1 Kigono kimwinga Yesu peakali akuvawulanicha vanu pa Kaye lya Nguluvi na kuvadalikia Njowo Chinofu, vatekechi vakomi na vawulanichi va malagicho pamwi na vakomi vakafikile, 2 vakamuhuchile, "Tulongele! Kwa umwimike va ani wigita ago? Nde ani yeakugavile umwimike ugu?" 3 Yesu akavahigile, "Na nene ndikuvahucha. Mundongele, 4 wuli, umwimike va Yohani va kubatisa ukahumile kwa Nguluvi awu kwa vanu?"

5 Valonganile vavene kwa vavene, "Ngita tukilonga uhumile kwa Nguluvi mwene daituhucha, ‘Wuli, semkumwindikie Yohani?’ 6 Na tukilonga, ‘Gahumile kwa vanu,’ vanu vonda va baha vakututova na maganga, kwakuva vonda vidikila kuva Yohani akali mvichi va Nguluvi." 7 Suwe, vakamuhigile, "Setuchela yeamgavile Yohani umwimike va kubatisa."

8 Yesu akavalongie, "Na nene sendikuvalongela ndigita njowo ichi kwa umwimike va ani."

9 Yesu endelie kuvalongela vanu mfano ugu, "Munu yumwi avyalile misabibu ku mgunda vake, akavakodisile kwa valimi, baho akahegile kuelela inyi yingi, ekalile ukoya kya figono fyolofu. 10 Chipindi cha mabeno pefifikile, Munu huyo amlagiche mchulila vake kwa vala valimi, akategule masumo ga mabenelo gya misabibu. Ila vala valimi vakamtovile mnyingendwa yula vakamdagile mawoko ng'ani. 11 Yula munya mgunda akamlagiche kangi mchulila yungi, ila vawo vakamtovile yula na vakamgitie unjanganifu na vakamdagile mawoko ng'ani. 12 Munya mgunda akamlagiche munu va udatu, uyo kangi vakamlemacha na kumtaga kwivala lya mgunda. 13 Yula mtwa munya mgunda va misabibu ahochile, Ndigita wuli? ‘Ndikumlagicha mwana vangu ndimkeliye, ndakyene vakumginya.’ 14 Vala valimi pevamuwene hela, vakalonganile, ‘Mwene nde mhala va mgunda. Suwe, tumdoche neke uhala vake uve vetu.’ 15 Ndeni, vakamuhechile kwivala lya mgunda lya misabibu vakamdocha.

"Yesu akavahuchile, wuli mtwa munya mgunda akuvagita liki valimi avo?" 16 "Uyo munya mgunda, daikwacha na kuvadocha avo valimi na kuvagavila valimi vangi mgunda ugo va msabibu."

Vanu pevapulike njowo icho, vakalongile, "Hamu njowo ichi chibihile kutuhumila!"

17 Ila Yesu akavahumichie meho, akalongile, "Masimbo aga ga Nguluvi gana mana liki?

‘Liganga lyelikanilwe vachengi,

nonde livechile likanga likomi lya kulubali?’ 18 Munu yeyonda dayeiguwa pakyanya lya liganga idenyeka denyeka, dakumguliya munu yeyonda, likumkinya hilo."

19 Vawulanichi va malagicho na vatekechi vakomi vachelile kuva mufano wula valongilwe vavene, ndeni vakasakile kumwibata bahobaho, ila vakavaogofya vanu. 20 Kwa ifyo vakomi havo vakali vakumfisila Yesu vambate. Suwe, vakavagavile vanu sendi vambate Yesu, vanu havo vayigite vasanzi endee vakali visaka ng'asi lya kumbata Yesu kwa kumuhucha mahucho, neke vakamlate kwa mtavala va Kilumi munya umwimike na ludali. 21 Vanu havo vakamlongie, "Muwulanichi twichela kuva wilonga na kuwulanicha njowo cha undakyene, tuchela kuva veve sewibagula, veve wiwulanicha ngita Nguluvi peikela. 22 Wuli, ikanicha kuhomba usulu kwa ng'achale awu seunofu?"

