1 Kigono kimwi vanyamula usulu na venye sambi volofu vakahele kumpulikicha Yesu. 2 Vafalisayo na vawulanichi va Malagicho vavangile kuhenima, "Mulole munu uyu, akuvapokela vanu venye sambi na kuliya navo!" 3 Baho Yesu akavahigile kwa mufano akilonga.

4 "Ngita yumwi venu akiva na ng'ondolo miya, akichela kuva yumwi ayagile, igita liki? Akuvaleka vala tisini na tisa mudasi na kuhelela kumsaka yula yeayagile mbaka ampatile. 5 Peakumuwona, ekeduka na kumvika mumavega gyake, 6 na kumsindika kukaye. Baho akuvakemela vaganja vake na vapepi na kuvalongea, ‘Mukeduke pamwi na nene, kwakuva nimuwonile yula ng'ondolo vangu yeayagile.’ 7 Ifyo ifyo ndikuvalongela kuvecha na lukeduko ngomi kuluhano kwa Nguluvi, kwa munu yumwi munya sambi kuhongecha sambi chake, kuchumba vanu tisini na tisa yevikwilolela kuva vasanzi, yesevisaka kuhongecha.

8 "Yesu akavalongie mufano wungi akalongie, tulonge mdala yumwi agehe na sendi kumi na sendi yimwi iyagile, igita liki? Ikwasa kibatali, afyagila kaye na kuisaka kwa unofu kila pono mbaka aiwene. 9 Peakuipata, ekuvakemela vaganja na vapepi vake na kuvalongela, ‘Mukeduke pamwi na nene, kwakuva ndiiwene sendi lyangu yeiyagilege.’ 10 Ndeni ndeni, ndikuvalongela kugehe na lukeduko patalo lya vandumindumi va kuluhanu kwa Nguluvi kwa munu yumwi kuhongecha sambi chake."

11 Yesu akaendelie kulonga, "Kukali na munu yumwi munya vana vavili vagosi. 12 Yula mdodo akamlongile daada vake, ‘Daada, ndigavile pono pangu pa uhala vangu.’ Nave akavagavila pono pake pa uhala vake. 13 Pefichumbile figono fidodo, yula mdodo akaguchile mafwani vake, baho akahegile kukaye, akahelela mu inyi lya kutali, ukoya akachiyagiling'acha kwa njowo wofu. 14 Peamalile kutumila kila kinu, kukahumile lumyayo mu inyi yila yonda na mwene akali ihela kinu kyokyonda. 15 Asukile kasi kwa munu yumwi va inyi yila na mwene akamsindike kumgunda vake kuvagavila kyakula vangubi. 16 Mdimi yula akali na njala hilo, akadobokile kuliya mikona geviliya vala vangubi, ila kukali kwihela munu yeyonda yeamgavile kinu. 17 Pambele akahochile munumbula lyake akalongile, ‘Mbona kuna vanyigendwa volofu kwa daada vangu veviliya na kufileka, kuno nene ndifuwa njala? 18 Ndiwuya kwa daada vangu na kumlongela, "Daada, ndigitile sambi kwa Nguluvi na ndikukosie na veve daada vangu. 19 Sendidikilwa kukemwelwa mwana vako, unigite ngita yumwi va vanyigendwa vako."’ 20 Suwe akavangile lugendo lwa kuwuya kwa daada vake.

"Peagehe have kutali, daada vake akamuwonela lusungu, akamnyilie mwana vake, akamkumbatila kwa lukelo. 21 Mwana vake akamlongie, ‘Daada, ndigitile sambi kwa Nguluvi na ndikukosie na veve daada vangu. Sendidikilwa hata kukemelwa mwana vako.’ 22 Ila daada vake akavakemela vachulila vake, akavalongela, ‘Kisatu! Mulete lihingila linofu mumufwalise. Na mfise pete mukyala na makobasi mumagulu gyake! 23 Mumuhinje senga yeanonile, tugite lihungu na kukeduka! 24 Kwakuva uyu mwana vangu, akali ngita afuwe, nonde nde uwumi, akali ayagile na nonde awonike.’ Navo vavangile kugita lihungu.

25 "Luhungu pelikali likwendelela mwana vake mkomi akali have kumgunda. Peakali ewuya pepi na kufikila pakaye, akapulike vanu vesomola na kukina. 26 Akamkemela yumwi va vachulila, akamuhucha, ‘Kuna liki baha?’ 27 Yula mnyigendwa akamuhigile, ‘Lukolo vako awuyile kukaye, daada vako amuhinjile senga yeanonile kwakuva awuyile akiva mumi.’ 28 Uyo mdimi mkomi akavipile akalema kwingila mukaye lyao. Baho daada vake akahumile kwivala na kumsuka aingile mugati. 29 Mdimi yula akamuhigile daada vake, ‘Lole! Myaka gyonda igi ndikugundamikie na hata kigono kimwi sendilekile kuginya malagicho gyako. Unigavile liki? Seunigavile hata mene yumwi ndikagite lihungu pamwi na vaganja vangu! 30 Ila mwana vako uyu ayaganiche uhala vake pamwi na vagoni, peawuyile hela, umuhinjile senga yeanonile.’ 31 Daada vake akamuhigile, ‘Mwana vangu, veve ugehe pamwi na nene figono fyonda, finu fyonda fyendinafyo ndi fyako. 32 Ila tutakilwe tugite lihungu na kukeduka, kwakuva uyo lukolo vako akali ngita afuwe, nonde agehe mumi, akali ayagile, ila nonde awonikile.’"