1 Lipinga likomi hilo lya vanu likatang'ane, mbaka vanu vakali vakwivatila Yesu akavangile kuywanga na vachulila vake, "Mwilolele na lisimika lya Mafalisayo gya ufyangu. 2 Chochonda chekigubikilwe kigubutuliwa na kyekifihile kiwoneka pawelu pee. 3 Ifyo, kyokyonda kyemlongile mukisi vanu vakugapulika pawelu pee na kila kyempwepwe kwa lupwepo pakituvili, kuno milyangilo gidindilwe, gilanduchwa kwivala lya kaye.

4 "Ndikuvalongela nyenye vamganja vangu, mbihile kuvawogofya vala vevidocha muvili, ila sevavesile kugita kinu kyokyonda kihofu. 5 Dandikuvawonesa yula vakumwogofya. Mumkogofye Nguluvi mwene umwimika, peimalila kudocha iwesa kumtaga munu mulyoto seuchimika mbepali. Ndakyene, mumwogwipe uyo.

6 "Mwichela kuva shewele vahanu huguchwa kwa sendi ndodo hela? Ila kwihela hata yeisemwa na Nguluvi. 7 Hata fwili cha mituwe yenu chivalilwe chonda. Mbihile kogofya, nyenye ngiba hilo kuchumba shewele volofu!

8 "Ndikuvalongela ndakyene, munu yeyonda yeidikila pavanu kuva mwene va nene, Mwana va Munu akumwidikila pautalo lya vandumindumi va kuluhano kwa Nguluvi. 9 Ila munu yeyonda yakunilema pautalo pa vanu na Mwana va Munu ekumlema pautalo lya vandumindumi va kuluhano kwa Nguluvi.

10 "Munu yeyonda yeikumlonga uwofu Mwana va Munu, Nguluvi akumuwonela lusungu, ila munu yeyonda yeakumliga Muhe va Nguluvi seilekelwa sambi.

11 "Pevakuvanyamua na kuvasindika kuvavalata nyenye pautalo pa kaye lya kutang'anila Vayawudi na pautalo pa vatavala na vakomi vene umwimike, mbihile kogofya kyakulonga na kyakuhiga. 12 Kwakuva Muhe va Nguluvi ekuvawulanicha kila kyemung'ang'wa kulonga."

13 Suwe, munu yumwi mulila lipinga lya vanu akamlongie Yesu, "Muwulanichi, mlongele lukololo vangu tugavane uhala weatulekile daada vetu."

14 Yesu akamuhigile, "Wuli mganja nde ani yeanivikile nene kuvalamulila awu kuvagavila uhala venu?" 15 Suwe avalongie vonda, "Mwilolele na ng'efu cha finu, kwakuva wumi va munu sehumila na wolofu va finu feunafyo."

16 Baho, akavalongie mufano ugu, "Kukali na mmosi yumwi yeakali na mgunda lyelibabile mabenelo myolofu. 17 Mmosi uyo ahochile munumbula lyake, ‘Ndihela lusanja. Nonde ndigite liki?’ 18 Baho akwilongela, ‘Nditunyula lusanja lyangu na kuchenga lingi likomi hilo, mumo ndivika mpunga vangu vonda na finu fyangu fyonda.’ 19 Baho ndikwilongela munumbula lyangu, ‘Veve numbula lyangu! Nonde ugehe na finu fyolofu fya kutumila kwa myaka gyolofu. Tulule na uliye na unyuwe na ukeduke!’ 20 Ila Nguluvi akamlongie, ‘Veve mpufi! Neng'uli pamie ndikela numbula lyako. Na finu fila fyonda fyeuyivikile fivecha fya ani?’"

21 Yesu amalile kwa kulonga, "Endeni ivecha kwa munu yeyonda yeajivikile umosi yumwene, ila seajivikie umosi kwa Nguluvi."

22 Baho Yesu akavalongie vachulila vake, "Mbihile kuguda kwa kyakuliya kyemwisaka neke muveche wumi awu myenda mweisaka kwa mivili gyenu. 23 Kwakuva wumi nde ngiba hilo kuchumba kyakuliya na mvili nde ngiba kuchumba myenda. 24 Muvalole kungulu, sevivyala vala kubena vala vehela lusanja, ila Nguluvi ekuvalisa. Wuli Nguluvi sevakuvakela nyenye kuchumba fidege? 25 Nde ani pagati lyenu yeiwesa kwiguda na iwesa kwiwongelesela lisaa limwi mu wumi vake? 26 Ngita semwiwesa kugita njowo ndodo ngita ilyi, wuli ukugagudila ago gangi? 27 Mlole uluva pegimela. Segigita kasi vala segibota. Ila ndikuvalongea, ata ng'achale Solomoni na ukomi vake vonda seawesile kufwala unofu ngita limwi mugati lya uluva aga. 28 Ngita Nguluvi hulifwalisa ilyo likwati lya mugunda na neng'uli ligehe na kilawu litagwa mulyoto, wuli seivesa kuvagitila njowo gyolofu? Nyenye vanu yemunya mbatwa ndodo!