23 Yesu akachelile mpango vawo, akavalongie, 24 "Munigavile sendi. Wuli, wuso na litawa ilyi lya ani?"

Navo vakamuhigile, "Ndi lya ng'achale." 25 Yesu akavalongie, "Suwe, fya mung'achale mumgavile ng'achale na fya Nguluvi mumgavile Nguluvi."

26 Ifyo vakalemwile kumubata kwa gala geakali ilonga pautalo lya vanu. Navo vadudwive hilo na mahigo gake, vakachikile chii.

27 Vamonga va Masadukayo, vala vevilonga kuva kwihela uchulubuko, vakamuhelelie Yesu na kumuhucha, 28 "Muwulanichi, Musa atusimbilie, ‘Ngita munu gaafililwe na lukolo munya mdala ila sealekile mwana, munu uyo etakilwa amutole yula mwigane, neke ambabile lukolo vake vana.’ 29 Suwe, vakali lukolo saba, mlongola atolile na mwene afuwe bila kuleka vana. 30 Yula lukolo va wuvili akamtolile yula mwigane na mwene afuwe bila kuleka vana. 31 Baho lukolo vaudatu akamuhala yula mgane na mwene akafuwe na ikali filafila vonda saba vakali vamuhalile mwegane yula na vonda vakafuwe bila kuleka vana. 32 Pambele na yula mgane akafuwe. 33 Nonde, kigono kya vanu kuchulubuchwa yula mgane daivecha mdala va ani? Kwakuva daatolilwe na lukolo vonda saba."

34 Yesu akavalongie, "Vanu vevikwikala mu inyi iyi, hutola na kutolwa, 35 ila vevitakilwa kuchulubuchwa ndi vala vevahaguliwe na Nguluvi, havo sevitola vala kutolwa. 36 Ndakyene sefifuwa ng'odo, kwakuva vivecha ngita vandumindumi va Nguluvi. Vavo ndi vana va Nguluvi kwakuva vachulubuchwe. 37 Ila, kwa njowo cha kuchulubuchwa kwa vanu, ata Musa awonise ifyo mu mumasimbo ga Nguluvi, isimbilwe endee kisako kyekikali kikwaka lyoto na baho Mtwa Nguluvi akamlongie, mwene ndi Nguluvi va Ibulahimu na Nguluvi va Isaka na Nguluvi va Yakobo. 38 Mwene se Nguluvi va vanu vevafue ila mwene ndi Nguluvi va vanu vevagehe mumi, kwakuva kwa mwene vonde ndi wumi."

39 Vamonga va vawulanichi va malagicho vakalongie, "Muwulanichi uhigile unofu hilo." 40 Na vene sevagechile kumuhucha kangi ha.

41 Baho, Yesu avahuchile, "Ivecha wuli vanu valonge Kilisito yeahaguliwe na Nguluvi ndi Mwana va Dawudi? 42 Dawudi yumwene asimbile mukiganulo kya Sabuli,

‘Mtwa amlongie Mtwa vangu,

Kale lubali lwangu lwa kuliya,

43 mbaka ndikugite uvawese vachindwama vako uvatavale vaveche panyi lyako, ngita kigoda kya kuvikila magulu.’

44 Ikiva Dawudi akumkemela Kilisito, ‘Mtwa vangu,’ Daivecha wuli Kilisito yeahuguliwe na Nguluvi aveche mwana va Dawudi?"

45 Vanu vonda pevakali vikumpulikicha Yesu, akavalongie vachulila vake kuva. 46 "Muyilolele na vawulanichi va malagicho, ambavo vikela kugendagenda kuno vafwalile mihingila mitali. Na vikela kuhungilwa na vanu kwa unginyange musoko na kukala pautalo lya mukaye lya Kutang'anila Vayawudi na kukala figoda fya pautalo mulihungu. 47 Vakuvahichila vagane mkaye lyake, kuno vakuyigita vene vanu vasanzi kwa Nguluvi na kumsuka Nguluvi kwa muda mutali. Ava davapatila asabu ngomi."