1 Pegachumbile ago, Mtwa Yesu akavahaguwe vachulila vangi sabini na vavili, akavalagiliche vavili vavili, valongole mu fijiji na pono paasakile Yesu kuhelela. 2 Akavalongie, "Mabenelo molofu, ila vanyigendwa vadodo. Mumsuke mtwa alagiche vanyigendwa mumgunda vake. 3 Muhelele! Ndikuvalagicha nyenye ngita ng'ondolo mugati lya mikeve. 4 Mbihile kunyamula fihondo fya sendi, vala muhako, vala makobasi na mbihile kumuhungila munu yeyonde mung'asi. 5 Pemwikwingila kaye yeyonda, tandi vahungileni yendee, ‘Mwikale kwa ulutengamaso mukaye ilyi!’ 6 Ngita munu mkela ulutengamaso, ulutengamaso lwenu ukukala pamwi na mwene, ngita kuhela yeikela ulutengamaso, ulutengamaso lwenu ukuvawuyila. 7 Mukale mukaye yimwi, mukilia na kunyuwa kyokyonda kyemugavilwa, kwakuva mnyigendwa ing'ang'a kuhombwa sendi chake. Mwikale kaye yimwi, mbihile kuhega hega kuhelela kaye yingi. 8 Pemwingila kumwani vovonda na vanu vakivawanuka, muliye kyokyonda kyemugavilwa. 9 Muvananiche vatamwa vevali mumwani ugo, muvalongele vanu, ‘Ung'achale va Nguluvi ugehe pepi kwacha.’ 10 Ila pemwikwingila kumwani vovonda, ngita sevakuvawanuka, muchumbe mung'asi chawo, mlonge, 11 ‘Hata lifuna lya mwani lyenu lyeling'ang'anile mumagulu gyetu, tukuvapumunila nyenye, ivese kimanyilo kuva mwikotoliwe, ila muchele kuva Ung'achale va Nguluvi ugehe pepi kwacha.’ 12 Ndakyene ndikuvalongela, mukigono kya kuhiga nongwa, Nguluvi akuhiga nongwa ngomi mwani ugo kuchumba mwani va Sodoma ve vali vawofu.

13 "Mwilava vanu va Kolasini! Mwilava vanu va Betisaida! Kwakuva ngita umanyitu geigitilwe baha ngagagitilwe na ukoya Tilo na Sidoni, vanu vaukoya ngavafwalile myenda gya miloboto na kwibaka kifu kwiwonesa kuva vahongiche. 14 Mukigono kya kuhiga nongwa, Nguluvi davawonela lusungu vanu va mwani va Tilo na Sidoni kuchumba nyenye. 15 Nyenye vanu va Kapelinaumu, wuli, mwinjuma mbaka muinyi? Hamu, mwikwiswa mbaka kumafunde."

16 Yesu akavalongie vachulila vake, "Munu yeakuvapulika nyenye, ekunipulika nene na munu yekuvalema nyenye, ekunilema na nene. Na munu yekunilema nene, ekumlema yula yeanilagiliche."

17 Pambele, vala vachulila sabini na vavili vakawuyile kuno vagehe na lukeduko hilo, vakalongie, "Mtwa, kwa litawa lyako tukavalakila mahoka, navo vakagitile ngita petuvalongie."

18 Yesu akavalongie, "Ndamwene setani eguwa kuhuma kuluhano ngita lumuli. 19 Mpulike! Ndivagavile umwimike va kukinya liyoka na vinjemi na ludali va kumuwesa mchundwama, kwihela kinu kyokyonda kyekikuvalemacha. 20 Ila mbihile kukeduka kwakuva mihoka gikuvadikila, ila kedukeni kwakuva matawa genu gasimbilwe kuluhano, neke muveche vanu va Nguluvi."

21 Saa yiyila, Yesu akedukile kwa umwimike va Muhe va Nguluvi, akalonga, "Ndikuhongecha veve Daada, Mtwa va kuluhano na inyi, kwakuva ugafyihile njowo ichi kwa vanu va uginyange na venye luhala na uvagubutulie vana vadodo. Ndakyene, Daada, ndene ndifyo ukeliye."