29 "Suwe, mbihile kuhocha kuva mwiliya liki awu munyuwa liki. 30 Vanu sevakumchela Nguluvi vigudila finu ifyo. Ila nyenye, Daada venu va kuluhano ichela finu fyemwisaka. 31 Mugudikile tandi Ung'achale va Nguluvi na finu ifyo mugavilwa.

32 "Mbihile kwogofya, nyenye lipinga lidodo, kwakuva Daada venu va kuluhano ekela kuvagavila Ung'achale. 33 Muguche umosi venu, mukavagavile vahangala icho sendi. Kuno nde kwivikila akiba mukihondo kyako kuluhano, ukoya seiupwemka, ukoya kuhela muhichi yeivesa kuhicha na kuhela umehe weuwesa kuuwanang'a. 34 Pala peigehe umosi vako, ndipo yeuvecha numbula lyako.

35 "Mwiyandalise kunigumbanikila na kibatali chenu chive chikwaka, 36 muve ngita vachulila yevakumchindila mtwa vawo awuye kuhuma mulihungu lya kutola. Peiwuya na kukong'ola mlyangilolo bahobaho ekumdindulila. 37 Vafunyilwe vala vachulila ambavo mtwa vawo peiwuya akuvalola vakalile meho! Ndikuvalongela ndakyene, mwene mkomi uyu akwiyandalisa na kuvalongela vakale panyi na kuvagundamikila. 38 Vafunyilwe vachulila vala mtwa vao dapevalola vakalile meho na kudima ata ngita peiwuya mwilogati. 39 Mucheleni kuva, ngita munya kaye achela saa lya mwichi peikwacha, angekala meho, vala seangeileka kaye lyake idenywe. 40 Filafila nyenye mujitayalise, kwakuva Mwana va Munu ekwacha saa yesemuchela."

41 Peteli akamuhuchile, "Mtwa, wuli ukutulongela nefwe weka hela mufano ulu awu ukuvalongela vanu vonda?"

42 Mtwa akamhigile, "Wuli mchulila ani yeidikilwa na munya uginyange? Mchulila yula ambalye mtwa vake yemvikile kuvatavala vachulila vangi na kuvagavila kyakula vakati unofu? 43 Afunyilwe mchulila yula mtwa vake peiwuya ekumuwona egita endena. 44 Ndakyene ndikuvalongela mkomi uyo ekumvika mchulila yula atavale finu fyake fyonda. 45 Ila ngita mchulila uyo peikwilongela mu numbula lyake, ‘Mtwa vangu acheliwe kuwuya’ na kuvanga kuvatova vachulila vayage vagosi awu vadala na mwene filafila iliya na inyuwa mbaka kugala. 46 Suwe, mtwa va mchulila uyo ikwacha mukigono kyeseakichela na saa yeseailolele. Mkomi uyo akumdunula fipande fipande na kumvika pamwi na vanu yesevidikile.

47 "Mchulila yeachela gala gyeikela mkomi vake gyeagite, ila sekwitayalisa vala seigita gyeakelwa mtwa vake, mchulila uyo itovwa hilo. 48 Ila mchulia yula seichela gyeikela mkomi vake na mwene igita uhofu, mchulila uyo itovwa kidodo, munu yeyonda yeagavilwe fyolofu kwamwene fitakilwa fyolofu. Munu yeyonda yeagavilwe na mkomi vake kasi ngomi munu uyo ihomba hilo.

49 "Ndachile kwasa lyoto muinyi na ndikela ungevecha uwasilwe! 50 Ndinago ubatiso gending'ang'wa kugaanuka, nene ndiguda hilo mbaka kumwiso! 51 Wuli mwihocha ndachile kuleta ulutengamaso muinyi? Hamu! Sendachile kuvagita vanu vikale kwa ulutengamaso bali kuvanenga vanu. 52 Nakuvangila nonde, vanu vahanu vevakali mukaye yimwi vakwitova, vadatu kwa vavili na vavili kwa vadatu. 53 Daada akwitova na mwana mgosi vake na mwana mgosi vake akwitova na daada vawo na maye akwitova na muhinja vake na muhinja akwitova na maye vake. Mganafu akwitova na mkamwana vake na mkamwana akwitova na mganafu."

54 Yesu akagalongie kangi mapinga gya vanu, "Pemulola lifunde gihuma lubali pelidibala lichuwa, baho mwilonga, ndonya itonya, ndakyene ndonya daitonya. 55 Pemulola lukala kuhuma lubali lya kusini wipuga, mwilonga kwivecha na lyoto na ndeni daivecha. 56 Nyenye vafyangu! Wichela kulagula kwa kulola inyi na kululanga na kulonga ndonya daitonya awu ndonya seitonya awu lichuwa lihuma awu lichuwa selihuma. Wuli semuwesa kuchela njowo chechigitwa nonde?

57 "Wuli semwiwesa kwilamulila vavene kuva vasanzi? 58 Ngita munu akukusindika kuutengule ndeunofu mnjengekaye mkiva mwave mung'asi, ngaabihile kukusindika kwa muhiga na mwene ekukusindika kwa mpuga na mwene akukuvika mukiwopo. 59 Ndikukulongela ndakyene sewihega ukoya, mbaka kuhecha sendi cha kusinda."