1 Lihungu lya mibumunda gyesevikwa lisimika, yeikemelwa lihungu lya Pasaka, ikali pepi kufika. 2 Vatekechi vakomi na vawulanichi va malagicho vakali visaka ng'asi lya kumdocha Yesu, ila vakavaogofya vanu.

3 Suwe, Setani akamwingie Yuda yeakemeliwe Isikalioti, yumwi vavala vachulila kumi na vavili. 4 Yuda akahele kwa vakomi va vatekechi na vakomi vapuga va kaye lya Nguluvi. Akaywanga navo fila peakumbata Yesu. 5 Nawo vakedukile na vakaidikilwe nave kumugavila sendi. 6 Yuda akadikile na akavangile kusaka ng'asi lya kumsindika kwavo kwa lupwepo.

7 Suwe, figono fya mibumuda gyeseivikilwe lisimika yafikile. Filafila ikali kigono kyakumuhinja mwana kondolo va Pasaka. 8 Ifyo, Yesu akavalagiliche Peteli na Yohani, akavalongie, "Muhelele mkatuandalile kyakulia kya Pasaka, neke tuvese kulia." 9 Navo vakamhucha, "Wisaka tukakuaandalile kwiya Pasaka?" 10 Yesu akavalongie, "Mpulikiche! Pemuvecha muhelela ku mwani, mutang'ana na mgosi ategue kiviya kya malenga mumavega. Mumfwate mbaka mukaye yeikwingila. 11 Mumlongele munya kaye, ‘Muwulanichi akuhucha, kigehe kwiya kila kyumba kyekiandalilwe kwa Pasaka pamwi na vachulila vangu?’ 12 Mwene davawonesa kyumba kikomi kya kudali kiandaliswe suwe. Baho muandalise kyakula mumo." 13 Suwe, vakahele vawene kila kinu ngita Yesu peavalongie, vene vakaandalise kyakulia kya Pasaka.

14 Saa peifikile, Yesu ekalile kulia kyakulia pamwi na vanjagila vake. 15 Yesu akavalongie, "Ndikali ndikela hilo kulia Pasaka iyi pamwi na nyenye ndikiva ndave sendigudwa. 16 Nondee ndikuvalongela, sendilia kangi pamwi na nyenye mbaka pala ung'achale va Nguluvi peavakombola vanu vake vonda na kutavala."

17 Baho Yesu akanyamuwe kikombe kya difwayi, akahongiche, akalonga, "Mukitegule munywe vonda. 18 Nondee ndikuvalongela, sendinyuwa difai iyi mbaka ung'achale va Nguluvi pewikwacha."

19 Baho akanyamue libumunda, akahongiche, akauketule, akavagavila, akalonga, "Ugu ndi muvili gwangu wemugavilwe nyenye. Mugite ndeni kwa kuniwiwuka." 20 Fifila peamalile kulia kyakulia kya palumie akategue kikombe akalongie, "Kikombe iki ndi lyagano miya lyeliwonesa kuva ndakyene, kwa danda yeisukuka kwajili lyenu.

21 "Ila, muyilolele! Munu yeakukana agehe baha iliya pamwi na nene. 22 Mwana va Munu ihelela kudochwa ngita Nguluvi peakela, ila dailava yula munu dakumkana Mwana va Munu."

23 Baho vavangile kuhuchana ndi ani pagati lyawo yeigita njowo hilyo.

24 Fifila vavangile kwihucha nde ani pagati lyao yeihochwa kuva mkomi kuchumba yungi. 25 Yesu akavalongie, "Vang'achale va inyi ekuvatavala vanu kwa umwimike, navo vala vakomi vakwikemela, ‘Vaganja va vanu.’ 26 Ila nyenye mbihile kuvecha ndeni pagati lyenu, yula yeagehe mkomi pagati lyenu na aveche mdodo va vonda, yeagehe kilongochi lasima aveche ngita yeigundamikila. 27 Wuli, ndi ani yeagehe mkomi? Wuli, ndi yula yeikwikala pa mesa awu ndi yula yeigundamika? Ndakyene ndi yula yeikwikala pa mesa kulia kyakulia. Ila nene ndigehe pagati lyenu ngita mnyigendwa.

28 "Nyenye mukasigalie na nene pa magudo gyangu. 29 Na nene ndikuvagavila ung'achale ngita fila Daada vangu peandigavile nene. 30 Mwilia na kunyuwa pa mesa lyangu, pa ung'achale vangu na kwikala pa figoda kya ung'achale na kuvatavala na kuvahiga nongwa makabila chumi na gavili ga Isilaeli.

31 "Yesu akamlongie, Simoni, Simoni! Pulikiche! Setani akamsukile Nguluvi kuvanenga nyenye ngita munu peipeta mpunga. 32 Ila nene ndikusukile kwa Nguluvi veve Simoni mbatwa lyako isipwemke. Nave peukuniwuyila kangi, uvatange lukolo vako."

33 Mwene Peteli amuhigile, "Mtwa, nene ndidikie kuhehela na veve mukiwopo na ata kufuwa pamwi na veve."

34 Yesu akamuhigile, "Ndikulongela veve Peteli, neng'uli livisi akiva ave kuvika dauvecha ukunikana mala chidatu ngita seukunichela."

35 Baho Yesu akavahuchile vachulila vake, "Vakati pendivalagiche bila kihondo kya senti awu muhako awu mikobasi, mukapwemusilwe na kyokyonda?"