22 Baho akalongie, "Daada vangu anigavile finu fyonda. Kwihela munu yeamcheliye mwana ila Dadi, vala kwihela munu yeamchela Daada ila Mwana, na vanu vala yevahaguliwe ugubutilwa na Mwana."

23 Akavasedukie vachulila vake na kulonga navo poono kuhela vanu, "Vafunyilwe vanu vala vevilola makani gala gemukugalola nyenye! 24 Ndakyene ndikuvalongela, vavichi na vang'achale vadobokile kulola gala gemukugalola nyenye ila sevawesile kulola na kupulika gala gemukugapulika ila sevavesile kupulika."

25 Pambele muwalinichi yumwi va malagilicho akaimile, amgeche Yesu, akamuhucha, "Muwulanichi, ndigite liki neke nipatile wumi va mbepali?"

26 Yesu akamuhuchile, "Malagicho gilonga wuli? Uchela wuli?"

27 Munu uyo akamuhigile, "Mkele Mtwa Nguluvi vako kwa numbula lyako lyonda, kwa muhe vako vonda, kwa ludali chako chonda na kwa mahocho gyako gyonda. Na mkele muyago ngita weukijikela veve."

28 Yesu akamlongie, "Uhigile unofu, gite aga dawikala."

29 Ila munu yula akasakile kwiwonesa kuva munu msanzi akamuhuchile Yesu, "Vapepi vangu ndi ani?"

30 Yesu akamuhigile, "Munu yumwi akali ekwika ku Yelusalemu kuhelela Yeliko, peakali mung'asi, vahichi vakambatile, vakamuhichila finu fyake vakamtova pepi kufua. 31 Baho akahumile mtekechi akali ikwika ng'asi yilayila, ila peamuwonile munu yula yeatovilwe akachumbile palubali. 32 Filafila Mulawi yumwi peafikile na kumlola munu yula yeatovilwe na mwene akachumbile palubali. 33 Ila Musamalia yumwi yeakali ichumba ng'asi yila. Peamuwonile akamuwonela lusungu. 34 Akamheleliye yula yeatovilwe akamuhogofiche fikong'o fyake kwa kumbaka mafuta na difwayi na kumuhopa kilepe. Baho akamkang'achile pakyanya lya lipunda lyake, akamsindikile kukaye lya vagenji na kumutamisa. 35 Kilawu lyake Msamaliya yula akamgavile fipande fivili fya madini gya sendi gya fesa munu munya kaye akamlongie, ‘Mtamiche munu uyu, pendiwuya ndikuwuyisila kyokyonda kyeatumile.’" 36 Yesu akamuhuchile, "Pagati lya havo vadatu, nde ani vapepi va yula munu yeatovilwe na vahichi?"

37 Yula muwulanichi va malagicho akamuhigile, "Nde yula yeamwonie lusungu." Yesu akamlongie, "Na veve helele ukagite ngita peagitile yula Msamaliya."

38 Yesu na vachulila vake pevakali mumagendo kuhelala ku Yelisalemu, vengie ku mwani wumwi na mdala yumwi yeikemelwa Malita, akampokela mukaye lyake. 39 Malita akali na muhachave yeakemeliwe Malia, uyu ekalile pepi na Mtwa Yesu na akali ipulikicha mawulanichi gyake. 40 Ila Malita akali igita kasi cholofu cha kugundamikila. Baho amhelelie Yesu, akamlongie, "Mtwa, nde seulola kuva muhacha vangu anilekie kasi chonda ndigite weka? Mlongele ache anitange."

41 Ila Mtwa amuhigile, "Malita, Malita, wigayangaya na kuguda kwa njowo cholofu. 42 Ila ligehe luchowo limwi hela linofu kuchumba chonda. Luchowo ilyo ndi kunipulika. Malia nde kalihaguwa na kwihela munu yeiwesa kumunyaga."