa umwimike va litawa lya Yesu vanu va inyi chonda kuvangila Yelusalemu davidalikiwa kuva vahechele sambi chawo,. 48 Nyenye mulolile makani ago na muvalongele vanu vangi. 49 Nene dandikumlagicha kwa nyenye muhe va Nguluvi ambaye Daada akavalongie dakuvagavila, ila nyenye muchindile ku mwani mbaka pemwikwanuka yila ludali yeihuma kukyanya."

50 Pambele Yesu akavalongoche vachulila vake kwelela kwivala lya mwani mbaka ku Betania, ukoya akainamula mawoko gyake kukyanya, akavagavila lufunyo. 51 Peakali akuvagavila lufunyo, akavaleka, akanyamuliwe kuhelele kuluhano. 52 Vavo vakamfunyile na vakawuyile ku Yelusalemu kuno vikeduka. 53 Vakaendelie kwikala mukaye lya Nguluvi na kumfunya Nguluvi.