Vakahigila, "Hamu, setukapwemulwe na kinu."

36 Nave akamlongie, "Ila nondee, munya kihondo kya sendi na ategule na yeagehe na kihako ategule. Na yeyonda yeahela lipanga, aguche mwenda gwake agule lipanga limwi. 37 Kwakuva gasimbilwe mumasimbo gya Nguluvi, ‘Akavalilwe pamwi na vene sambi.’ Makani ago gasimbilwe kwajili lyangu. Ndikuvalongala kuva gitakilwa gagitwe."

38 Vachulila vakalongile, "Mtwa lole, baha pagehe na mipanga gavili." Yesu akalongie, "Suwe!"

39 Yesu akahele pa kidunda kya Miseituni ngita peachovie, vachulila vake vakamfwatile. 40 Paafikile ukoya akavalongie, "Msuke, mbihile kwingila pa magecho."

41 Baho akavaleka, akahele utali va munu kutaga liganga, akafugame kumsuka Nguluvi. 42 Akalongie, "Daada, ngita wikela, unihechele kikombe iki kya magudo kwa nene. Ila sengita ndikelafyo nene, ila ngita wikela veve." 43 Baho nduminduni va kuluhano kwa Nguluvi akamuhumie neke amgavile ludali. 44 Yesu akiva muuvasi ukomi, akakangie kumsuka Nguluvi. Lyaso lyake likali ngita madone ga danda gegaguwe mumhanga.

45 Yesu peamalile kumfunya Nguluvi, avawuyilie vachulila vake, avawene vavasile, kwakuva vakali na luswigimo. 46 Akavalongie, "Wuli, mvasile? Mlamuke na mumsuke Nguluvi, mbihile kwingila mumagecho."

47 Yesu peakali ave ilonga, lipinga lya vanu lyachile kuno lilongwichwe na Yuda, yula yeakali yumwi va vala vachulila vake chumi na vavili, akamuhelelie Yesu na kumuhungila kwa kumnonela. 48 Ila Yesu akamhuchile, "Yuda! Wuli, ukumkana Mwana va Munu kwa kumnonela?"

49 Vala vachulila vake pevalolige ago gegahumie vakahuchile, "Mtwa, tuvahinje kwa lipanga?" 50 Yumwi vavala vachulila va Yesu, akamtova mnyingendwa va mtekechi mkomi na akamdumue lisigicha lyake lya kuliya.

51 Ila Yesu akalongile, "Mbihile kugita ndena." Akalibyalisa lisigicha akamnaniche.

52 Baho Yesu akavalongie vakomi va vatekechi, vakomi va vadimaji va kaye lya Nguluvi na vavaha vevahelelie kumbata, "Wuli, mwachile na mipanga na findonga kunibata ngita nene muhichi? 53 Figono fyonda pendikali pamwi na nyenye mukaye lya Nguluvi semukanibatile. Ila iyi ndi saa lyenu, saa lya umwimike va kisi."

54 Baho vakamubatile Yesu, vakamnyamue na kumsindika mu kaye lya mtekechi mkomi. Peteli akava akumfuwata kumbele kwa utali. 55 Vanu vala pevakali vafikile, vakakalile na kulota lyoto pagati lya lidamo vakali vekalile pamwi na Peteli akiva pamwi navo. 56 Mnyigendwa yumwi mdala peamwene Peteli akalile pepi na lyoto, akamuhumichie meho, akalongile, "Munu uyu na mwene akali pamwi na Yesu."

57 Ila Peteli akanile akilonga, "Veve mdala nene sendikumchela munu uyu."

58 Pambele ludodo, munu yungi akamwene Peteli, alongile, "Veve ndi yumwi vawo!"

Ila Peteli akalongie, "Veve munu, se nene!"

59 Pelichumbile lisaa limwi, munu yungi akaginile kulonga, "Ndakyene, munu uyu akali pamwi na Yesu, kwakuva mwene ndi Mgalilaya." 60 Ila Peteli akalongie, "Veve munu, nene sendichela geulonga!"

Bahobaho ave ilonga, livisi likavikile. 61 Mtwa akasedukile na kumlolela Peteli, mwene Peteli akawuwike gala geakali alongilwe na Mtwa, "Neng'uli livisi akiva ave selivikile, ukunikana mala chidatu." 62 Baho Peteli akahumile kwivala, akavembile kwa luswugwimo.

63 Vala vanu vevakali vakumdima Yesu, vavangile kumbeda na kumtova. 64 Vamuwopile meho na vakumuhucha, "Lagule ani akutovile?" 65 Baho vakalongile makani gyolofu gya kumliga.

66 Pekukie, vakomi va vatekechi na vawulanichi va malagicho vakatang'anile pamwi na vaka msindike Yesu palidamo lilo. 67 Navo vakamlongie, "Tulongele! Wuli, veve ndi Kilisito Mkombosi?"

Ila Yesu akavahigile, "Ndikivalongela dasemwidikila, 68 hata ndikivahucha lihucho, dasemkunihiga. 69 Ila kuvangila nondee, Mwana va Munu ivecha ekalile liwoko lyene ludali lya kuliya va Nguluvi munya umwimike."

70 Baho vonda vakamuhucha, "Tulongele veve ndi Mwana va Nguluvi?"

Nave akavahiga, "Nyenye mwilonga nene ndive."

71 Navo vakalongile, "Wuli, twikumkela munu yungi alonge makani gake? Nefwe tumpulikiche akilonga kwa mulomo vake."